Македонија
Први политички консултации меѓу Република Северна Македонија и Грузија

Во Скопје се одржаа првите политички консултации меѓу Министерствата за надворешни работи на Република Северна Македонија и Грузија, предводени од заменик-министрите на двете земји, Андреј Жерновски и Вакхтанг Макхароблишвили. Делегациите разменија мислења за билатералните односи меѓу двете земји и можностите за нивно унапредување, притоа истакнувајќи ја потребата од воспоставување на билатералната правна рамка во сите области од заемен интерес како основа за натамошно продлабочување на соработката, особено во областа на економијата.
Заемно е констатирано дека воспоставувањето на дипломатските односи меѓу Република Северна Македонија и Грузија во февруари 2019 година отвора можности за интензивирање на политичкиот дијалог и продлабочување на соработката во сите сфери од заемен интерес, притоа имајќи ги предвид заедничките надворешнополитички приоритети на двете земји.
Заменик-министерот Жерновски, зборувајќи за перспективите на Република Северна Македонија во однос на членство во Европската Унија, истакна дека нашата држава направи огромен напредок во последните две години како резултат на посветеноста на реформскиот процес, при што потенцира.
„Ние остануваме силно фокусирани на европскиот пат. За нас не постојат други алтернативи, продолжуваме да создаваме европски правила и стандарди во работењето и во промовирањето на европските вредности. Очекувам набргу земјите-членки да успеат да постигнат консензус за почеток на преговорите со нашата држава како валоризација на заслуженото“, рече Жерновски.
Заменик-министерот на Грузија, Вакхтанг Макхароблишвили, упати честитки за потпишувањето на пристапниот протокол за членство на Република Северна Македонија во НАТО и го поздрави севкупниот напредок на нашата земја во процесот на евро-атлантските интеграции изразувајќи надеж дека и Грузија ќе успее да го изоди истиот пат кон остварување на своите надворешнополитички приоритети.
Во рамките на политичките консултации грузиската делегација беше примена и од министерот за надворешни работи, Никола Димитров.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Целосно реновирани управните служби во зградата на МРТВ: „Веќе нема да има хаос“

Министерот за внатрешни работи Панче Тошковски денеска заедно со раководството на Министерството го пушти во употреба реконструираното Одделение за управни работи – Скопје кое се наоѓа во зградата на МРТВ.
Тошковски образложи дека реконструкцијата почна кон крајот на месец октомври минатата година, и според него, била една од стратешките планови на ова раководството на МВР со цел граѓаните да добиваат брзи и ефикасни услуги кои ги плаќаат и ги заслужуваат.
„Веќе нема да има хаос, неред и граѓани со нарушено достоинство кога е потребно да се извади личен документ или било која услуга која ја дава овој Оддел. Целта на реконструкцијата е граѓаните да имаат можност за брзи и ефикасни услуги, да го штедат своето време и сето тоа да биде на достоинствен начин како што заслужува секој македонски граѓанин. Со реконструкцијата и реновирањето засега опфатени се 20 т.н. кабини за сликање кои ќе извршуваат повеќе работни функции и ќе даваат повеќе услуги на граѓаните, реконструирана е големата шалтер сала која во наредниот период ќе ги опслужува граѓаните во делот на издавањето на пасошите по итна и редовна постапка, личните карти по итна постапка, возачките дозволи, уверенија за државјанства заедно со сите останати постапки во врска со барањата за прием и отпуст од државјанства, промена на лично име и други, како и услуги од областа на возилата“, потенцираше министерот Тошковски.
Министерот за внатрешни работи Тошковски истакна дека заедничкиот простор кој е наменет и за граѓаните и за вработените е опремен на начин кој ќе овозможи секој граѓанин да се чувствува пријатно за времетраењето на давањето или чекањето на конкретната услуга.
Во реконструкцијата во оваа фаза се реконструирани и 15-на канцеларии за вработените, санитарните чворови, инсталиран е целосно нов централен систем за ладење и греење и извршено е целосно сервирање на надворешните окови, во насока објектот да биде што повеќе енергетски ефикасен.
Тошковски на крајот подвлече дека паралелно со процесот на дигитализација во кој многу од услугите кои ги дава МВР ќе бидат достапни и дигитално, ќе се продолжи со отворање на нови канцеларии на управни служби онаму каде што тие не се достапни за граѓаните, а веќе се отворени шест нови, како и реконструкција и модернизација на други каде што е потребно.
Македонија
ГРОМ бара обештетување на настраданите во Кочани и оставка од Мицкоски

