Регион
Ципрас за затворањето на банките ги обвини ЕУ и ЕЦБ
Откако Грците во саботата на неговото ненадејно распишување на референдумот за прифаќање или одбивање на предлозите на грчките доверители реагираа со повлекување на готовината од банките, грчкиот премиер Алексис Ципрас во неделата навечер објави дека банките и берзата во понеделник нема да бидат отворени и за тоа ги обвини партнерите во Европската унија и Европската централна банка.
Грчките банки во понеделник ќе останат затворени, и тоа најверојатно ќе трае до крајот на следната седмица, изјави челникот на банката „Piraeus“, Антимос Томопулос во неделата по кризниот состанок на високите грчки владини и финансиски функционери кој беше свикан за да се договорат новите мерки во атмосферата на сé подлабоката финансиска, но и политичка криза во земјата. Одговарајќи на новинарски прашања по состанокот на Советот за финансиска стабилност дали банките ќе отворат во понеделник, Томопулос кус одговори „Не“.
Грчки финансиски извор за Reuters рекол дека во понеделник затворена ќе остане и Атинската берза. Гувернерот на грчката централна банка посочи дека новото соопштение за одлуката ќе биде објавено по состанокот на владата кој се одржа во неделата навечер. Членовите на грчкиот Совет за финансиска стабилност по состанокот не сакаа да кажат никакви поединости за разговорите или евентуално донесените мерки.
Европската унија и Европската централна банка го предизвикаа овој потег, изјави подоцна премиерот Алексис Ципрас и додаде дека не се откажува до референдумот кој е закажан за 5-и јули, следната недела.
„Одбивањето на барањето на грчката влада накусо да ѝ се продолжи траењето на програмата (за надворешна финансиска помош –з.м.), е чин без преседан според европските стандарди и го доведува во прашање правото на суверен народ на одлучување“, рече Ципрас во телевизиското обраќање до нацијата во неделата навечер.
„Поради таа одлука на ЕЦБ, денеска морав да ги ограничам средствата достапни за грчките банки и ја принудив грчката централна банка да предложи затворање на банките и ограничување на износите кои може да се подигнат“, одаде премиерот.
Не кажа колкав период банките ќе бидат затворени, ниту колку ќе трае ограничувањето за движењето на капиталот, но медиумите повикувајќи се на упатени извори велат дека „препораката е тоа да биде шест дена“, односно до референдумот.
Ципрас рече дека новото барање за продолжување на сегашната програма за надворешна финансиска помош која истекува на 30-ти јуни, им го испратил на челниците на еврозоната, на Европската централна банка, на Европската комисија, Европскиот парламент и на Советот на Европската унија.
„Го чекам нивниот итен одговор на основното демократско барање…. Едно е сигурно:одбивањето на кусото продолжување и обидите да се поништи демократската процедура се длабоко навредливи и срамотни за европската демократска традиција“, реле Ципрас и додаде дека задоволувањето на тоа барање бои можело ЕЦБ да ја поттикне повторно да ја осигури ликвидноста на грчките банки.
Од ЕЦБ претходно во неделата, поради остриот скок во подигнувањето на готовината од грчките банки, го замрзна нивното на итната помош за ликвидност достапна за грчките банки. Ципрас рече дека банкарските влогови, платите и пензиите во Грција и натаму се сигурни и ги повика Грците да останат смирени.
Неговиот претходник на премиерската должност сага лидер на опозицијата Антонис Самарас, изјави во неделата дека Ципрас би требало да се откаже од референдумот и да состави влада на националното единство. „Нашата земја треба да остане во срцето на Европа и на еврозоната. Ципрас мора да и продолжи преговорите, Доколку тоа не може да го стори сам, тогаш нека се обиде да добие сенационален консензус“, рече водачот на конзервативците.
Неколку стотици противници на мерките за штедење се собраа во неделата пред зградата на парламентот во Атина и извикуваа пароли против Европската унија и Меѓународниот монетарен фонд. Протестот започна пред на канцеларијата на Европската комисија во грчката престолнина. Центарот на Атина е прекриен со летоци на коишто пишува „Подобро драхмата отколку понижување“ и „Не сме должни, нема да продаваме, нема да платиме“.
Истовремено грчкото министерство за надворешни работи соопшти дека во понеделник од рано утрото министерот Никос Коѕиас ќе има состаноци со амбасадорите на земјите членки на Европската унија, на САД, Русија, Кина и Израел и притоа ја објави сатницата на преговорите.
Шефот на грчката дипломатија има редовни средби со амбасадорите на споменатите земји, но медиумите истакнуваат дека вакви интензивни дипломатски консултации одамна немало. Дипломатски извори додале дека средбите се во врска со најавениот резултати, но оти други детали грчката страна не најавила./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Советот на Европската Унија го усвои планот за раст за Западен Балкан
Советот на Европската Унија денеска даде зелено светло за воспоставување на инструментот за реформи и раст за Западен Балкан.
Ова го претставува финансискиот дел од планот за раст за Западен Балкан, кој на земјите од нашиот регион, вклучително и Србија, им обезбедува шест милијарди евра од буџетот на Европската Унија, две милијарди директна помош и четири заеми.
