Русија ги има предвид интересите на сите во Сирија, а не само на претседателот Башар ал-Асад или на опозицијата, изјави во саботата рускиот министер за надворешни работи Сергеј Лавров во разговор за јавната телевизија во кој се осврна и на односите со Европската унија, и го критикуваше откажувањето на САД да примат висока руска делегација во рамките на напорите за решавање на сирискиот конфликт.

„Ние не сакаме да ги застапуваме личните интереси на Башар ал-Асад, ниту посебните интереси на опозицијата. Ги земаме предвид интересите на Сирија. А за Сирија е важно да биде мирна ситуација, што е можно поскоро завршување на војната за терористите да не добијат шанса да ја преземат власта во Дамаск, па и кој и да е друг дел од земјата“, рече Лавров и притоа не сакаше да навлегува во поединости околу неодамнешната посета на сирискиот претседател Асад на Москва и разговорите со рускиот челник Владимир Путин.

Лавров ги критикуваше САД за одбивањето на координација со Русија во антитетерористичката кампања на Блискиот исток.

„Нашето воено присуство во Сирија мнозинство го сметаат како најефикасен одговор на терористичката закана, особено во однос на повеќе од една година од траењето на коалицијата предводена од САД во борбата против Исламската држава, којашто во тој период само ја зголеми територијата што ја контролира“, рече Лавров.

„Голема грешка на Американците е одбивањето да се координираат со нас во антитерористичката кампања. Ние сме подготвени за такво координирање максимално длабоко“, истакна рускиот министер за надворешни работи.

Според Лавров, Москва е подготвена да соработува со патриотската опозиција, а исто така во воздушните напади ја поддржува Слободната сириска армија (FSA), отфрлајќи го обвинувањата на Вашингтон дека дури од 80 отсто од руските воздушни удари биле насочени кон опозициските групи а не врз позициите на Исламската држава. Истакна дека тоа се прави и покрај тоа што САД „одбиваат да споделат со нас информации за тоа, каде според американските процени се наоѓаат терористите, а каде патриотската опозиција“.

„За нас важно е да се дојде до личностите кои авторитетно ќе ги претставуваат вооружените групи, кои се спротиставуваат на тероризмот“, рече Лавров.

Според шефот на руската дипломатија, американскиот државен секретар Џон Кери во текот на нивниот телефонски разговор рекол дека условите за посетата на руската делегација во Вашингтон предводена од премиерот Дмитриј Медведев, „се уште не биле созреани“.

Лавров во врска со незапаметената миграциска криза на европскиот континент во која најбројни се бегалците од војната во Сирија, забележува дека Европската унија сега разбира дека е неприфатлива позицијата да се стои настрана од сирискиот конфликт.

„Веројатно како мотив послужи бранот имигранти, иако процените за 700.000 во принцип е помалку од бројот на Украинците кои ги прими Русија и кои остануваат на наша територија. Тоа е споредливо со напливот од сириските бегалци во земјите на регионот, на кој малку кој помислуваше додека миграцијата не удри по Европа“, рече шефот на руската дипломатија.

„Ваквиот чисто прагматичен интерес на Европа треба да се надоврзе на нејзината инволвираност во процесот на решавањето на сириската криза. ЕУ треба, и веќе почнуваат да ги признаваат основните причини за миграциската криза и хаосот на Блискиот исток“, додаде Лавров.

Рускиот дипломат истакна дека Европа „веќе нема да се двоуми да се потсети на Ирак и неуспехот на „’демократизацијата’, којашто напротив се претвори во сериозна закана за поделбата на земјата и меѓусекташките тензии во неа“.

„Веќе почнуваат (во ЕУ) да се потсетуваат и на поновиот пример од Либија, која се претвори во неконтролиран коридор за криумчарење мигранти од многу земји и не само од Северна Африка, туку и од ткн ‘црна’ Африка. Се присетуваат на цената со поранешниот водач на Либија, Муамер ел-Гадафи, обидувајќи се да тргнат од илузијата дека со смената на диктаторот демократијата самата од себе ќе пушти корени“, смета Лавров.

„Убеден сум дека тие лекции кај повеќето водечки политичари дале поуки, а во однос на Сирија дури и во продолжената реторика против Асад. Тоа ни дава надеж дека во блиска иднина ќе се промовира политичкиот процес и, со користење на внатрешните фактори, ќе се успее сите Сиријци да седнат на преговарачката маса“, дополни рускиот министер за надворешни работи кој ден претходно во Виена на оваа тема разговараше со своите колеги од САД, Турција и Саудиска Арабија, на состанокот на кој учествуваше и високата претставничка за надворешна и безбедносна политика на ЕУ, Федерика Могерини.

Лавров изрази убеденост дека меѓународните преговарачи треба да ги зајакнат напорите, но истакна и дека нема ништо да решат за самите Сиријци кои мораат да решат како натаму ќе живеат во својата земја, кога интересите на секоја верска, етничка или политичка група ќе бидат заштитени. „Се разбира, треба да се подготвува за изборите, и парламентарни и претседателски избори“, порача.

Во опширното интервју Лавров се осврна и на ставот на Москва дека во дијалогот за решавањето на сириското прашање треба да бидат вклучени и регионалните земји како Иран, Египет, Катар, Обединетите Арапски Емирати, како и со Јордан со кој во петокот Русија постигна договор за координирање на воздушните операции во Сирија.

Одговарајќи на прашањето дали го смета за соодветен формат дијалогот за Сирија, меѓу „квартетот“ САД, Русија, Турција и Саудиска Арабија, Лавров одговори негативно и истакна дека руската страна се согласила на овој формат „уште еднаш истакнувајќи дека тоа е безуспешен обид без учество на Иран (сојузник на сирискиот претседател Башар ал-Асад –з.м.) да се создаде ткн ‘внатрешен круг’“ за решавање на сириската криза. „Убедени сме, исто така, дека во сегашните услови важно во таа група да се вклучат Египет, Катар, ОАЕ, Јордан“./крај/мф/сн

Извор: Макфакс