Скопје
Богоев: Од општина со долг од 18 милиони евра, Карпош сега е урбана и зелена општина
![](https://makfax.com.mk/wp-content/uploads/2019/11/bardovci-gradinka-02.jpg)
За само 2.5 години, од општина со долг од 18 милиони евра, Карпош сега е урбана и зелена општина, изјави градоначалникот на Карпош, Стефан Богоев на прес-конференција.
„Изминатиов период засадивме повеќе од 300 висококвалитетни дрвја, рамномерно по сите урбани заедници. Започнавме со чистење на децениските депонии и веќе ги затворивме критичните точки кај мостот „Газела“, во близина на С.Ц. „Борис Трајковски“, во Злокуќани, кај фудбалското игралиште, како и депонијата во Бардовци, покрај течението на реката Лепенец.
Започна изведбата и на еден од најголемите проекти во мојата програма, Спортско – адреналинскиот парк, кај алпинистичката карпа, долж Кејот на реката Вардар. Тука ќе добиеме ново зеленило, нови игралишта за спорт, детски парк, сквер и адреналински содржини. По изведбата на овој дел, продолжуваме со уредување на зеленилото до бунарите на реката Лепенец.
Јавниот простор го хуманизираме, а не го узурпираме! Потврда на ова е и новото инклузивно игралиште во Влае 2, до платото „Делфина“, новиот урбан парк – скер меѓу Тафталиџе 2 и Нерези, парковите за миленици долж Кејот на Вардар и Влае, фитнес зоните во Карпош 4 и под алпинистичката карпа. Добивме нов објект на градинка во Тафталиџе 2, како и целосно нова градинка во Бардовци. Се грижиме за сеопфатна детска заштита и инклузивно основно образование. Затоа отворивме и сензорни соби за ученици со попреченост во „Димо Хаџи – Димов“ и „Вера Циривири – Трена“, а на вакви простории работиме и во „Лазо Трповски“ и „Аврам Писевски“.
Карпошани купуваат по пониски цени во повеќе од 250 бизниси во Карпош, благодарејќи на картичката Мој Карпош, која беше дел од изборната програма.
Целосно е обновено игралиштето „Сокол“, во Карпош 1, а го рестартиравме и истоимениот меморијален турнир кој е симбол на маалската дружба. Во делот на спортската инфраструктура, создадовме и нови терени во училиштата „Војдан Чернодрински“ и „Јан Амос Коменски“, а ја саниравме и спортската сала на „Владо Тасевски“.
Продолжуваме со подобрување на инфраструктурата. Нов лик добија улиците „Даскал Камче“, „Њуделхиска“, „Варшавска“, „Трифун Бузев“ и „Карпошово востание“. Градот Скопје пак целосно ги обнови улиците „Московска“, „Љубљанска“ и голем дел од булеварот „Партизански одреди“.
Во претстојниот период целосно сме фокусирани на обнова на спортската сала „Партизан“, во Карпош 4. Ова е култен спортски објект, кој повторно ќе биде со намена за спорт и рекреација.
За највозрасните, го подготвуваме проектот за Хумани патроли – бесплатна здравствена заштита и нега во нивните домови. Исто така, во процес сме на решавање на проблемот со паркирање, со тоа што ќе организираме анкета – граѓаните да одлучат дали се за регулација или не.
Општината ја преземав со долг од 18 милиони евра. Локална самоуправа која беше во финансиски колапс, симбол на криминалното работење, со изгубена доверба од сите страни.
Но, наместо оправдувања понудивме работа.
Докажавме дека може поинаку! Додека ВМРО-ДПМНЕ и Стевчо Јакимовски се смеат на користењето на грантови и донации, слободно можам да кажам дека тоа е одраз на домаќинско работење.
Деновиве не обвинуваа дека Карпош бил како невладина организација. Да, чудно им е да се работи чесно, без профити и полнење на џебови. Тие не беа научени на подготовка на проектни апликации за добивање на неповратни средства, туку единствено фокусирани на расипничко трошење на парите на граѓаните.
Ова не се само празни флоскули, напротив, сето ова е констатирано и во Извештајот на Државниот завод за ревизија, кој јавно го презентирав и го доставив до Основното јавно обвинителство и Управата за финансиска полиција. Во оваа прилика, повторно повикувам на одговорност за секој кој сторил криминал!
Денеска Карпош се бори за секој денар, се негува соработка со приватниот и граѓанскиот сектор, а ја враќаме и довербата кај целокупната јавност.
Градиме заедница која одговара на потребите на граѓаните, а не на урбаната мафија.
Убеден сум дека можеме и повеќе и подобро. Но, во изминативе две години целосно се вложивме Карпош да го врати својот сјај“, рече Богоев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Скопје
Утре и в понеделник ЈСП Скопје ќе работи по неделен возен ред
![](https://makfax.com.mk/wp-content/uploads/2024/09/Screenshot-2024-09-06-163206.jpg)
ЈСП Скопје ги известува своите патници дека по повод државниот празник 8 Септември – Ден на независноста, на ден 7.09.2024 година (сабота) и 9.09.2024 година (понеделник) ќе се работи по неделен возен ред.