За да добијат пари, земјите треба да подготват реформски агенди, во кои ќе наведат кои реформи ќе ги спроведат.
Дополнително, предуслови за добивање пари, меѓу другото, се почитување на демократските принципи, слободни и фер избори, медиумски плурализам, независност на судството, владеење на правото.
Дополнителни предуслови имаат и Белград и Приштина, што е видливо поместување во нормализацијата на односите, како и исполнување на обврските што произлегуваат од претходно договорените договори.
Регион
Кинескиот претседател денеска пристигнува во Белград: ќе го чуваат илјадници полицајци
Кинескиот претседател Шји Џјинпинг денеска доаѓа во официјална посета на Белград, а според „Танјуг“, за неговото пристигнување се преземени големи безбедносни мерки, па неговата делегација ќе ја штитат 3.400 полицајци.
Ќе го пречекаат српските ловци „миг-29“, кои ќе го следат неговиот авион од границата, а на аеродромот во Белград во негова чест ќе биде построена стража на војската на Србија.
Покрај автопатот во Белград се поставени кинеското и српското знаме, а пред Палатата „Србија“ ќе биде организиран и свечен пречек на кинеската делегација, броена од 400 луѓе, а планирано е да се потпишат повеќе од 30 договори.
Ќе биде организиран и свечен ручек, кинескиот претседател ќе има можност да дегустира српски јадења и вина, а ќе има и музичка програма на српски и кинески јазик“.
Домаќин на кинескиот претседател ќе биде српскиот претседател Александар Вучиќ.
Шји последен пат беше во Србија во 2016 година, што беше прва посета на претседателот на Кина на Србија по 32 години и по тој повод беше потпишана декларацијата за стратешко партнерство.
Вучиќ се сретна со Шји во октомври минатата година во Пекинг кога беа потпишани 18 договори, меѓу кои и договорот за слободна трговија меѓу Србија и Кина, кој набргу треба да стапи во сила.
Ова е прва посета на претседателот Шји на Европа во последните пет години од избувнувањето на пандемијата на Ковид-19, а за време на оваа европска турнеја тој ќе посети само три европски престолнини – Париз, Белград и Будимпешта.
Петдневната турнеја ја почна со посета на Франција на 5 мај, во Белград доаѓа на 7 мај, а потоа ќе ја посети Будимпешта.
На последната средба меѓу кинескиот и српскиот претседател во октомври минатата година во Пекинг, покрај договорот за слободна трговија, беа потпишани и неколку билатерални документи, како оние за полициска соработка во управувањето со вонредни ситуации, изградбата на патишта, индустриски парк, извоз на јаболка, дигитализација.
Регион
„Албанијан пост“: Франција побара Советот на Европа да ја одложи одлуката за членство на Косово
Франција испрати демарш до земјите-членки на Советот на Европа со барање за одложување на одлуката за прием на Косово во Советот на Европа поради неисполнување на обврската за формирање на Заедницата на српските општини, објави порталот „Албаниан пост“, повикувајќи се на дипломатски извори.
Денеска во Стразбур треба да се одржи последниот состанок на амбасадорите пред состанокот на министрите, кои на 16 и 17 мај треба да ја донесат конечната одлука за прием на Косово во оваа меѓународна организација, пишува медиумот.
Порталот наведува дека според нивните сознанија, амбасадорите на земјите членки на Советот на Европа нема да го стават прашањето за членството на Косово на дневен ред на мајскиот министерски состанок.
Причината е што Косово нема преземено никакви чекори кон формирањето на Заедницата на српските општини.
Агенцијата „Бета“ во понеделникот објави дека објавената агенда на состанокот на Комитетот на министри на Советот на Европа, што ќе се одржи на 16 и 17 мај, укажува дека нема да се донесе одлука за Косово.
„Иако германската позиција до сега не беше јасна, сега се чини јасно дека и Германија зазема став дека владата на Курти мора да преземе конкретни чекори во однос на Асоцијацијата за да добие членство во Советот на Европа. Франција, Германија и Италија веќе се на мислење дека членството на Косово во Советот на Европа може да се одложи до моментот кога Владата на Косово ќе ја докаже својата посветеност на имплементацијата на Асоцијацијата со испраќање нацрт до Уставниот суд“, објави „Албаниан пост“.
Порталот додава дека ваквиот пристап не бил поддржан од Велика Британија, која смета дека прашањето за Заедницата на српските општини не треба да се меша со членството во Советот на Европа.
„И покрај епилогот од состанокот, постои техничка можност Косово да биде на дневен ред неколку дена пред министерскиот состанок. Јасно е, меѓутоа, дека тоа нема да се случи во отсуство на видлив напредок кон имплементација на Асоцијацијата од страна на Курти“, заклучува албанскиот портал.
Францускиот претседател Емануел Макрон и косовскиот премиер Албин Курти телефонски разговараа на 23 април. Како што соопштија од кабинетот на Макрон, францускиот претседател го повикал Курти за целосно спроведување на бриселските и охридските договори.
„Сепак, и во контекст на барањето на Косово за членство во Советот на Европа, тој ја подвлече важноста што Франција ја придава на брзиот и неповратен напредок во спроведувањето на Заедницата на општини со српско мнозинство“, објави француското претседателство во соопштението.