Регион
Извештај на БВМН: Хрватска има подруми за мачење во близина на Србија

На граничниот премин Бајаково кон Србија, Хрватска има подруми во кои полицијата ги претепува мигрантите, се тврди во најновиот извештај на Мрежата за мониторинг на граничното насилство (БВМН), која се занимава со правата на мигрантите и на бегалците, пренесува хрватски „Индекс“.
Во извештајот за октомври 2019 година оваa мрежа ги прозва хрватските власти за кршење на човековите права на мигрантите и за спроведување нелегални политики на системско насилство врз нив. Се наведува дека во подготовката на овој извештај активистите на БВМН, меѓу другото, интервјуирале 30 мигранти и ги забележале нивните искуства.
Во споменатиот период, како што се наведува, забележан е исклучително голем број инциденти со полициско насилство, а како особено вџашувачка приказна го наведуваат постоењето подруми на граничниот премин Бајаково во кои хрватската полиција ги претепува мигрантите.
„Во тој подрум службениците на хрватската гранична полиција со раце и со палки претепувале малолетници, од кои дел имале само по 12 години. Едно сведочење ја опишува просторијата со големина од осум квадратни метри до која се доаѓа по скали што водат под просториите на граничниот премин“, пишува во извештајот на БВМН.
Во таа мала просторија без прозорци понекогаш уфрлале и група мигранти. Во текот на престојот во подрумот на Бајаково мигрантите немаат право да одат во тоалет ниту имаат пристап до вода и храна, а ускратено им е и правото да побараат азил.
Еден 16-годишен Авганистанец раскажал дека во тој подрум го држеле повеќе од еден час и дека го тепале со раце и со пендреци. Кај еден малолетник хрватската полиција користела и електрошокер и го удирала од ѕидот на подрумот.
„Случаите забележани во октомври откриваат дека подрумската просторија е дискретна локација на која полицајците можат да ги малтретираат транзитните групи мигранти и во која се заштитени од погледите на возачите што ја преминуваат границата“, се вели во извештајот.
Од БВМН потсетуваат и дека медиумите известуваа за „гаражата за мачење“ во Кореница, во која полицијата ги водела фатените нелегални мигранти, и наведуваат дека хрватската полиција сè повеќе го користи соблекувањето на мигрантите како уште еден начин на малтретирање.
Со доаѓањето на зимата и студеното време, таквата полициска тактика станува особено опасна зашто може да доведе до хипотермија и до повреди на рацете и нозете, особено кога полицијата ги принудува мигрантите боси да одат низ студени потоци, што исто така е забележано како честа практика.
Во извештајот се наведува дека во октомври хрватската полиција протерала најмалку 464, а најмногу 607 мигранти, зависно од изворот. Повеќето мигранти биле протерани во БиХ, но има и примери на протерување во Србија.
Од БВМН истакнуваат дека во хрватското законодавство постои можност полицијата да ја примени мерката соблекување на осомничениот, но само во случаи кога се пребарува за скриено оружје. Меѓутоа, во документираните случаи мигрантите биле и до 24 часа во надлежност на хрватската полиција, која им наредила да се соблечат дури откако ги одвела на зелената граница. Ваквото постапување на хрватската полиција, како и дека соблекувањето на мигрантите зачестува со заладувањето на времето, во март го забележале и од „Амнести интернешнел“
Забележани се и два случаи во кои хрватските полицајци, откако им наредиле на мигрантите да се соблечат голи, со пендреците им ги допирале гениталиите и така сексуално ги злоупотребувале и понижувале.
Се наведуваат и дозкази за општопознатата практика на кршење на мобилните телефони на мигрантите, а хрватските закони се кршат и кога на мигрантите им се оневозможува да го искористат правото на барање азил. Такви случаи се забележани во полициската станица во Глина, како и во Огулин.
Во извештајот се нагласува дека и покрај насилното и незаконско однесување на хрватската полиција, Хрватска добила зелено светло за влез во шенгенската зона на слободно движење во ЕУ и пофалби од претседателот на ЕУ во заминување, Жан-Клод Јункер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Кралски питон снимен на улица во Загреб