За време на трите дена од продолжениот викенд, дежурни ќе бидат билетарниците и центрите за персонализација на:
– Транспортен центар;
– Ѓорче Петров; и
– Зелен пазар.
Жичницата ќе функционира вообичаено за време на викендот во сабота и недела, со работно време од 10-20 часот, при што од 19-19:30 е последното возење од долу кон врвот, а во 19:45 часот е последно возење од врвот надолу.
В понеделник 9.09.2024 година, нема да биде во функција жичницата.
Скопје
Пуштена во употреба атлетска патека и трибина во рамките на спортскиот комплекс „Драго Маневски“ во општина Илинден
![](https://makfax.com.mk/wp-content/uploads/2024/09/6-2.jpg)
Градоначалникот на Општина Илинден, Александар Георгиевски заедно со министерот за спорт, Борко Ристовски ја пуштија во употреба новата атлетска патека, која се наоѓа во рамки на новиот Спортски комплекс „Драго Маневски“, односно околу изграденото мултифункционално игралиште во близина на средното училиште во Илинден.
На настанот покрај големиот број присутни љубители на спортот присутни беа и пратеници, советници, дитектори како и големи спотрски имиња.
Градоначалникот на Општина Илинден, Александар Георгиевски истакна дека изградбата на овој спортски комплекс доби сосема нов лик кој го носи името на нашиот сограѓанин, паднатиот борец Драго Маневски од Илинден.
Тој додаде дека Општината е голем поддржувач на спортистите, а доказ за тоа се големиот број спортски натпревари, но и инвестициите кои ги прави Општината за создавање на соодветни, модерни спортски терени за нашите спортисти.
– Спортски комплекс со атлетска патека за прв пат е изграден во Општина Илинден, такашто спортистите односно атлетичарите од Општина Илинден сега имаат одлични услови за вежбање со цел остварување на големи успеси. Оваа атлетска патека можат да ја користат и најмладите кои имаат афинитети кон атлетиката, но и оние посериозните, сениорите кои веќе се докажани и ќе ги развинаат своите атлетски способности за уште поголеми резултати, како во Македонија така и на странство, изјави Георгиевски.
Министерот за спорт, Борко Ристовски го поздрави овој проект и истакна дека ретки се градоначалниците како Георгиевски кои вложуваат со особено внимание во спортската инфраструктура, спортистите и младите. Министерот додаде дека Министерството за спорт секогаш ќе биде отворено за поддршка и реализација на проекти.
Атлетската патека е изградена со 4 патеки во вкупна должина од 200 метри, на која е поставена најсовремена тартан подлога. Покрај патеката изградена е бетонска трибина на која се поставени 175 седишта, како и ограда околу трибината.
Во рамки на активностите од настанот во придружба со претставници од фамилијата, беше откриена и спомен таблата на паднатиот борец Драго Маневски.
Пред почетокот на свеченоста во градоначалничкиот кабинет, градоначалникот Александар Георгиевски, му врачи плакета на атлетичарот Дарио Ивановски, за особен придонес и промоција во спортот.
Досегашната пракса на инвестирање и создавање на услови за спортување, постојано се докажува како највредна инвестиција за сите генерации, велат од општината.
Скопје
Се одржа манифестацијата „Македонија живее“ во Гази Баба
![](https://makfax.com.mk/wp-content/uploads/2024/09/458396869_539397918472128_2696992832618887073_n.jpg)
Вчера, на плоштадот во Автокоманда во организација на општина Гази Баба се одржа манифестацијата во чест на 8 Септември, Денот на независноста на Македонија.
Пред граѓаните свое обраќање имаа градоначалникот на општина Гази Баба Бобан Стефковски и Министерот за локална самоуправа Златко Перински.
„Денес кога одбележуваме 33 години од нашата независност, имаме должност да ги прелистаме страниците на долгата македонска историја, бидејќи не смееме да дозволиме правта на заборавот да ги покрие делата на илинденците, партизаните, асномците и бранителите“, истакна Стефковски пред граѓаните.
„За жал долги години по неговото прво заседание, една мината влада реши да го избрише токму АСНОМ од преамбулата на Уставот на Република Македонија. Па зарем некој мисли дека со менување на уставот може да ја избрише колективната историја на македонскиот народ? Секако дека не! Во услови на безнадеж проработи имунитетот на македонскиот народ. После долги години национални понижувања, Македонија доби влада која знае дека постојат прашања за кој не се преговара, стекнати права за кои не се разговара и црвени линии преку кои не се поминува“, заклучи Стефковски.
На почетокот на настанот се оддржа перформансот „Македонија живее“ во кој вокално инструменталната група Аманет изведе неколку македонски патриотски песни поврзани со историјата на македонија, а македонските актери Григор Јовановски и Ирена Илиевска ги прочитаа конститутивните документи, Манифестот на АСНОМ и Декларацијата за независност на Македонија. Крајот на перформансот го одбележа спектакуларната изведба на Заветна од страна на естрадниот уметник Бојана Скендеровски.
Покрај перформансот, настанот имаше и музичка програма во која учествуваа Огнен Здравковски, Миле Кузмановски, Андријана Јаневска и Ансамблот за народни песни и ора Јонче Христовски.