Македонија
10 милиони евра грант за пречистителна станица во Скопје
Забрзувањето на европските интеграции носи позитивни економски резултати. Вчера, на самитот на „Економист“ во Скопје, регионалниот директор на ЕИБ, Матео Ривелини, најави дека ѝ се доделува грант од 10 милиони евра на Република Северна Македонија за пречистителна станица во Скопје.
Парите наменети за пречистителната станица доаѓаат во време кога земјава ја очекува одлуката за почеток на преговорите за влез во Европската Унија, што се толкува како потврда за реформскиот процес во економскиот сектор.
Вицепремиерот Кочо Анѓушев на панелот на „Економист“ ја посочи недвосмислената заложба дека Владата нема да отстапи од патот на реформите и владеење на правото како гаранција за сигурност на стопанството и инвестициите.
„Стремежот на секоја влада е раст и развој на економијата, а тоа е возможно само доколку се обезбедат стабилноста на државата и владеењето на правото преку што се обезбедува сигурност во направените инвестиции. Со веќе извесното полноправно членство во НАТО и очекуваната препорака за почнување на преговорите за членство во ЕУ, се обезбедува потполна политичка стабилност на Северна Македонија, која ќе се рефлектира со дополнителни позитивни резултати во економијата и повисок животен стандард на граѓаните“, изјави Анѓушев, кој посочи дека токму за да може инвеститорите да чувствуваат сигурност во нивните инвестиции, Владата го донесе Законот за финансиската поддршка на инвестициите, со што е овозможено транспарентна и еднаква поддршка на домашните и странските инвеститори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Забрана за камиони на неколку патни правци поради врнежи од снег
Сообраќајот на државните патишта се одвива во зимски услови, по влажни коловози, на повисоките места, во западните делови од државата со мали остатоци од кашест снег на коловозот, извести АМСМ
Врнежи од снег со променлив интензитет се бележат на Попова Шапка, во Маврово и на планинскиот премин Стража. На планинскиот премин Буково врнежите се од дожд и снег.
Поради врнежи од снег воведена е забрана за сообраќај за тешки товарни возила на патниот правец Гостивар – Кичево преку планинскиот премин Стража, како и на патниот правец крак Маврово – Дебар.
На патниот правец Тетово – Попова Шапка е воведена забрана за сообраќај за автобуси, а за останатите видови на возила задолжителна е употреба на зимска опрема.
Македонија
Делови од Илинден, Ѓорче Петров и Кисела Вода денеска без струја
Од ЕВН Македонија АД известуваат дека поради зафати во електродистрибутивната мрежа, денеска без електрична енергија ќе останат:
· во периодот од 08:30 до 13:00 часот дел од улицата 19 во населба Илинден, oпштина Илинден;
· во периодот од 08:30 до 14:00 часот дел од корисниците во населба Волково, поточно улиците: 95, 100, 101, 102 и 103, општина Ѓорче Петров;
· во периодот од 08:30 до 14:30 часот дел од корисниците на улицата Јустинијан Први во село Драчево, поточно делот од Маркет – Вајота кон село Студеничани, општина Кисела Вода;
· во периодот од 09:00 до 14:00 часот дел од улицата Герника, општина Кисела Вода.
Македонија
Дел од Центар денеска без вода
Од ЈП Водовод и Канализација известуваат дека денеска поради изведување на водоводен приклучок ф-125мм на улицата Светозар Марковиќ бб, прекинато водоснабдување ќе имаат корисниците на дел од улицата Светозар Марковиќ и дел од булеварот Кочо Рацин, вклучително и објектот на Веро Џамбо, општина Центар.
Водоснабдувањето ќе биде прекинато од 09:00 часот до завршување со работните активности.

