Македонија
„Титаник”: Илија Димовски бара увид во доказите и во писмото на Катица Јанева
Илија Димовски, обвинетиот пратеник во предметот „Титаник” на СЈО, рече дека сите обвинети во предметот мора да имаат увид не само во доказите туку и во списите на предметот, алудирајќи на увид во писмото на Катица Јанева. Тој побара одговор за правната основа за застапување на предметот од Обвинителството.
Димовски праша и каде е заснован работниот однос на обвинителката Лиле Стефанова и дека според нивните информации таа сè уште е обвинител од СЈО, а разрешената јавна обвинителка Катица Јанева е осомничена во истрагата „Рекет”.
Во однос на овластувањата од Љубомир Јовески, Димовски ја претпостави следната ситуација: ,,Тоа значи дека може Џафери без предлог од премиерот и гласање од пратениците да достави јавно овластување за министер за внатрешни работи за лице за кое тој мисли дека треба да му го додели”, рече Димовски.
„Судот треба да запре со оваа постапка до давање одговор на овие прашања, во врска со минимим две начела: економичност на постапката и заштита на правата на обвинетите”, дополни Димовски.
Покрај Никола Груевски во предметот ,,Титаник”, во предметот обвинети се и Билјана Бришковска-Бошковски, Мартин Протоѓер, Илија Димовски, Миле Јанакиески, Гордана Јанкулоска, Едмонд Темелко, Кирил Божиновски, двајца од Агенцијата за разузнавање: Киро Тодоровски и Мунир Пепиќ, како и уште 11 други лица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
100 санкционирани возачи во Скопје
Секторот за внатрешни работи Скопје во текот на вчерашниот ден продолжи со контролите во областа на сообраќајот.
„На територија на град Скопје изречени се вкупно 100 мерки, меѓу кои за возење без возачка дозвола 14 санкции, 12 мерки за користење мобилен телефон при возење, пет санкции за некористење сигурносен појас…“, велат од МВР.
Од таму додаваат дека сообраќајните контроли продолжуваат и во наредните денови.
Македонија
„Доколку ДПМНЕ добие преголема моќ ќе се стави крај на европските перспективи, независните медиуми и независното судство“, вели СДСМ
„Потребен е силен СДСМ во Собранието, да не се дозволи повторно инсталација на режим од страна на ДПМНЕ и играње со иднината, стабилноста и безбедноста на државата“, вели СДСМ.
„Доколку десничарска партија како ДПМНЕ добие преголема моќ, извесно е дека ќе се стави крај на европските перспективи, независните медиуми и независното судство.
Тоа ќе значи враќање назад повеќе од 20 години.
Поддршка за СДСМ и обединување на сите прогресивни сили во земјата е единствениот начин да се спречи повторно режим“, соопшти СДСМ.
Македонија
Пендаровски по повод Светскиот ден на слобода на медиумите: Да имаме доблест да ја прифатиме критиката и да ја поддржиме слободата на изразувањето
Претседателот Стево Пендаровски упати порака по повод 3 Мај − Светскиот ден на слобода на медиумите.
„Слободата на медиумите е еден од темелите на демократските вредности и е од суштинско значење за демократскиот развој на македонското општество.
Квалитетните, професионални и независни новинари, коишто ја сфаќаат сериозноста и тежината на креирање на јавното мислење, можат да претставуваат силен глас на јавноста.
Затоа мора да продолжиме да вложуваме во воспоставувањето стандарди со кои медиумите ќе можат слободно и независно да работат и да се развиваат. Да градиме атмосфера во која медиумските работници ќе се чувствуваат безбедно и заштитено. Да имаме доблест да ја прифатиме критиката и да ја поддржиме слободата на изразувањето. Само така ќе имаме моќни и силни медиуми и новинари коишто ќе бидат објективни во известувањето и ќе ѝ служат на јавноста, а не на политичките елити и на изворите на финансирање. На сите медиумски работници им го честитам Светскиот ден на слобода на медиумите“, порача претседателот Пендаровски.