Македонија
Затуроска: СДСМ носи закони по скратена постапка за да избегне дебата

Откако е почнат мандатот на оваа Влада и ова парламентарно мнозинство предводено од СДСМ, како никогаш досега се злоупотребува и се користи процедурата скратена постапка со цел да се избегнат дебатите за законските решенија коишто се носат, изјави Лилјана Затуроска, пратеничка на ВМРО-ДПМНЕ.
„Праксата што господинот Талат Џафери и СДСМ на секоја седница ја практикуваат со законите по скратена постапка ги надминува сите граници на толеранција којашто Деловникот ја овозможува. Ова премина во злоупотреба наместо во потреба. Иако, досега многу пати сме реагирале на ваквата злоупотреба на скратената постапка, гледаме дека парламентарното мнозинство продолжува со своето самоволие во Собранието на Република Македонија“, рече таа.
Граѓаните, додаде Затуровска, се сеќаваат дека додека СДСМ беа во опозиција ветуваа дека законите нема да се носат без претходни длабински дебати на кои ќе бидат слушнати повеќе аргументи и мислења и дека законите по скратена постапка ќе бидат сведени на минимум.
„Наспроти тоа, денес на 116. седница на Собранието како предлог на дневен ред од страна на Талат Џафети и парламентарното мнозинство од 24 точки, дури 13 се по скратена постапка. Нам ни е јасно дека СДСМ сака да избега од дебата и на мала врата да ги протне овие закони, што го покажува демократскиот капацитет на оваа парламентарно мнозинство и Влада. Тие константно работат на заобиколувањето на процедурите коишто едно законско решение треба да ги помине за да се донесат квалитетни закони коишто ќе бидат корисни за граѓаните на Република Македонија, а не неквалитетни и неиздржливи законски решенија какви што носи ова парламентарно мнозинство, а подоцна истите тие не даваат никаков резултат па мора драстично да се менуваат или стопираат како што беше во случајот со прогресивниот данок и низа други закони“, рече пратеничката од опозицијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.