Спорт
Лампард: Ова е трофеј кој клубот очајнички сака да го освои
Лондонски Челси вечерва на „Бешикташ парк“ во Истанбул во мечот за Суперкуп трофејот против Ливерпул има можност да стави раце на првиот трофеј во новата сезона, еден од пехарите кои новиот тренер на „сините“ Френк Лампард никогаш не го освоил.
Лампард беше еден од највлијателните играчи на Челси во златната ера на „сините“, но титулата во Суперкупот двапати му се извлече од раце. Првиот пат во 2012 година кога поуспешен беше Атлетико Мадрид со 4-1, а една сезона подоцна Баерн Минхен по изведувањето на пеналите го совлада Челси.
Во неделата Лампард првпат го предводеше својот тим на еден Премиерлигашки меч ( не се прослави, загуби Челси со 4-0 од Манчестер Јунајтед), а вечерва првпат ќе биде тренер на еден европски меч.
„Тоа што играме против Ливерпул ја подигнува летвичката во ова финале многу високо. Може да се изгуби финале, тешки натпревари се тоа, но не смееш да не бидеш доволно подготвен или да немаш желба за победа. Секој играч на теренот мора да биде свесен за важноста на овој дуел за клубот“ вели Лампард.
Стратегот и покрај сите проблеми во клубот е оптимист и верува во успех.
„Оптимист сум затоа што верувам во своите играчи и знам дека тука во Истанбул сме затоа што сме го заслужиле тоа, никој не ни го подарил. Ако играме максимално, на крајот можеме да славиме. За клуб како што е Челси битно е да дадеме се од себе и да се обидеме да го освоиме трофејот. Свесни сме за важноста на тој трофеј како за клубот, така и за сите нас“ – истакна меначерот на „сините“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Јасикевичиус го сака Димитријевиќ во Фенербахче
Актуелниот МВП во ВТБ лигата, македонскиот репрезентативец, Ненад Димитријевиќ, од наредната сезона веројатно ќе игра во Евролигата.
Кошаркарот на Уникс, со просек од 19 поени по меч, 6,6 асистенции, 3,3 скока и 1,3 украдени топки го обележа регуларниот дел од сезоната во ВТБ лигата.
Според информациите на турските медиуми, Димитријевиќ е на мета Фенербахче. Тренерот Шарунас Јасикевичиус изразил желба да го види Димитријевиќ во својот тим. .
Фенербахче ќе направи реконструкција на плејмејкерската позиција, извесно е дека тимот ќе го напуштат Гркот Ник Калатес и Израелецот Јам Мадар.
Спорт
МЗТ загуби од Спартак Суботица
Фото/ Петр Стојановски/ АБА2
Кошаркарите на МЗТ го загубија првиот полуфинален натпревар во АБА 2 лигата. Вечерва во Скопје, МЗТ доживеа пораз од Спартак 73:78 (15:23, 16:12, 24:17, 18:26).
Лошата игра во првиот дел во кој му дозволија на гостинот апсолутна доминација во скокот го однесе МЗТ во пораз. Спартак, најдобриот тим во регуларниот дел од сезоната, преку скокот ја контролираше играта. Одличната секвенца на Војдан Стојановски во финишот на полувремето го доближи МЗТ на само четири поени негатива.
Американецот Гилион одлично го започна вториот дел, со седум поени во низа го врати МЗТ во водство. Се одлепи МЗТ на пет поени (55:50) во финишот на третиот период и тука застана.
Спартак предводен од Гордиќ стекна предност од 10 поени, предност која МЗТ успеа да ја преполови.
Војдан Стојановски со 20 поени, по три скока и асистенции и шест украдени топки го предводеше МЗТ. Двоцифрени беа и Делалиќ со 13, Танасковиќ со 12 и Гилион со 11 поени. Кај Спартак се истакна Гордиќ со 16 поени и шест асистенции.
Реваншот се игра за една недела во Суботица.
Спорт
Катастрофа за Милвоки се повреди и Лилард
Кошаркарот на Милвоки, Демијан Лилард заработил повреда на Ахиловата тетива, објавија сите НБА инсајдери.
Лилард играл последните недели и покрај проблемите со Ахиловата тетива, и ја влоши состојбата во последниот дел од третиот натпревар од првото коло од плеј-офот против Индијана.
Плејмејкерот на Милвоки мора да носи ортопедска чизма и под знак прашалник е за четвртиот меч (понеделник, 01.00 часот) во серијата во која Пејсерси водат со 2:1.
Бакс веќе играат без Јанис Адетокумбо, кој ќе ја пропушти првата рунда, а неговата сезона многу лесно може да заврши доколку Милвоки биде елиминиран.
Во првите три натпревари во плејофот, Лилард имаше просек од 32,3 поени и 5,7 асистенции по натпревар.