Македонија
Пендаровски во посета на Тетово и Теарце во рамките на проектот „Лице в лице со претседателот“

Претседателот Стево Пендаровски, во рамките на проектот „Лице в лице со претседателот“, денеска ги посети општините Тетово и Теарце.
Пендаровски во Тетово, придружуван од градоначалничката на општина Тетово, Теута Арифи, ја посети Шарената џамија, една од најрепрезентативните обележја на исламската архитектура во Македонија. Пред претседателот Пендаровски беше претставен историјатот на Шарената џамија од страна на имамот Баки Касами.
Пендаровски го посети фудбалскиот клуб „Љуботен“, кој годинава одбележува 100 години од формирањето. Пред претседателот беа посочени проблемите што ги има фудбалскиот клуб во функционирањето вклучувајќи го и најголемиот предизвик со кој во моментот се соочува клубот – немањето сопствен стадион, информираат од кабинетот на Пендаровски.
За време на посетата на Тетово, претседателот се сретна со младиот иноватор Орхан Багашов, кој во својот дом речиси една година развива робот со вештачка интелигенција. Багашов има освоено многубројни награди и признанија, меѓу кои и златен медал на меѓународниот натпревар „Инфоматрикс“ во конкуренција од 347 проекти за својот проект ротирачки 3Д-печатач. Претседателот Пендаровски ја истакна потребата од поддршка за младите иноватори како Багашов за да продолжат својот потенцијал да го развиваат во сопствената држава.
Во изјава за медиумите Пендаровски рече дека по Велес и Кочани, Тетово е третиот град што го посетува во рамките на проектот „Лице в лице со претседателот“.
„Граѓаните не треба со своите проблеми или со своите дилеми да доаѓаат кај мене во кабинетот. Најдобро е јас да дојдам кај нив, да ги чујам. Но, се разбира, а тоа го покажува и структурата на мојата посета дека нема да се занимаваме само со проблемите. Тоа не значи дека кај нашите граѓани нема проблеми, кои ќе ги решаваме. Но, мојата намера во рамките на овој проект е да ги истакнам и позитивните примери. Тие луѓе се меѓу нас, а сè уште не знаеме колку вредат и колку придонесуваат за позитивниот имиџ на земјата и многу подалеку од границите на државата“, изјави претседателот Пендаровски во Тетово.
Пендаровски во Центарот за култура „Иљо Антески – Смок“ во Тетово оствари средби со новинари од тамошните медиуми и со претставници на граѓански организации од Тетовскиот Регион на кои беа разменети мислења за предизвиците со кои се соочуваат во својата работа.
Претходно, во Теарце, претседателот Пендаровски го посети основното училиште „Кирил Пејчиновиќ“, каде што учат ученици од македонската, албанската и од турската етничка заедница. Покрај мешаниот етнички состав, карактеристично за училиштето е што учениците по избор изучуваат и јазик што не им е мајчин. Учениците и вработените во училиштето ја истакнаа потребата за нови учебници со цел подобрување на квалитетот на наставата.
Во селото Слатино претседателот Пендаровски ја посети Рита Бехадини, која преку социјалните мрежи поведе и реализира акција за собирање училишни материјали и прибор за ученици од семејства со социјален ризик. Претседателот Пендаровски оддаде признание за активностите на Бехадини истакнувајќи дека нејзиниот пример треба да го следат и други млади луѓе.
За време на посетата на Тетовскиот Регион, Пендаровски го посети Лешочкиот манастир. Во придружба на тетовско-гостиварскиот митрополит Јосиф, претседателот Пендаровски ги посети црквите „Св. Атанасиј“ и „Св. Богородица“, како и конаците во рамките на манастирскиот комплекс, каде што е сместена спомен-собата на македонскиот преродбеник Кирил Пејчиновиќ. Претседателот Пендаровски беше запознаен со историските факти за манастирот и за конаците, а беше истакната потребата за поголема заштита на културно-историското богатство на манастирот, особено на црквата „Св. Богородица“, која датира од 14 век.
Во селото Џепчиште претседателот Пендаровски го посети етномузејот во сопственост на Симеон Златев – Моне, кој се смета за најмал етнолошки музеј во светот. Во музејот, на 7,2 квадратни метри, има изложено речиси 1.150 експонати од вкупно 2.000 што Златев ги собирал во изминатите три децении. Сопственикот на музејот го информира Пендаровски за намерата и официјално да го внесе својот музеј во Гинисовата книга на рекордите како најмал етнолошки музеј во светот.
Проектот „Лице в лице со претседателот“ е инициран во изборната програма на Пендаровски. Целта е преку посети на населените места во Северна Македонија тој да се сретне со што е можно повеќе граѓани и одблиску да ги чуе проблемите и предизвиците со кои се соочуваат граѓаните, како и идеите за нивно надминување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Крадци корнат бисти од гробишта – по Бутел, бронзена биста украдена и во Ѓорче

