Македонија
Бугарија, Грција, Романија и Хрватска со заедничка порака: Северна Македонија и Албанија да ги почнат преговорите со ЕУ

Силна поддршка за членството на Албанија и Северна Македонија во Европската Унија пристигна од министрите за надворешни работи на Бугарија – Екатерина Захариева, Грција – Никос Дендиас, Романија – Рамона Манеску и Хрватска – Гордан Гурлиќ, за време на сесијата на Генералното собрание на ООН.
Четворицата први дипломати на балканските земји на ЕУ ја разгледаа европската интеграција на нивните шест соседи, кои сè уште се надвор од Унијата и ги идентификуваа прашањата за реформите во секоја од овие земји и како тие би можеле да бидат поддржани, соопшти бугарското Министерство за надворешни работи.
„Убедени сме дека ќе бидеме побезбедни, попросперитетни и побогати само доколку сите наши соседи станат членки на Европската Унија“, рече Екатерина Захариева пред своите колеги. Таа им заблагодари на Романија и на Хрватска за продолжување на приоритетите на бугарското претседателство на Советот на ЕУ .
„Бугарија потпиша договор за пријателство со Република Северна Македонија и договореното треба да се спроведе. Албанија треба да го спроведе законодавството што го донесе. Бугарија го поддржува започнувањето на преговорите за членство со двете земји“, рече Захариева.
Првиот човек на грчката дипломатија, Никос Дендиас, подвлече дека ги поддржува Албанија и Република Северна Македонија за членство во ЕУ, а слична порака упати и романскиот министер за надворешни работи, Рамона Манеску. Таа рече дека Бугарија, Грција, Романија и Хрватска треба да продолжат да ги координираат своите активности во политиката на проширување.
„Ние мора да ги поддржиме соседите и да продолжиме со посветеноста со која Бугарија го водеше овој процес за време на нејзиното претседателство. Раздвојувањето на Албанија и Република Северна Македонија ќе биде голема грешка и мислам дека дојде време за позитивен сигнал“, додаде Рамона Манеску.
„Ние ги поддржуваме и Албанија и Република Северна Македонија во нивниот европски пат. Ние сакаме сите земји во регионот да живеат како добри соседи “, рече хрватскиот министер за надворешни работи, Гордан Гурлиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Европскиот суд на ревизори ја започна мисијата во земјава со средба со министерот Муртезани

Министерот за европски прашања и национален координатор за ИПА (NIPAC), Орхан Муртезани, утрово оствари средба со претставниците на Европскиот суд на ревизори, Бертран Танги и Ерик Котларик, во рамки на нивната ревизорска мисија за успешноста на Инвестициската рамка за Западен Балкан (WBIF).
Во фокусот на дискусиите беше координацијата во транспортниот сектор во рамки на WBIF, како и поширокиот институционален и оперативен контекст за имплементација на проектите поддржани преку овој инструмент. Министерот Муртезани го истакна значењето на WBIF како стратешки механизам кој овозможува инвестирање во клучни сектори како што се транспортот, енергијата, животната средина, здравството и образованието, но и како алатка што ќе овозможи користење на средствата што ЕУ ќе ги додели по спроведувањето на реформите во рамки на Реформска агенда 2024-2027 и Инструментот за раст и реформи, известува Министерството за европски прашања.
Во разговорите беше потенцирана потребата од натамошно поедноставување на процедурите, зголемување на транспарентноста и јасноста во однос на улогите на меѓународните финансиски институции, како и зајакнување на капацитетите на НИПАК канцеларијата, особено во делот на мониторингот и координацијата. Исто така, беше посочено дека за успешно искористување на достапните средства до крајот на 2027 година, од суштинско значење ќе биде навремената подготвеност на проектите и нивното усогласување со реформските приоритети.
Министерот Муртезани ја потврди заложбата на Владата за ефективно управување со инвестициите поддржани од инструментот Инвестициска рамка за Западен Балкан, кој е заедничка иницијатива на Европската комисија, билатерални донатори и меѓународни финансиски институции. Тој потенцираше дека Северна Македонија останува конструктивен партнер во процесите на регионална соработка и европска интеграција, со посветеност кон создавање предвидлива и стратешка рамка за користење на фондовите од ЕУ.
Средбата со министерот за европски прашања и национален координатор за ИПА (NIPAC), Орхан Муртезани, е прва во низата состаноци што ревизорскиот тим ќе ги реализира неделава, со надлежните институции во текот на својата мисија во земјата, се додава во соопштението.
Македонија
Сиљановска-Давкова во Тирана на самитот на шефови на држави и влади на земјите од ПСЈИЕ

