Белиот полицаец кој во сојузната држава Јужна Каролина уби невооружен црнец, експресно е отпуштен од службата и е обвинет за убиство, а жителите на Норт Чарлстон протестираат против најновиот ваков инцидент кој дополнително ги разгоре расните тензии во САД, пренесуваат локалните медиуми.

Полицаецот Мајкл Слагер е обвинет откако во јавноста се појави снимката на којашто се гледа како во саботата тој повеќепати му пукал во грб на Волтер Скот и потоа на рацете му става лисици. Инцидентот наиде на остри осуди, а Федералното биро за истраги FBI и министерството за правосудство покренаа истрага.

„Животите на црниците се важни“, извикувале педесетина демонстранти кои со локалните политичари се собрале пред градскиот совет во Норт Чарлстон. „Повеќе не можеме да седиме со скрстени раце и да молчиме“, изјавила едена демонстрантка. „Нашиот начин да прозбориме е да излеземе на избори“, додала.

Гостувајќи на телевизијата ABC, мајката на убиениот Волтер, Џуди Скот, ја опишала снимката како „најстрашната којашто некогаш ја видела“. „Одвај можев да гледам како син ми беспомошно бега за потоа да биде застрелан. Срцето ми препукна“, изјави. Другите членови на несреќното семејство велат дека сепак се благодарни што снимката дојде до јавноста и дека властите брзо реагирале.

Полицаецот Слегер во средата доби отказ, а началникот на градската полиција Еди Дригерс, изјави дека од гледањето на снимката „му се слошило“.

Запирајќи го автомобилот на Волтер Скот поради рутинска сообраќајна контрола во саботата на 4-ти април, наводно поради неисправност на возилото односно оти не работело штоп светлото, полицаецот започнува препирка. На снимката којашто анонимно лице му ја испратило на весникот The New York Тimes, се гледа како Слегер му пука осум пати во грбот на човек кој трча. Потоа полицаецот мирно доаѓа до возачот Волтер Скот, човек во педесеттите години кој лежи ранет, и му става „лисици“. Скот набргу потоа починал од раните.

На снимката во ниеден момент не се гледа дека убиениот црн маж е вооружен. Полицаецот Слегер тврди, пак, дека по кошкањето, кое се гледа на снимката, Скот претставувал закана за неговата безбедност, бидејќи наводно при кошкањето му го одземал електрошокерот.

Станува збор за најнов случај во серијата на убиства на афроамериканци од страна на бели полицајци во САД во изминатата, и оваа година, како оние во Њујорк, во Фергусон во државата Мисури, како и во Кливленд и Охајо, кои ја поделија тамошната јавност, а во расправата за полициското користење на смртоносното оружје во расните односи се вклучи и самиот американски претседател Барак Обама.

Овие инциденти одвреме навреме го реафирмираат истражувањето од минатото лето на независната информативна непрофитна организација ProPublica кое докажува дека дури 21 пат е поголема веројатноста темнокожите млади Американци да станат жртви на тамошната полиција отколку нивните бели врсници. Соработниците на ProPublica истражувале 1.217 престрелки со полицијата со смртни последици во периодот од 2010 до 2012 година. Притоа, според резултатите од студијата, поголемиот дел од таквите инциденти се однесува на случаи во кои биле инволвирани афроамерикански тинејџери на возраст од 15 до 19 години, односно 31,17 на милион црнци биле убиени во вакви инциденти, наспроти 1,47 на милион белци на споменатата возраст.

Анализата на ProPublica покажува дека станува за многу остра разлика, којашто ја илустрира со тоа дека за да биде еднаков ризикот за двете споредувани групи тинејџери, би биле потребно три години во кои седмично би гинеле дури 185 бели млади луѓе./крај/мф/сн

Извор: Макфакс