Сведоци сме дека состојбата во Кочани полека но сигурно ескалира. Оправданиот револт на потесните и пошироките семејства на починатите и повредените е повеќе од оправдан. Големата болка на родителите се искажува преку тешки зборови упатени до претставниците на власта и уште потешки квалификации на апологетите на актуелната владејачка гарнитура, велат од ГРОМ.
Според партијата, Владата не се снашла најсоодветно со трагедијата и не е спремна да понесе политичка одговорност, да направи обид да ги смири тензиите и да најде начин да ја ублажи болката на семејствата.
„Затоа ГРОМ смета дека е потребно друга влада која ќе има повеќе разбирање за болката на овие наши граѓани. Предлагаме актуелните владетели да се обидат да придонесат кон деескалација на состојбите, и тоа Владата на Република Македонија предводена од Христијан Мицкоски веднаш да си поднесе неотповиклива оставка и ВМРО-ДПМНЕ да даде нов мандатар за состав на Влад. Новата Влада на Р. Македонија да донесе одлука со која на секое семејство од загинатите ќе им исплати 500.000 евра како мал надомест за големата болка и затоа што дел од родителите не се ни способни веќе за работен ангажман“, велат од ГРОМ.
Партијата предлага повредените лица од пожарот од дискотеката Пулс да се поделат во три категории согласно лекарските наоди и лицата со тешки и трајни оштетувања да добијат исто така по 500.000 евра и секоја година до крајот на животот, министерството за труд и социјална политика да им исплаќа по 30.000 евра, заради трајните животни последици и нивната неспособност за функционирање.
Во втората група да влезат лица со умерени оштетувања за кои ќе има потреба од подолгорочна рехабилитација и хируршки интервенции, да им се исплатат по 300.000 евра еднократно и до крај на животот да примаат по 15.000 евра годишно.
Лицата со лесни оштетувања кои биле болнички хоспитализирани, да им се исплати по 100.000 евра и наредните 3 години по 10.000 илјади евра како надомест за потребни рехабилитации.
Во исто време сите овие граѓани да имаат право да отворат судска постапка пред граѓанскиот суд доколку се незадоволни од обесштетувањето од страна на државата.
ГРОМ бара и Обвинителството и надлежните судски институции да продолжат со гонење и да дадат ефективна завршница на директно одговорните за овој страшен настан.
„За жал одговорноста за овој проблем, владата до сега се обидува само да го персонализира, без да преземе одговорност, но ако владата е неодговорна, државата мора да биде на ниво кон секој граѓанин кој го изгубил животот или има трајни последици како резултат на неодговорното функционирање токму на институциите кои ја претставуваат државата“, велат од ГРОМ.
Македонија
Ѓорѓиевски: Кисела Вода секој ден се менува, да ги чуваме новите реквизити, вандалското однесување да се пријави веднаш

Градоначалникот на општина Кисела Вода Орце Ѓорѓиевски, информираше дека во изминатиот период работеле на промена на старите и поставување на нови детски катчиња, реквизити и урбана опрема. Тој истакна дека се работи за нови нови подови кои се користат за летните Олимписки игри, нови клупи, фонтана и реквизити.
-Кисела Вода секој ден сѐ поубава, модерна и зелена. Изминатиов период работевме на обнова на старите, како и поставување на нови детски катчиња низ нашата општина. Се работи за нови детски катчиња, нова урбана опрема, клупи, фонтани, нови подлоги на игралиштата со полипропиленски под кој официјално се користи за летните Олимписки игри. За најмладите наши жители, за нивната детска игра непречено да тече добиваат модерни и безбедни простори, а повозрасните генерации ќе можат да уживаат во зеленилото и урбаната опрема кои ги нудат овие места. Сето ова, хортикултурно уредено за да естетски изгледа уште поубаво.
Апелирам до родителите и дечињата да ги чуваме овие нови реквизити, а доколку забележат вандалско однесување веднаш да пријават до надлежните полициски служби“.
Нашата Кисела Вода се менува секој ден и тие промени се насекаде околу нас“, рече Ѓорѓиевски.