Нов случај со кражба на бронзена биста од гробишта бил регистриран во полицијата во текот на вчерашниот ден.
Скопјанка пријавила попладнето дека од гробиштата во Ѓорче Петров со употреба на физичка сила била одземена една бронзена биста.
Само два дена претходно, истото се случи и на гробиштата во Бутел. Тогаш од МВР информираа дека со употреба на физичка сила и подесен алат биле одземени три бронзени бисти.
„Макфакс“ претходно објави и дека во текот на минатата седмица беше откорнатата плоча од споменикот на децата бегалци во паркот „Жена борец“ во Скопје. Украден е релјефот од бакар, мотив на мајка со три деца, прицврстен на постаментот, отстранети се и бронзените букви од натписот „Татковината – копнеж на прогонетите“
Од МВР велат дека се работи на расчистување на случаите.
Македонија
Дрво падна кај Млечен, оштетени три автомобили, скинати кабли од бандера

Дрво попладнево падна на улицата Анкарска кај популано именуваниот реон „Млечен ресторан“.
Паднатото дрво има оштетено три автомобили.
Од Центарот за управување со кризи, информираа дека полицијата е на лице место и настанот е пријавен во ЈП ,,Паркови и зеленило” за да го отстранат паднатото дрво од улицата.
Исто така, дрвото, при паѓањето, има скинато кабли од бандера.
Известени се надлежните институции за санација на скинатите и откачени кабли.
Фото: Илустрација
Македонија
Села му одговори на Таравари: Без доверба и чест нема ниту куќа, ниту врата

Едниот од лидерите на поделената Алијанса за Албанците, Зијадин Села, преку социјалните мрежи му одговори на неговиот поранешен сопартиец, Арбен Таравари за можноста за повторна соработка.
„Според албанската традиција и обичајното право, домот не е едноставно место каде што живееш, туку тоа е име и идентитет! Дали вратата или куќата е голема или мала го прави сопственикот на куќата. Честа, довербата, дадениот и одржан збор и мажественоста се атрибутите кои овој сопственик мора да ги има. А кога ги нема, тоа не се нарекува ниту куќа, ниту врата, а камоли голема“, се вели во објавата на Села.
Таравари претходно вчера рече дека кој сака е добредојден да им се придружи. Одговарајќи на новинарско прашање дали е можно повторно спојување со лидерот на другото крило од Алијанса за Албанците, Зијадин Села, тој изјави: „Јас кажав дека нашата куќа, нашата фамилија е голема, за сите вратите се отворени, така што, кој сака нека повели, добредојден е“.

„Јас кажав дека нашата куќа, нашата фамилија е голема, за сите вратите се отворени, така што, кој сака нека повели, добредојден е“ – Арбен Таравари
Алијансата за Албанците на Таравари одлучи на локалните избори да излезе со посебни листи за општински советници.