Македонија
(Видео) Заев: Отворени сме за сериозни и суштински реформи во изборниот процес
Со цел да се зајакнат институциите што спроведуваат фер и ефикасни изборни процеси, со фокус на внатрешнодемократизирани политички партии, чии политики и изборни програми се ориентирани кон граѓаните и нивните потреби, денеска премиерот Зоран Заев во име на Владата потпиша меморандум за соработка со швајцарската амбасадорка Сибил Зутер во име на Швајцарската агенција за развој и соработка за поддршка на изборната реформа во РСМ за периодот 2019-2023 година.
„Реформирањето на изборните процеси во согласност со демократските принципи и почитувањето на човековите права е приоритет на Владата. Поддршката од Швајцарската влада е исклучително важна за реализација на нашите заложби токму во овој дел. Основната цел на програмата е спроведување демократски и кредибилни избори, кои ќе овозможат политичко учество на гласачите преку избор на нивни претставници од кои ќе се бара отчетност.
Конкретно, програмата треба да резултира со зајакнати институции кои спроведуваат фер и ефикасни изборни процеси. Исто така, фокусот ќе биде на внатрешнодемократизирани политички партии, чии политики и изборни програми треба да бидат ориентирани кон граѓаните и нивните потреби. Од друга страна, граѓаните ќе бидат подобро едуцирани и информирани за да бараат отчетност од политичките партии и избраните функционери.
Цел на Владата е да обезбеди одржливост во спроведувањето на овие цели. Оттука, по завршување на поддршката од Швајцарската влада предвидено за 2023 година, сите алатки и инструменти развиени преку програмата ќе бидат преземени од министерствата за да се користат и понатаму за оваа намена. Потпишувањето на овој меморандум е важен чекор на долгиот и успешен пат на градење пријателски односи и соработка со Швајцарија. Моја намера е ваквата соработка во делот на изборните реформи, но и за другите важни прашања, да се развива и понатаму“, рече Заев.
Тој додаде дека Владата секогаш е отворена за сериозни и суштински реформи во изборниот процес.
„Нам ни е многу важно граѓаните да бидат мотивирани да учествуваат во демократскиот процес, да бидат мотивирани да гласаат на изборите и да веруваат во изборниот систем. Ние сме подготвени да ги спроведеме сите препораки на ОБСЕ и ОДИХР за подобрување на изборниот процес на наредните парламентарни избори во април 2020 година. Сакаме да одиме секако и чекор понатаму бидејќи за нас – фер, демократски и слободни избори се стандард што веќе го достигнавме на претходните одржани локални и претседателски избори, но тука не треба да застанеме.
Знаете дека како политика на оваа Влада, отворени сме за дебата за промена на изборниот систем и воведување една изборна единица, отворените листи и систем што ќе овозможи поголема претставеност на граѓаните во парламентот и поголема мотивација за учество на изборите. Исто така, ја поттикнавме и ја охрабруваме дебатата за 50 – 50 рамноправна застапеност на двата пола на изборните листи, дел од политичките партии во државата веќе ќе го применуваат овој модел, но убаво е и системските решенија да ја налагаат рамноправната застапеност. Важна е и севкупната демократизација на политичките партии, која за нас е од суштинска важност на патот кон демократизација на општеството и државата со единствена цел – враќање на политиката кај граѓаните и отворање на политиката како можност за секого. Пред нас се клучни избори во април 2020, кои ќе го одредат натамошниот пат на државата и кои ќе ја потврдат Северна Македонија како одличен пример за фер и демократски избори во последните три години“, рече Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Алпинистот Здравко Дејановиќ имал здравствени проблеми при искачувањето на врвот Лотце на Хималаите
Македонскиот алпинист Здравко Дејановиќ кој при искачувањето на врвот Лотце на Хималаите имал проблеми од здравствена природа, е надвор од животна опасност, објави на Фејсбук Федерацијата на планинарски спортови на Македонија (ФПСМ).