Претседателката Гордана Сиљановска-Давкова од денеска престојува во работна посета на Тирана, Албанија каде што ќе учествува на Самитот на шефови на држави и влади на учесниците во Процесот за соработка во Југоисточна Европа (ПСЈИЕ).
Таа ќе се обрати на пленарната сесија на тема: „Поттикнување на стабилноста и просперитетот преку регионална соработка и интеграција во ЕУ“, како и на заедничката прес-конференција со албанскиот и со бугарскиот претседател, Бајрам Бегај и Румен Радев, во својство на претседатели на државите коишто се претходен, актуелен и иден претседавач со Процесот за соработка во Југоисточна Европа.
Домаќин на Самитот е албанскиот претседател Бајрам Бегај. Покрај македонската претседателка Сиљановска-Давкова, предвидено е да учествуваат: претседателката на Словенија, Наташа Пирц Мусар; претседателот на Црна Гора, Јаков Милатовиќ; претседателката на Косово, Вјоса Османи Садриу; претседавачката со Претседателството на БиХ, Жељка Цвијановиќ; претседателот на Бугарија, Румен Радев; претседателот на Владата на Србија, Ѓуро Мацут, како и заменик-претседателот на Владата и министер за надворешни работи на Молдавија, Михаи Попсои.
На Самитот ќе учествуваат и министрите за надворешни работи: на Турција, Хакан Фидан, на Грција, Јоргос Герапетритис; на Романија, Емилиан Хоратиу Хурезеану; државниот секретар во Министерството за надворешни и европски работи на Хрватска, Фрањо Матушиќ; генералниот секретар на Регионалниот совет за соработка, Амер Капетановиќ и шефот на делегацијата на ЕУ во Тирана, Силвио Гонзато.
Во рамки на работната посета на Албанија, Сиљановска-Давкова во Тирана ќе оствари средба со претставници на македонското национално малцинство во Албанија, на Македонската алијанса за европска интеграција, на македонското друштво „Илинден“ – Тирана, како и со македонски дипломати и професори.
Македонија
Ѓорѓиевски: Бесплатно летување за најуспешните спортисти

Градоначалникот на Кисела Вода, Орце Ѓорѓиевски извести дека и оваа година продолжуваат со успешната пракса на наградување на младите спортски таленти со бесплатно летување, како дел од стратегијата за поддршка на спортот и здравиот начин на живот.
„Победниците во Лигата на училишен спорт, која опфаќа натпревари во кошарка, фудбал, одбојка и ракомет во машка и женска конкуренција, ќе имаат можност да летуваат во Извидничкиот Центар во Охрид.
Се работи за прваците за учебна 2024/2025 во:
ракомет – жени ООУ ,,Кузман Шапкарев”;
ракомет – мажи ООУ ,,Кирил Пејчиновиќ”;
кошарка ООУ ,,Кузман Ј. Питу”;
одбојка ООУ ,,Партенија Зографски”
фудбал ООУ ,,Кирил Пејчиновиќ”
Спортот ги подобрува физичкото и менталното здравје на децата, но создава и другарства, дисциплина и тимски дух. Со обезбедување бесплатно летување не само што ги наградуваме нивниот труд и посветеност, туку и дополнително ја поттикнуваме спортската култура во училиштата.
Ова е дел од нашата стратегија за поддршка на младите и како општина ќе продолжиме со мерки што ќе овозможат уште поголема афирмација на спортот и негов развој во нашите училишта“, напиша на својот фејсбук профил градоначалникот на општина Кисела Вода, Орце Ѓорѓиевски.