Во загрепската населба Кајзерица, вчера вечерта човек наишол на кралски питон како талка по улицата. Ја снимил змијата и го објавил видеото во соседските групи во обид да го пронајде нејзиниот сопственик.
Еден од членовите на групата вклучен во безбедното враќање на змијата потврдил за Дневник.хр дека сопственикот е пронајден.
„Ја најдовме сопственичката и змијата ќе ѝ биде вратена. Пред да ја најдеме сопственичката, контактирав со Зоолошката градина во Загреб. Од Зоолошката градина ни кажаа дека можеме да им ја доставиме змијата, но бидејќи сопственичката во меѓувреме нè контактираше, проблемот е решен“, рече тој.
Регион
Пицула: Србија живее во вонредна состојба, се плашам од 17-та жртва

Европратеникот Тонино Пицула, известувач на Европскиот парламент за Србија, коментира за тековните протести во Србија за „Н1“, како и за најновите настани поврзани со војната во Украина и за обидот за наоѓање мирно решение.
„Ми се чини дека Србија живее во вонредна состојба не само во последните еден или два месеца туку и подолго. Не е прогласена, но со текот на времето сите протагонисти со своите постапки покажуваат дека Србија е во ситуација во која некои стандардни механизми, што помагаат во решавањето на внатрешните конфликти во демократиите, не постојат“, рече тој на почетокот.
„Ова е еден вид институционална блокада. Ова не функционира во Србија со месеци и подолго. Ова е сериозна ескалација на насилството, што, имам чувство, почна по масовниот митинг на 18 јуни кога режимот на Александар Вучиќ ги извади ракавиците и почна да користи сила во поголема мера, не дека тоа не го правел претходно“.
Пицула исто така го изрази својот најголем страв кога станува збор за ескалацијата на насилството во Србија.
„Се плашам од 17-тата жртва. Зборуваме за 16 лица, кои ги загубија животите кога падна настрешникот на 1 ноември минатата година. Доколку овие конфликти доведат до нова жртва, можеме да зборуваме за уште поголема ескалација, што може да биде фатална“.
Каков е односот на Европската Унија кон претседателот Вучиќ?
„Во моментот ЕУ нема мотив, ниту капацитет да се однесува поинаку кон малигниот режим на Александар Вучиќ. За разлика од Украина, во ЕУ недостига компонента на единство, што би претставувала притисок, што би довел до компромис и можеби до одење на избори. Европскиот парламент е многу осамена институција во архипелагот на европски институции, што е многу критична кон Србија“, додаде Пицула.
Со кого може да се разговара тогаш во Србија?
„Ова е многу сложена ситуација и тешко е да се даде јасен одговор. Би било добро ако разговараат едни со други во Србија. За да се обезбеди мирна транзиција, да се најде компромисен механизам за да се стигне до избори. Сепак, проблемот е што изборите во Србија се случуваат релативно често. Вучиќ прибегнуваше кон избори секојпат кога проценуваше дека може да добие дополнителен легитимитет. Мислам дека имаше само два или три редовни циклуси, сè друго беа вонредни циклуси“.
„Треба да бидеме целосно јасни тука и да кажеме дека во Србија сè што е против Вучиќ не е нужно и за Европа во исто време, таму постои хетерогеност, што ја комплицира ситуацијата“, вели европратеникот.
Тој тврди дека сè уште нема обединет фронт во ЕУ што ќе изврши вистински притисок врз претседателот на Република Србија.
фото: принтскрин
Регион
(Видео) Автобус со српски туристи каменуван во Грција, има повредени

Автобус со 38 српски туристи бил каменуван синоќа на автопатот Егнација во Солун.
Според полицискиот извештај, инцидентот го предизвикале четири лица, најверојатно малолетници, пишува „Прототема“.
Θεσσαλονίκη: Επίθεση με πέτρες σε τουριστικό λεωφορείο – 3 τραυματίες
Άγνωστοι, πέταξαν πέτρες σε τουριστικό λεωφορείο με αποτέλεσμα να σπάσουν τα τζάμια και να τραυματιστεί ο οδηγός, και δύο επιβάτες – Το συμβάν σημειώθηκε στα διόδια Ωραιοκάστρου στη Θεσσαλονίκη.#ingr #innews pic.twitter.com/M3l3Ft1yv8
— in.gr/news (@in_gr) August 21, 2025
Во нападот врз автобусот, во кој се превезувале српски туристи, кои се враќале од одмор, неколку прозорци биле скршени со камења.
Двајца патници и еден од возачите добија полесни повреди, објавува „Катимерини“.
Полицијата приведе две лица во врска со инцидентот, но не биле утврдени докази против нив и лицата биле ослободени.