Северноатлантската алијанса се насочува кон измислени закони и демонизација на Русија, изјавија во неделата од руското министерство за надворешни работи по одлуката на НАТО да го зголеми бројот на војници на своето источно и јужно крило на самите руски граници поради она што Москва го карактеризира како непостоечка закана.

НАТО официјално на дводневниот самит во Варшава одобри распоредување на четири баталјона со по илјада војници во Естонија, Латвија, Литванија и Полска, кои наводно стравуваат од можна руска воена интервенција против нив земајќи го за пример украинскиот конфликт во кој ја обвинуваат Русија дека го предизвикала, нелегално анкетирала украинска територија и ги поддржува тамошните сепаратисти.

Алијансата, исто така, донесе одлука да го стави на почетното ниво на оперативна подготвеност досега американскиот антиракетен штит во Европа и да го зголеми мултинационалното воено присуство во црноморскиот регион.

Москва тврди дека не претставува никаква закана за своите соседи и го обвинува НАТО дека ја демонизира за да го одврати вниманието од својата деструктивна улога во конфликтите во светот, соопшти руското министерство за надворешни работи.

Портпаролката на руската дипломатија Марија Захарова за новинарите рече дека руската страна внимателно ќе ги проучи одлуките од самитот, но и оти дури и првичните анализи укажуваат дека НАТО сé уште е во некое „воено-политичко огледало“.

Наместо да ги здружи силите со сите релевантни меѓународни фактори за соочување со вистинските закани, НАТО „се бори со измислени предизвици и ги концентрира своите напори на непостоечките закани од истокот“, рече Захарова презентирајќи го ставот на руското министерство за надворешни работи.

„Острата нерамнотежа во зајакнувањето на крилата на НАТО во заднина на терористичките закани без преседан кои доаѓаат од јужната насока сведочат за сé поочигледната политика на изолација на блокот од многу итните потреби за осигурување на безбедноста на граѓаните на земјите членки на НАТО“, истакна Захарова.

Нагласи дека Алијансата намерно ги игнорира долгорочните негативни последици од чекорите кои преземаат Вашингтон и Брисел, за принудување на спроведувањето на плановите за ткн антиракетен штит во Европа, на кој Русија исто така остро се спротиставува сметајќи дека е насочен против нејзините стратешки ракетни комплекси, а таквите чекори претставуваат и опасност за сите системи на евроатлантската безбедност. Во меѓувреме, обидите да се „демонизира“ Русија со цел да се оправда воено зајакнување добиваат претерани форми, се наведува во документот.

Генералниот секретар на НАТО, Јенс Столтенберг, зборувајќи за резолуцијата донесена во Варшава, рече дека односите со Русија ќе се засноваат на „одбрана и дијалог“, односно за зголемување на „одвраќањето“. Во завршната резолуција на челниците на земјите членки се истакнува дека НАТО е посветен на конструктивни односи со Русија, но тие ќе зависат од дејствијата на Москва.

Амбасадорите на членките на НАТО ќе се сретнат во среда во Брисел со рускиот амбасадор во Алијансата, Александр Грушков, и ќе го известат за одлуките од самитот. Германија, која се смета за водечка европска сила, е меѓу оние кои бараат НАТО да го обнови дијалогот со Русија.

„Ја поздравувам одлуката за свикување на состанок на Советот НАТО-Русија во среда, веднаш по Варшава. Тоа е можност да се појаснат одлуките од Варшава и повторно да се воспостави сериозен дијалог со Русија, особено за сложените прашања од нашиот мировен план и безбедносната структура во Европа“, изјави германскиот министер за надворешни работи Франк-Валтер Штајнамер, кој пред десетина дена ја критикуваше Алијансата за „воинствени“ ставови кон Москва./крај/мф/сн

Извор: Макфакс