Свет
Се зголемува криминалот во Шведска, премиерот не ги обвинува мигрантите за тоа
Со зголемувањето на криминалот на бандите во Шведска, премиерот Стефан Лофвен сè уште одбива да ја обвини миграцијата за проблемот. Статистиката докажува дека греши, но во Шведска социјалната правда е очигледно поважна од вистинската правда, пренесува РТ.
Среде бран бомбашки напади и вооружени престрелки, Данска минатата недела ја затвори границата со Шведска повторно воведувајќи пасошки контроли и полициски проверки првпат од 50-тите години.
„Затегнувањето на безбедноста е неопходно за да ѝ се спротивставиме на заканата од сериозен, прекуграничен криминал“, рече министерот за правда на Данска, Ник Хекеруп.
Тринаесет експлозии и двојно убиство во Данска предизвикаа блокада, но во Шведска проблемот е уште полош. Минатата година имало 162 бомбашки напада, а 120 се случиле во првите седум месеци од 2019 година.
Десницата ги обвини бандите предводени од мигрантите за криминалниот бран, но премиерот Лофвен не го прифаќа тоа. Иако призна дека заканата од насилство на бандите е реална и се зголемува, тој во неделата за шведската ТВ-мрежа СВТ изјави дека извор на проблемот се сегрегацијата, сиромаштијата и невработеноста.
„Сегрегацијата се јавува затоа што има премногу висока невработеност во овие области. Но, ќе беше исто без оглед на тоа кој живее таму. Ако ставите луѓе родени во Шведска под исти услови, ќе го добиете истиот резултат. Поради економскиот јаз, социјалните неправди би биле исти“, рече тој.
Стапката на невработеност во Шведска достигна 8,6 отсто во 2010 година како резултат на големата рецесија. Сепак, Швеѓаните не почнаа да се навредуваат меѓусебно и следната година во земјата имаше само 17 убиства од огнено оружје. До 2018 година стапката на невработеност опадна на 6,3 отсто, а сепак беа убиени 43 луѓе. Сè на сè, убиствата се зголемиле повеќе од двојно меѓу 2008 и 2018 година, според владината статистика.
Сакал да признае Лофвен или не, врската меѓу мигрантите и криминалот не е само нешто од десничарската фантазија. Истрагата за 2017 година на весникот „Дагенс Нихтер“ откри дека мигрантите стојат зад 90 отсто од пукањата во Шведска. Според извештајот, мнозинството извршители на кривични дела со пукање биле мажи по потекло од Блискиот Исток или Северна Африка.
Нападите со гранати се чини дека се увезена појава. Во Шведска имаше мал број експлозии годишно до 2016 година кога во нападите биле искористени 39 рачни гранати. Се разбира, 2015 година беше годината кога Шведска прими повеќе од 160.000 мигранти и баратели на азил. Но, фактот дека нападите со гранати се зголемија речиси 40 пати во исто време кога Шведска беше преплавена со нови мигранти, едноставно може да биде случајност.
Ако вистинската причина е навистина невработеноста, како што сугерира Лофвен, тогаш проблемот повторно е поврзан со имиграцијата. Минатата година во владиниот извештај се утврди дека стапката на невработеност за лица со мигрантско потекло била речиси 20 отсто. Друг извештај минатиот месец откри дека до 90 отсто од барателите на азил што пристигнале во мигрантската криза во 2015 година се невработени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Свет
Трамп казнет со 9.000 долари
Помалку од седум месеци пред претседателските избори во ноември, на републиканскиот кандидат Доналд Трамп му се суди затоа што се обидел да го купи молкот на поранешната порно ѕвезда Сторми Даниелс неколку дена по изборите во 2016 година на кои ја победи демократската кандидатка Хилари Клинтон.
Судијата Хуан Мерчан рече дека Трамп е казнет со 9.000 долари поради кршење на забраната за коментирање на сведоци. Обвинителите го обвинија поранешниот претседател дека повеќе пати ја прекршил забраната за коментирање и побараа од судијата да го казни со 1.000 долари по прекршок, пишува Гардијан.
Според забраната, Трамп не смее да дава, или да наложува други да даваат јавни изјави за сведоците на судењето, обвинителите и членовите на судскиот персонал. Пред судењето, судијата Мерчан ја прошири оваа забрана за коментирање на членовите на семејството откако Трамп напиша објава за ќерката на Мерчан.
Трамп мора да отстрани седум навредливи објави од социјалната мрежа „Truth Social“ и две објави од неговата веб-страница на кампањата до 14:15 часот. „Го предупредуваме обвинетиот дека судот нема да толерира натамошно кршење на правните наредби и дека доколку е потребно и соодветно со оглед на околностите ќе биде осуден на затворска казна“, се вели во судската пресуда.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.