Украина е единствено и целосно одговорна за катастрофата на малезискиот патнички авион, од 17-ти јули во источна Украина кога загинаа 298 луѓе, изјави во средата рускиот министер за одбрана генерал Сергеј Шојгу, на средбата со неговиот малезиски колега Хашамудин Хусеин, кому му ги предал податоците што руската страна ги има за несреќата.

Малезискиот министер одбрана пристигна во куса посета на руската престолнина, ден откако холандската истрага го објави прелиминарниот извештај за трагедијата со малезискиот авион. Според портпаролката на малезиската амбасада во Москва, министерот за одбрана Хашамудин Хусеин по средбата со рускиот колега Сергеј Шојгу ќе има средби со највисоките руски функционери.

„Катастрофата се случи во воздушното пространство на Украина, којашто ја понесува целата одговорност за она што се случи“, изјави Шојгу, пренесе Итар-Тасс.

„Убеден сум дека доколку Украина ги решаваше внатрешните проблеми без примена на вооружените сили, без крвопролевањето кое се одвива последните месеци, без употреба на тешка артилерија вклучително и ракетна, без примена на авијација (…), оваа трагедија немаше да се случи“, истакна Шојгу обраќајќи му се на колегата Хусеин.

Холандските истражители во прелиминарниот извештај наведуваат дека можна причина за падот на малезискиот авион е тоа „што претрпел отштетување од проектили со голема брзина“ непрецизирајќи го нивното потекло ниту природата. Авионот „се распаднал во воздух веројатно поради структуралните оштетувања предизвикани од голем број високоенергетски објекти со голема брзина кои однадвор го погодиле“, се наведува во извештајот на Холандското биро за безбедност (OVV) кое ја води меѓународната истрага, а неговата портпаролка во средата за РИА Новости потврди дека во телата на пилотите биле откриени „надворешни објекти“.

САД и Киев ја обвинуваа Русија дека на проруските бунтовници во источна Украина, кои ја контролираат територијата на којашто падна малезискиот „боинг“, им доставила ракетен систем „Бук“ и дека тие го собориле авионот со ракета земја-воздух. Москва пак тврди дека нејзините радарски системи откриле дека во периодот на несреќата бил активен ракетен систем „Бук“ на територијата која ја контролира украинската армија како и дека украински ловец летал покрај малезискиот авион. Американски експерти, пак, за малезиските медиуми во почетокот на август наведоа дека според дупките на остатоците од авионот може да се заклучи дека врз него е дејствувано од борбен авион.

На 6-ти август, малезискиот весник The New Straits Times, повикувајќи се на странски експерти, меѓу кои и американски, пишуваше дека малезискиот „Boeing 777“ бил најверојатно со борен од ракета или од топ на ловец „Сухој Су-25“, пишува во средата малезискиот магазин. Експертите, консултирани од магазинот, сметаат дека борбениот авион истрелал ракета „воздух – воздух“ врз патничкиот авионк, а потоа го „довршил“ со истрел од неговиот 30-милиметарски топ. Според нив, со тоа можат да се објасни природата на оштетувањата на авионот и разлетувањето на остатоците од него. Имено, тие посочуваат на постоењето на заоблени влезни-излезни дупки на пронајдените фрагменти од малезискиот авион, коишто се типични за истрели од топ, исто како и при експлозија на ракета чиишто шрапнели можат да предизвикаат такви дупки.

Според оваа нова верзија, била употребена топлински самонаведувана ракета којашто носи трикилограмска боева глава, којашто го погодила најчувствителното место на авионот – моторите. Оваа верзија ја исклучува претходната според којашто авионот бил соборен со ракетниот систем „Бук“, бидејќи според експертите доколку авионот би бил погоден со ваков проектил од него не би останало речиси ништо, и не би имало потреба од „дополнителен“ напад од топ.

Како што истакнува магазинот, „Су-25“ може да достигна максимална височина од 25 илјади фути (7.600 метри), а малезискиот авион летал на височина на 10.600 метри. Сепак, според соговорник The New Straits Times, „’Су-25’ би требало да дејствува на границите од своите перформанси, но тоа е возможно“.

Четири дена по несреќата на летот МН17 од Амстердам до Куала Лумпур, началникот на Главната оперативна управа на Генералштабот на руската армија, генерал-потполковникот Андреј Картаполов на прес-конференција во Москва соопшти дека украински ловец од типот „Сухој Су-25“ бил 3 до 5 километри оддалечени од малезискиот „Boeing 777“ непосредно пред неговиот пад, кој притоа ги повика САД да објават сателитски снимки од тој временски интервал, а украинскиот претседател Петро Порошенко одговори дека во времето на несреќата сите украински авиони биле приземјени.

„Видовме дека украинскиот авион ’Су-25’ се крева кон малезискиот ’Boeing’ кој од него беше оддалечен 3 до 5 километри. Су-25 може да лета на височина до 10.000 метри. Носи ракети со дострел од 12 километри и сигурно гаѓа цел на растојание до 5 километри“, изјави генералот Андреј Картаполов на прес-конференцијата во Москва. „Се прашуваме: зошто ловецот летал на таа височина кога и цивилен авион?“, додаде Картаполов.

Авионот од типот „Сухој Су-25“ кој во класификацијата на НАТО се именува како Frogfoot примарно е јуришен авион за напади на цели на земјата. Но постои варијанта и можност овој тип авион да биде опремен со ракета Р-60 воздух-воздух.

Рускиот министер Шојгу во средата повтори дека украинската страна досега сé уште не одговорила на прашањата што и’ ги постави руското министерство за одбрана. „Ние формулиравме десет едноставни прашања до украинската страна, а одговорите на нив можат да ги расветлат околностите во кои се случила несреќата. За жал, досега не добивме одговор“, изјави Шојги.

Додаде дека руското министерство за одбрана е подготвено да и укаже секаков вид помош на Малезија во поглед на расветлувањето на трагедијата. „Од своја страна, подготвени сме да укажеме сета неопходна помош, поддршка во разјаснувањето на причините на несреќата“, рече Шојгу обраќајќи му се на колегата Хусеин.

„Истрагата мора да биде независна и непристрасна, и резултатите треба да бидат претставени на целата светска заедница“, истакна Шојгу.

Истакнал дека на брифингот во Министерството за одбран на Русија биле презентирани податоците коишто ги поседува руската контрола во врска со несреќата на малезискиот авион и сета документација преведена на англиски јазик преку малезиската амбасада во Москва била предадена на сите земји „кои загубија свои државјани во несреќата“. „Подготвени сме да го сториме тоа повторно. Подготвени сме да одговориме на прашањата коишто може да се појават во врска со оваа презентација“, истакнал Шојгу.

Потенцирал дека посетата на Москва на малезискиот министер за одбрана била непланирана и е во врска со несреќата на авионот.

Малезискиот министер Хашамудин Хусеин изјави дека резултатите од „истрагата се многу добри“. „Пристигнав во Москва директно од Киев и ќе се сретнам и со заменикот министер за надворешни работи. Ги добив ставовите на двете страни, и тие информации далеку ги надминуваат моите очекувања“, изјави Хусеин./крај/мф/сн

Извор: Макфакс