Свет
Италијанец посвои бебе со Даунов синдром, кое не сакале да го згрижат 20 семејства
Лука Трапанесе е хомосексуалец, католик и самохран татко, навикнат да ги крши воспоставените социјални норми. Тој честопати гостувал на телевизиски емисии за да разговара за посвојување деца кај геј-популацијата. Живее во италијанскиот грaд Неапол и медиумите за него се заинтересираа кога се одлучи да посвои едномесечно девојче со Даунов синдром, кое 20 семејства претходно одбиле да го згрижат.
Тој вели дека едноставно сакал семејство. Кога слушнал дека малата Алба одбиле да посвојат 20 семејства, одлучил тој да ја преземе грижата за неа, пренесува Upworthy.com. Иако многумина сметаат дека идејата да се грижи за дете со пречки во развојот е предизвик, Лука го отвори срцето без двоумење и ѝ подарил дом на малата Алба. Тој знаел колку е тешко да се живее со болеста за што станал свесен уште во раното детство кога на неговиот најдобар пријател му бил дијагностициран карцином.
„Кога имав 14 години, на мојот најдобар пријател Диего му открија дека има карцином во терминална фаза. Решив дека никогаш нема да го напуштам. Јас дури и отидов во болница со него, му помагав во домашните задачи и секогаш бев таму кога му требаше“, изјави Лука за Би-би-си. „Поради неговата смрт, сфатив што значи да се живее со болест. Затоа, почнав да волонтирам во црква во Неапол за да им помогнам на сериозно болните луѓе и на децата со посебни потреби“, раскажува тој.
Пред неколку години, по раскинувањето на долгогодишната врска со својот партнер, Лука одлучил да стане родител. Но, во Италија во тоа време сам маж не можел да посвои дете. Во почетокот на 2017 година законот се сменил и тој, конечно, беше во можност да се пријави како посвоител. Иако му било кажано дека ќе може да добие само дете со попреченост или сериозно заболување, Лук бил среќен што ќе стане родител.
,,Во јули 2017 година ме повикаа од судот. Ми рекоа дека имаат девојче за мене. Нејзиното име е Алба и има само 30 дена. Имаше Даунов синдром, а нејзината биолошка мајка ја напуштила. Покрај тоа, уште 20 семејства одбиле да ја посвојат. Веднаш се согласив. Побрзав во болницата за да ја земам. Таа беше толку мала во креветчето. Штом ја зедов во рацете, ме преплави радост. Веднаш ја доживеав како моја ќерка. Првпат во животот во рацете држев новороденче. Пред тоа секогаш се плашев да допрам мало дете, но кога првпат ја зедов Алба в раце, знаев дека сум подготвен да станам нејзин татко“, раскажува Лука.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
(Фото) Страшни поплави во Непал: најмалку 100 загинати, десетици исчезнати
Најмалку 100 лица загинаа во поплавите во Непал, додека 67 лица се водат како исчезнати, јавија денеска локалните медиуми.
Одрони и поплави предизвикани од дводневниот силен дожд во оваа хималајска земја, локалните власти наредија затворање на училиштата на три дена, пренесува Ројтерс.
Поплавите го парализираа сообраќајот и секојдневните активности во долината Катманду, а три автопати, вклучително и клучниот пат Притви што го поврзува Катманду со остатокот од земјата, се блокирани од лизгање на земјиштето, изјави портпаролот на Министерството за внатрешни работи на Непал, Риширам Тивари.
– Автобускиот сообраќај на патиштата е забранет во текот на ноќта, а на возачите им се препорачува да не излегуваат на пат. Дождот се очекува да продолжи до крајот на викендот – изјави Тивари, пренесе АП претходно.
Делови од Катманду беа целосно поплавени, како и многу куќи, поради што жителите беа принудени да се засолнат на последните катови од нивните станбени згради, а непалските безбедносни сили беа ставени во состојба на готовност.
Свет
Израелската армија изведува десетици напади врз Либан по атентатот на моќниот лидер на Хезболах
Израелската армија денеска соопшти дека извршува десетици напади врз Хезболах во Либан, два дена по убиството на моќниот лидер на таа проиранска организација Хасан Насрала во воздушен напад врз јужните предградија на Бејрут.
