Македонија
Дескоска: Праведно е да се отворат преговорите, од заробена држава станавме држава со чиста препорака

Министерката за правда, Рената Дескоска, денеска, во Тирана, на конференција на високо ниво, со наслов It’s all about Justice, изјави дека е праведно да се отворат преговорите за Република Северна Македонија.
„Потврда на реформите и постигнатите резултати е позитивниот извештај на Европската комисија за 2019 година и добиената чиста препорака за почнување на преговорите. Комисијата ја наведе нашата земја како позитивен и светол пример за другите земји. Поглавјето 23 е оценето како Поглавје во кое се бележи добар напредок. Севкупно, напредокот во владеењето на правото е најдобро оценет во споредба со другите држави од регионот“, потенцира Дескоска.
Таа се осврна на периодот што го помина Република Северна Македонија и наодите во меѓународните извештаи во кои земјата ја носеше придавката заробена.
„Од заробена држава за неколку години станавме држава со чиста препорака“, истакна министерката за правда.
Како дополнителна потврда за успехот на земјата во исполнувањето на европските стандарди, Дескоска ја наведе соработката со Венециската комисија, која оцени дека правилната имплементација на законите од областа на судството може да обезбеди независност и ефикаснот на судството.
Според министерката Дескоска, добрососедските односи постигнати со договорот со Република Бугарија и со договорот со Република Грција за решавањето на спорот за името, се само дел од низата успеси што ги оправдуваат нашите очекувања да добиеме датум за почеток на преговорите.
Дескоска наведе низа закони што Министерството за правда ги има донесено за исполнување на европските стандарди во правосудството и дека токму тоа е клучното постигнување на државата.
На конференцијата учествуваат министрите за правда од Западен Балкан, претставници на граѓанските организации и експерти што работат во областа на владеење на правото. Покрај министрите за правда, на конференцијата учествуваше и премиерот на Република Албанија, Еди Рама.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.
Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.