Водечкиот кандидат за номинација на Републиканската партија за американските претседателски избори во 2016-та, милијардерот Доналд Трамп, повика на „целосна и комплетна“ забрана за влегување на муслиманите во САД, сметајќи дека тие „ги мразат Американците“, во атмосфера на впечатоците од неодамнешниот терористички напад во Калифорнија кога млада муслиманска брачна двојка која се радикализирала уби 14 и рани уште 21 човек.

„Дури и без резултатите од разните испитувања на јавното мнение, секому е очигледно дека омразата го надминува секој разум. Од каде доаѓа и зошто, ни претстои да утврдиме. Додека ние размислуваме и се обидуваме да го разбереме проблемот и заканата што тој ја претставува, нашата земја ќе стане жртва на страшен напад од луѓе кои веруваат само во џихад кои немаат расудување и уважување за човечкиот живот“, се вели во писмената изјава на Доналд Трамп во која ја објаснува својата идеја.

Притоа се истакнува дека некои испитувања на јавното мнение, како на Центарот за безбедносни политики, покажуваат омраза на муслиманите кон Американците, што нацијата може да ја доведе во опасност.

Во изјавата се укажува на податоци од социолошко истражување, според коешто „значителен дел од муслиманското население на САД чувствува омраза кон Американците“ и „25 отсто од испитаниците се согласни дека насилството врз Американците е дел од глобалниот џихад“, при што половината од муслиманските испитаници сметаат дека муслиманите во САД имаат право да живеат според шеријатскиот закон.

„Доналд Трамп повикува на општа и целосна забрана за влез на муслиманите во САД, сé додека оние кои ја претставуваат земја не разберат што се случува“, се вели во соопштението објавено од неговата служба за односи со јавноста. Се додава и оти Трамп изразува уверување во својата победа на американските претседателски избори во ноември 2016 година. „Одново ќе ја направиме Америка голема земја“, ветува тој.

Медиумите побарале од предизборниот штаб на Доналд Трамп да прецизира за кои групи точно се однесува предложената забрана за влез во САД, на имигрантите или на туристите и странските студенти. „За сите“, лаконски изјавил портпаролот на кампањата, Кори Левандовски, пренесуваат агенциите.

Белата куќа веднаш реагираше на оваа изјава, нарекувајќи ја „неамериканска“, и појаснувајќи делка таа е спротивна на сите американски вредности, а исто така и спротивна на интересите на националната безбедност.

Невладината организација Совет за американско-исламски односи, пак, го нарече предлогот на Трамп „фашистички“. „Водечкиот претендент на републиканците за претседател издаде соопштение кое во својата суштина е фашистичко. Тоа треба да ги алармира не само американските муслимани, туку и сите Американци“, изјави директорот на организацијата, Ибрахим Хупер.

Според оцените на американските политички коментатори, изјавата на Трамп е најжестоката, според формата и смислата, реакција меѓу политичарите во САД, по трагедијата од 2-ри декември во Сан Бернардино, која двајцата исламски радикализирани сопружници, Саид Ризван Фарук и неговата сопруга Тешфин Малик, вооружени со автоматски пушки го извршија масакрот на божикниот прием во центарот за лица со ментални пречки.

Двајцата беа застрелани по неколку часа во престрелка со полицијата, а истрагата откри дека внимателно го подготвувале нападот, а можеби и поголем, бидејќи во нивниот дом биле откриени елементи за изработка на десетици импровизирани експлозивни направи./крај/мф/сн

Извор: Макфакс