Свет
Италијанците најмногу му веруваат на Матео Салвини
Една неодамнешна анкета покажа дека поранешниот министер за внатрешни работи и актуелен лидер на десничарската популистичка партија Лига, Матео Салвини, ужива најголема доверба кај народот меѓу италијанските политичари, пренесува „Ил џорнале“.
Салвини е на врвот на списокот најдоверливи политичари во Италија, при што 39 отсто од испитаниците му изразиле поддршка. Тој сега води пред италијанскиот премиер Џузепе Конте, кој има поддршка кај 35 отсто од италијанската јавност. Лидерката на десничарската партија Браќата на Италија, Џорџа Мелониле, се најде на третото место со 29 отсто анкетирани кои ѝ веруваат.
Анкетата спроведена од „Агора“, италијанско шоу за актуелни случувања, исто така покажа дека популистичката Лига на Салвини останува најпопуларна партија со 31,8 отсто поддршка. Двете партии кои ја сочинуваат сегашната левичарска коалициска влада во Италија, Движењето Пет ѕвезди и Демократската партија, добија поддршка помала од 20 отсто.
Десетици илјади луѓе се собраа во саботата на митингот „Италијанска гордост“ во Рим, на кој на Салвини му се придружија Мелониле и поранешниот премиер и лидер на Форца Италија, Силвио Берлускони. Обраќајќи се пред своите приврзаници, Салвини рече:
„Ова е Италија, која работи и страда, која сонува и се надева“.
Додека приврзаниците го извикуваа нејзиното име од плоштадот, Мелониле рече:
„Ние сме луѓе. И имаме сопствен идентитет. Јас сум Џорџа, јас сум жена, јас сум мајка, јас сум Италијанка и христијанка сум и никој тоа не може да ми го одземе“.
Една 61-годишна жена, која присуствуваше на митингот, изјави за „Асошиетед прес“: „Бараме Матео Салвини што побргу да нè доведе на гласање. И кога, конечно, ќе ни биде дозволено да гласаме, ќе победиме“.
Ако партиите на Салвини, Мелониле и на Берлускони склучат алијанса, прогнозите се дека лесно би имале доволно поддршка за да добијат контрола врз италијанскиот парламент на следните избори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Свет
Трамп казнет со 9.000 долари
Помалку од седум месеци пред претседателските избори во ноември, на републиканскиот кандидат Доналд Трамп му се суди затоа што се обидел да го купи молкот на поранешната порно ѕвезда Сторми Даниелс неколку дена по изборите во 2016 година на кои ја победи демократската кандидатка Хилари Клинтон.
Судијата Хуан Мерчан рече дека Трамп е казнет со 9.000 долари поради кршење на забраната за коментирање на сведоци. Обвинителите го обвинија поранешниот претседател дека повеќе пати ја прекршил забраната за коментирање и побараа од судијата да го казни со 1.000 долари по прекршок, пишува Гардијан.
Според забраната, Трамп не смее да дава, или да наложува други да даваат јавни изјави за сведоците на судењето, обвинителите и членовите на судскиот персонал. Пред судењето, судијата Мерчан ја прошири оваа забрана за коментирање на членовите на семејството откако Трамп напиша објава за ќерката на Мерчан.
Трамп мора да отстрани седум навредливи објави од социјалната мрежа „Truth Social“ и две објави од неговата веб-страница на кампањата до 14:15 часот. „Го предупредуваме обвинетиот дека судот нема да толерира натамошно кршење на правните наредби и дека доколку е потребно и соодветно со оглед на околностите ќе биде осуден на затворска казна“, се вели во судската пресуда.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.