„Зоран Заев бега од избори. Бега од соочување со граѓаните затоа што е свесен дека власта е заглавена во криминал, корупција и во мегаскандалот ‘Рекет’. Тоа што избегнува отчет пред народот не е ново, го видовме и во 2016 кога двапати одложуваше избори. Но, сега Заев се крие од своите сограѓани затоа што знае дека поразот ќе биде катастрофален“, изјави Игор Јанушев, генерален секретар на ВМРО-ДПМНЕ.

Според него, политиките во здравството, образованието, културата доживуваат крах. Економијата е во агонија и доцниме не само во споредба со Европа туку и во споредба со земјите од регионот.

,,Животот што го ветуваше се претвори во бесперспективност и затоа забрзано Македонија се празни. Ветувањата за кои се пенавеше во кампањите останаа обични лаги. Владата на Заев ќе биде запаметена како најнеспособната Влада во историјата на Република Македонија, која не може да го оствари ни тоа што самата го проектира. Тоа што се неспособни – граѓаните може и ќе им го простат, ама тоа што се штетни за Македонија, тоа никој не може да им го прости, па дури и повеќето од нивните поддржувачи.

Го погазија достоинството и на граѓанинот и на државата и дрско продолжуваат да му ја потценуваат интелегенцијата на чесниот народ. Капак на сето ова е криминалот во кој се фатени 100:0. На дело видовме дека власта на СДСМ креирала рекетарско-обвинителско-политички октопод, кој тргува со правдата, креира и монтира обвинителски акти, за потоа уценува, изнудува и игра мајтап со правната држава. Нема правда, нема мир – беше мотото што многу бргу го заборавија и наместо тоа, инсталираа Луј Витон-правосудство, кое има цел да го штити криминалот на власта, а истовремено да ги гони политичките неистомисленици на Заев. Правдата ја претворија во политичка маша во рацете на Заев, која згора на сè уште ја користат за земање милионски суми рекет.
Ова не е ни процент од криминалите, скандалите и катастрофалните чекори на оваа власт на Зоран Заев и однародената елита околу него. Ова е само врвот од сантата мраз. Секој ден излегува нова вистина за криминалот на власта исто како што секој ден Македонија тоне сè подлабоко и подлабоко со нив. Затоа, Заев, ајде на избори!, рече тој.

Според Јанушев, избори се неопходни што побргу затоа што тоа ѝ треба на Македонија. Да се формира техничка влада, во согласност со законот за да се овозможи фер и демократски избори, а истовремено да се заштити изборниот процес од спринтереските полнења кутии и злоупотребата на власта. Стравот на СДСМ и Заев е очигледен бидејќи поразот ќе биде неминовен.

„Тоа што Заев и власта се храбрат самите себе со нарачани анкети и анализи не им поминува ниту кај нивното членство. Но, еве ако Заев се охрабрил од таквите мерења, нека повели и нека излезе на соочување на избори. Заев, да одиме на избори! Иднината на оваа држава стана заложник на криминалот на оваа власт и колку побргу ќе се ослободи, толку побргу ќе се тргне сидрото наречено Заев и Македонија ќе тргне напред. Стандардот на граѓаните, благосостојбата на младите, земјоделците, работниците и стопанствениците и на пензионерите е можна само со обнова на Македонија, која ќе почне токму со деинсталирање на Заев“, додаде тој.