Француските пожарникари втор ден по ред се борат со најголемиот шумски пожар во последните речиси осум децении, кој проголта 16.000 хектари шума, загина едно лице, а неколку други се водат како исчезнати.

„Пожарот досега не е ставен под контрола“, изјави за BFM TV, Кристоф Мањи, еден од водачите на операцијата за гаснење пожари во јужниот француски регион Од.

A massive forest fire in Aude, southern France 🇫🇷 (06.08.2025)

Over 16,000 hectares have burned, and 25 houses and 40 cars have been destroyed. pic.twitter.com/4lBrldVWAd

— Disaster News (@Top_Disaster) August 6, 2025

Пожарот во близина на границата со Шпанија започна претходно оваа недела и веќе опустоши област поголема од Париз. Властите предупредуваат дека тоа е најголемиот шумски пожар од 1949 година.

Шпанија се бори и со разорни пожари, особено на самиот југ од земјата каде што пожарот се приближи до туристичкото одморалиште Тарифа. Таму се евакуирани неколку хотели и станбени згради, како и пет илјади возила. Локалните медиуми велат дека се евакуирани и 1.500 луѓе.

Научниците предупредуваат дека потоплите и посуви лета создаваат поголем ризик од шумски пожари во медитеранскиот регион. Според Европската комисија, 353.000 хектари изгореле во 1.478 пожари во Европа од почетокот на годината.

Службата за климатски промени „Коперник“ на ЕУ денес соопшти дека минатиот месец бил третиот најтопол јули на Земјата откако започнале да се водат евиденции, вклучувајќи рекордно висока температура од 50,5 степени целзиусови во Турција.

Фото: ЕПА

Од 1 јануари 2026 година, во Словенија делумно ќе стапи во сила закон кој претставува вистинска револуција на пазарот на трудот. Освен зголемување на надоместоците за невработеност и јавни работи, како и олеснување на пристапот до пазарот на трудот за младите, студентите, но и пензионерите, законот ќе им овозможи на лицата кои се блиску до пензија да ја намалат работната обврска.

Конкретно, работниците постари од 58 години, како и оние со најмалку 35 години работен стаж, практично ќе можат да изберат помеѓу слободен петок, или скратен работен ден во траење од шест часа, потврдија од Министерството за труд, семејни и социјални прашања и еднакви можности за словенечките медиуми.

Според моделот наречен 80-90-100 – што значи 80 отсто работно време, 90% плата и 100% уплатени придонеси – Словенија делумно ќе ги преземе искуствата на земји како Исланд, Ирска и Германија. Во овие земји ваквите закони довеле до позитивни ефекти како зголемена продуктивност, помалку отсуства од работа и поголема ефикасност. Словенците веќе имаат неколку пилот-проекти, претежно во технолошки компании, кои покажале слични резултати.

Од Министерството за труд најавија дека, доколку измените се покажат успешни, ќе се оди во насока на дополнителна либерализација на прописите. До крајот на 2028 година се очекуваат и промени како додаток за работа во сабота, задолжителен божиќен бонус за сите вработени, па дури и воведување на 38-часовна работна недела.

Во оваа прва рунда на измени донесени се и други мерки. Така, од 2026 година невработените Словенци ќе имаат повисоки надоместоци за невработеност. Максималниот износ што ќе го примаат во првите три месеци по отказ или раскин на договорот за работа ќе изнесува 130 проценти од просечната бруто минимална плата во државата, што моментално е нешто повеќе од 1660 евра. Ако ни по три месеци не најдат нова работа, ќе имаат право на 110, па 100 отсто, па сè до 70 проценти од просечната бруто минимална плата.

Значајни промени и зголемени надоместоци ги очекуваат и учениците, студентите и учесниците во јавни работи, кои покрај повисоки минимални часовни тарифи ќе имаат и подобрени работни услови. Планирани се и стимулации за вработување на невработени лица постари од 59 години во износ од 40 проценти од месечниот нето надоместок, а оваа категорија ќе има право на зголемен број дозволени часови за привремена или повремена работа. Месечното ограничување за работа на пензионерите се зголемува од 60 на 85 часа месечно, соодветно со зголемување на максималниот годишен приход.

Законот на крајот беше усвоен по итна постапка бидејќи неговото донесување беше услов за повлекување 140 милиони евра европски средства за таа цел.

Тајланд и Камбоџа постигнаа договор за решавање на граничните тензии, објави тајландската влада.

„Заврши состанокот на комитетот за решавање на ситуацијата на границата меѓу Тајланд и Камбоџа. Двете страни се согласија за договор од 13 точки за почитување на режимот за прекин на огнот. Претставниците на двете земји потпишаа протоколи насочени кон намалување на граничните тензии и враќање на мирот во граничната област“, се вели во соопштението објавено од тајландската влада на мрежата Икс.

Во неделата, Министерството за одбрана на Камбоџа го обвини Тајланд за планирање нови напади и нареди евакуации по граничните области, иако официјален Бангкок ги отфрли обвинувањата.

Тајланд и Камбоџа ја опишаа граничната ситуација денес како мирна и ветија дека ќе го почитуваат прекинот на огнот.

Постигнувањето на примирјето беше посредувано од премиерот на Малезија Анвар Ибрахим, во својство на претседател на АСЕАН, со притисок од Вашингтон и американскиот претседател Доналд Трамп.

Конфликтот меѓу Тајланд и Камбоџа произлегува од долгогодишни спорови што датираат од колонијалното време и договори што дефинираа заедничка граница.

Фото: ЕПА