Израелската авијација „нападна десетици терористички цели на либанска територија во изминатите неколку часа“, изјави воениот портпарол на Телеграм.
Од саботата, израелската војска „погоди стотици терористички цели низ Либан“, додаде портпаролот.
Тој наведе дека во тие напади на мета биле местата од кои се истрелуваат ракети кон Израел, воени постројки и магацини за оружје.
Шиитската организација Хезболах, сојузник на палестинскиот Хамас кој војува против Израел во Газа, ја потврди смртта на водачот Насрала во саботата во невиден израелски напад врз упориштето на групата.
Смртта на човекот кој важеше за најмоќен во Либан е голема победа на Израел против Иран и неговите сојузници, а премиерот на Израел Бенјамин Нетанјаху оцени дека се расчистени сметките со лицето одговорно за убиството на безброј Израелци и многу граѓани на други земји.
Нетанјаху тврди дека Израел стигнал до она што се чини дека е историска пресвртница во борбата против своите непријатели.
Либан, Сирија и Иран прогласија неколкудневна национална жалост по смртта на Насрала, пишува Франс прес.
Првиот потпретседател Мухамед Реза Ареф се закани дека убиството на Насрала ќе доведе до уништување на Израел.
Во саботата Техеран го повика состанокот на Советот за безбедност на ОН да преземе итни и решителни мерки за да се запре израелската агресија и да се спречи вовлекување на регионот во општа војна.
Според соопштението на израелската војска, командантот на јужниот фронт на Хезболах Али Караке и други функционери биле убиени заедно со Насрала во операцијата наречена „Нов поредок“. Извор близок до Хезболах ја потврди смртта на Караке.
Иранската новинска агенција ИРНА објави дека Абас Нилфорушан, заменик-лидерот на иранската револуционерна гарда, исто така бил убиен во нападот во петокот.
Шеесет и четиригодишниот Насрала, кој го водеше Хезболах од 1992 година, беше религиозен човек кој живееше криејќи се и ретко се појавуваше во јавноста.
Неговиот братучед, Хашем Сафидин, истакната личност во Хезболах, се чини дека е негов потенцијален наследник.
Нападот врз Насрала беше многу софистициран и покажува не само огромни технолошки способности, туку и степенот на израелска инфилтрација во Либан, рече Џејмс Дорси, истражувач во Институтот за Блискиот Исток на Националниот универзитет во Сингапур.
„Њујорк тајмс“ пишува дека од крајот на Втората либанска војна во 2006 година, Израел изгради моќен разузнавачки апарат кој длабоко навлезе во Хезболах.
Израел наводно испратил тајни командоси длабоко во Либан за да извршуваат разузнавачки мисии.
Како што изјавија за весникот неименувани официјални лица, Израел се разликува од разузнавачките агенции и единици во другите земји во однос на неговата подготвеност да ги изврши овие смели мисии.
Во нападот на јужните предградија, според фотограф на францускиот печат, биле уништени неколку згради, а илјадници жители биле принудени да избегаат. Според либанските власти, загинале најмалку шест лица.
Во саботата, 33 лица загинаа во Либан. и 195 повредени, соопшти синоќа локалното Министерство за здравство.
И покрај тешките напади на Израел, Хезболах во саботата соопшти дека истрелал ракети на израелска територија, од кои повеќето биле пресретнати.
Свет
„Никогаш не сум видела толку луѓе без покрив над главата“ – ураган го опустоши југоисточниот дел на САД, најмалку 64 лица загинаа
Поројните дождови од ураганот Хелена оставија голем број луѓе без домови ширум југоисточниот дел на Соединетите држави, а во тек е расчистување откако силната бура однесе најмалку 64 животи, предизвика голема штета и остави милиони без струја.
– Никогаш не сум видела толку луѓе без покрив над главата како сега – изјавила Џаналија Ингланд, жителка на Флорида, пренесува АП.
Ураганот Хелена се спушти во регионот Биг Бенд на Флорида во четвртокот вечерта како ураган од четврта категорија со ветрови до 145 милји на час.
Невремето продолжи да се движи низ американската држава Џорџија, а потоа низ Јужна и Северна Каролина и Тенеси. Западниот дел на Северна Каролина беше отсечен од одрони од кал и поплави кои ги затворија автопатот 40 и другите патишта.