„Во врска со искачувањето на врвот Лотце од страна на Здравко Дејановиќ, ве известуваме дека на барање на неговото семејство, досега не излеговме со официјални информации. Воедно, ве информираме дека во текот на искачувањето се појавиле проблеми од здравствена природа, и дека, во моментов Здравко е надвор од животна опасност. Одржуваме контакт со неговото семејство и во периодот кој следи ќе има повеќе информации директно од Здравко или од нас. Замолуваме за етика и воздржаност од споделување на непотврдени информации. Ви благодариме однапред на разбирањето“, се вели во објавата на Федерацијата на планинарски спортови на Македонија.
Вчера се појавија неофицијални ФБ објави дека Дејановиќ при искачувањето на Лотце, четврти највисок врв на Хималаите, се здобил со измрзнатини на рацете и со хеликотер бил пренесен во тамошна болница.
Македонија
Силјановска-Давкова телефонски разговарала со Зеленски: украинскиот народ може и во иднина да смета на македонското сојузништво и пријателство
Претседателката Гордана Сиљановска Давковa денеска оствари телефонски разговор со претседателот на Украина, Володимир Зеленски.
„Во разговорот со украинскиот претседател Зеленски, Сиљановска Давкова ја нагласи нашата цврста и недвосмислена поддршка кон Украина во однос на неиспровоцираната и неоправдана руска воена агресија. Осврнувајќи се на меѓународното право, принципите на Повелбата на ОН и Статутот на Советот на Европа, претседателката рече дека украинскиот народ може и во иднина да смета на македонското сојузништво и пријателство во справувањето со историскиот предизвик со трајни и несогледливи последици.
Двајцата соговорници разменија мислење и за претстојниот Самит чиј домаќин ќе биде Швајцарија, а со цел да создаде рамка поволна за сеопфатен и траен мир во Украина“, соопштија од нејзиниот кабинет.
Претседателот Зеленски во текот на разговорот ја поканил претседателката да ја посети Украина, за што тие, како што е појаснето, дополнително ќе се консултираат на Самитот во Швајцарија.
За време на разговорот биле нагласени одличните билатерални односи меѓу двете земји, карактеризирани со идентични вредности, меѓусебна почит и разбирање, силно потврдени со континуираната соработка во сите области од заеднички интерес.
Сиљановска Давкова и Зеленски ја реафирмирале посветеноста од натамошна заемна поддршка во меѓународната дипломатија, во насока на исполнување на европската аспирација на двете држави.
Телефонскиот разговор со Зеленски, Сиљановска Давковa го оствари од Рим, за време на нејзината посета на Италијанската Република и Светиот Престол по повод манифестацијата „Македонија во чест на Св. Кирил“.
Македонија
Таравари уште размислува дали ќе биде министер за здравство: „Можноста не е исклучена, но не е дефинитивна“
Арбен Таравари, еден од партнерите на коалицијата „Влен“, а кој моментно е градоначалник на општина Гостивар, сѐ уште не одлучил дали ќе биде во идната влада како министер.
Тој потврди дека некои од пишувањата на некои медиуми за поделбата на владините ресори и службените места се точни. Според Таравари, конечниот договор меѓу идните владини партнери, „Влен“ и ВМРО-ДПМНЕ, најверојатно, ќе биде објавен денеска или утре, стои во напишаниот допис.
„Алијансата ќе има двајца министри, вицепремиер за добро владеење и транспарентност и министер за здравство и двајца заменик-министри, како и двајца државни секретари, и тоа заменик-министер за одбрана и заменик-министер за земјоделство. Државен секретар за здравство и уште еден на кој сега не ми текнува“, изјави Таравари.
Таравари вели дека сѐ уште не се дефинирани имињата на кадрите што ќе бидат назначени на овие позиции.
Запрашан дали ќе биде следниот министер за здравство, тој рече дека не одлучил и сѐ уште размислува дали ќе ја прифати оваа функција. „Не е исклучена можноста, но не е дефинитивна“.
Таравари ги коментира и резултатите од прегласувањето и истакна дека тие воделе на 8 мај и сега, како што рече тој, се во голема предност.
„ДУИ може да ги обжали резултатите, но резултатите се такви. Тоа беше очекувано и сега бранот промени не може да се запре, па ДУИ мора да го прифати резултатот. Граѓаните сега се ослободени, гласаат малку послободно од порано и посакувам ДУИ да ја прифати оваа реалност. Сега ‘Влен’ има еден пратеник повеќе, ДУИ еден помалку“, изјави Таравари.