Култура
(Видео) Николиќ и Јолевски за премиерата на „Отело“ во МНТ: Претстава за предрасудите и љубомората кои можат да бидат фатални за жената
По првата премиера, која се одржи на 16 ноември на сцената во Босанското народно позориште, Зеница – БиХ, во Македонскиот народен театар на 4 декември со почеток во 20 часот ќе биде одиграна скопската премиера на претставата „Отело“ од Вилијам Шекспир, а во режија на Нина Николиќ. Овој меѓународен проект е копродукција помеѓу Македонскиот народен театар, Босанското народно позориште, Зеница ― БиХ и „Перипетија продукција“, Скопје, во кој играат актери од двете земји, и тоа: Енес Салковиќ, Саша Ханџиќ, Дарја Ризова, Ѓорѓи Јолевски, Златан Шкољиќ, Aлександар Ѓорѓиески, Џенана Џаниќ, Тамара Миличевиќ-Стилиќ, Александар Михајловски и Аксел Мехмед.
Режисерката Николиќ вели дека оваа шекспирова драма ја актуелизира бидејќи смета дека темата што се отвора во „Отело“ и зборува за околности во кои Дездемона ќе биде жртва на агресијата и љубомората на некој начин ја опишува деструктивноста на овие емоции кои можат да доведат до фатален крај.
„На втората изведба на ‘Отело’ во Зеница имавме млада публика која очигледно не го знаеше Шекспировиот текст и претставата ја следеше до крај во исчекување каде ќе ги одведе и кога го видоа фаталниот крај на Дездемона не го сокрија чувството на пораз до што се може да доведе една доминација на машката агресија и љубомора и дека тоа може да заврши со смрт. Во атмосферата се чувствуваше дека оваа порака стигна до нив и затоа сметам дека оваа интерпретација на ‘Отело’ носи важна порака ви современиот свет“, вели Николиќ.
Претставата е специфична бидејќи има голема интернационална екипа, се игра на босански и на македонски јазик. За актерот Јолевски, кој игра три карактери во „Отело“, работата на оваа претстава била исклучително интересна и двојазичната игра докажува дека суштината на текстот и театарската игра го држат вниманието на гледачот, а актерите совршено се разбирале меѓу себе.
„Предрасудите се дел од карактерот речиси на сите ликови во ‘Отело’ кои не можат да се надминат себеси па ќе ја жртвуваат добрината и љубовта на Дездемона. Токму поради потенцирање на предрасудите како доминантни во ‘Отело’, а многу актуелни на овие простори, двојазичната актерска игра е од суштинско значење во оваа претстава. Целиот процес на подготовка беше многу интересен, од првото исчитување на текстот до неговата премиера. Задоволство беше да се работи со млада актерска екипа и со режисерката Николиќ“, вели Јолевски.
Во разговорот Јолевски остро го критикуваше и денешниот пристап кон театарот и културата.
„Ние сме центрифугално исфрлени од системот и сплескани на ѕидот, а ако уметноста е духот на народот во една држава тоа значи дека истото се случува со духот на народот. Наша должност е да се бунтуваме и да си го вратиме вистинското место иако политиката и бизнис-елитите доминираат во нашето општество“, вели Јолевски.
Драматургот на претставата е Тамара Барачков, сценографското решение е на Вишња Вујовиќ, Ивана Каранфиловска-Угуровска, костимограф, на сценските движења работел Димитриос Сотириу, текстот е во превод на Маја Трајаноска-Ивановска и Зина Агиќ, Крис Јегер, дизајн на светло, а композитор на музиката е Дуке Бојаџиев.
Билетите за премиерата и следната изведба, која е закажана на 5 декември, се пуштени во продажба преку онлајн-системот и на билетарницата во МНТ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.