Седумгодишното владеење на СДС и ДУИ остави трајни последици во функционирањето на системот. Постепено и систематски тие ја уништуваа секоја пора на општественото живеење, воспоставувајќи нов систем на криминал и корупција, велат од ВМРО-ДПМНЕ.

„Како еден од секторите кој најмногу настрадал од ова седум годишно владеење се судството. Седум години по ред судии и обвинители, како на кастинг, се бираа во Струмица, директно од Зоран Заев.

Сега истите тие луѓе на Заев сместени во судско обвинителските фотелји делат неправда или пак истата ја распродаваат.

Всушност, ова и не треба да не изненадува, затоа што Заев ни најави дека ќе го отвори судството како пупка.

И сега, ова правосудство со луѓето на Заев е отворено, баш како неговите најавени пупки.

Најнови во низата кои го потврдуваат ова се членовите на Судскиот совет. Тие пред некој ден заседаваа и донесоа одлука со која што оправдуваат одлука на судија, кој донел пресуда од две години затвор за возач кој усмртил млада девојка која прописно поминувала на пешачки.

Ова расцветано судство по примерот на пупките на Заев влева недоверба и ја убива надежта кај граѓаните дека е можна правда во Македонија, затоа што за нив одземен млад живот на пешачки премин вреди само две години затвор, а за украдени ќебапи пресудува пет години.

Токму ваквите непромислени и од јавноста неоправдани постапки одлуки на членовите на Судски совет, беа причината поради која на нив им беше изгласана недоверба од пратениците во македонското Собрание.

Сите овие членови во Судскиот совет се луѓе на Заев кои се бирани во време на владеењето на СДС и ДУИ. И истите овие, наместо да поднесат оставки по изгласаните интерпелации, тие продолжуваат да делат и да оправдуваат неправдата, газат врз правдата и со тоа ја уриваат и уништуваат државата.

Но, на сето ова мора да му дојде крајот. Одговорност треба да има и овој гнил правосуден систем мора ќе падне. На државата и граѓаните им треба правосуден систем составен од лица со висок морален кредибилитет кои ќе работат исклучиво во нивен и во интерес правдата“, пишува во соопштението на ВМРО-ДПМНЕ.

Денеска во 12:30 часот ќе се одржи протест за Крива Река. Маршот ќе почне пред Министерството за животна средина и просторно планирање, а ќе заврши пред Пред Државниот инспекторат за животна средина.

Од Зелен Хуман Град велат „институциите што требаше да ја спречат и превенираат хаваријата во рудникот Тораница не само што дозволија таа да се случи, туку и затаија“.

„И кога надлежните затајуваат, од кого да очекуваме веродостојни и итни информации за квалитетот на водата од која се наводнуваат посеви и се напојува добиток? Сите сме загрозени! Да не беше риболовниот клуб „Мрена” да земе мостра уште истиот ден на лице место, денес воопшто немаше да знаеме колку и со што е затруена Крива Река! Веќе не е важно дали си независен, партиски поддржувач, активист, апатичен, млад, стар, жена, маж, дете, куче, риба или птица. Важно е дека сите пиеме иста вода, дишеме ист воздух и јадеме храна од истата загадена почва. И сите ќе ја платиме цената“, стои во објавата на ФБ.

На протестниот марш ќе упатат неколку барања:

• Објавување на сите извештаи и анализи од Државниот инспекторат за животна средина;
• Истрага за службените пропусти при надзорот од Државниот инспекторат за животна средина;
• Истрага на Државниот инспекторат за техничка инспекција, и дополнително:
— Државен инспектор за геологија: задолжен за извештаи за преглед и испитување на опремата и орудијата за работа;
— Државен рударски инспектор (член 103 од Законот за минерални суровини): задолжен за контрола на исправноста на опремата и постапките во рударството;
— Државен инспектор за опрема, производи и постројки (член 104): задолжен за водење евиденција за техничките карактеристики, испитувања, одговорни лица, состојбата и безбедноста;
• Конкретни мерки за спречување на понатамошно загадување;
• Обврска за транспарентност и достапност на сите информации што се од јавен интерес во најкус можен рок.

„Секој молк е дозвола за нова хаварија. Секој од нас кој молчи и не бара одговорност и отчетност од надлежните институции за нивната работа, практично застанува на нивна страна и им ја поклонува платата. Не биди еден од нив“, се наведува во објавата на Зелен Хуман Град.

Предметот за загадување на Крива Река во Крива Паланка го презема Основното јавно обвинителство за гонење на организиран криминал и корупција.

Времето денеска ќе биде променливо облачно со повремен локален дожд.

Според информациите од УХМР, ќе дува умерен, а долж Повардарието и во источните делови засилен ветер од северен правец над 70 километри на час.

Минималните температури ќе се движат од 2 до 8, а максималните од 10 до 20 степени.

Во Скопје, променливо облачно со повремен дожд. Ќе дува умерен, повремено засилен ветер од северен правец. Минималната температура во главниот град ќе биде 6, а максималната 18 степени.