Македонија
(Видео) Неврохирурзите од Македонија незаинтересирани за усовршување кај Мемет Озек, педијатриски неврохирург кој пет години нема изгубено пациент
Македонските неврохирурзи немаат интерес да супспецијализираат педијатриска неврохирургија кај еден од водечките детски неврохирурзи во светот – Мемет Озек, вработен во истанбулската болница „Аџибадем Алтунизаде“. Во оваа болница функционира посебен оддел за педијатриска неврохирургија, кој нуди и стипендии за лекари што бараат усовршување, но од Македонија, и покрај покажаниот интерес, не добиле ниту едно барање за соработка. Тимот на доктор Озек има 600-700 операции годишно, а последните пет години нема ниту еден починат пациент.
„Досега никој од Македонија нема стапено во контакт со мене ниту на телефон ниту по е-пошта, на ниеден начин. Вратите кај нас се отворени за сите“, вели Озек, кој тврди дека во Македонија има одлични неврохирурзи со кои може да соработува доколку покажат интерес за усовршување.
Кај него најчесто доаѓаат деца со тумори длабоко во мозокот, деца со спастицитет, со церебрална парализа, деца со вродени оштетувања на ‘рбетот и на ‘рбетниот мозок и деца со епилепсија. Озек вели дека најважно за успешните операции е да се реагира колку е можно порано, понекогаш и веднаш по раѓањето, но и милтидисциплинарниот пристап кон пациентите за што е потребен тим на чие формирање тој работи веќе 25 години.
„Повеќето од пациентите што доаѓаат кај нас имаат тумори во мозокот, деца со спастицитет, голем број од нив се деца со дијагноза церебрална парализа. За да работите со овие пациенти, мора да имате екипа. Мора да се работи со екипа во која има ортопед, невролог, неврохирург и доктор за анализа на движење, во екипата мора да има физиотерапевт, работиме со мултидисциплинарна екипа“, вели неврохирургот Озек.
Во неговата екипа има Македонец. Гостиварецот Енис Шабан веќе тринаесет години врши анализа на движењето на пациентите што доаѓаат кај нив. И тој е зачуден зошто македонските лекари не доаѓаат во Турција на усовршување, но вели дека ги разбира.
„Познавам многу колеги од Македонија, кои кога би дошле, би добиле многу искуство за нешто да се направи во Македонија. Кога ги гледам државите од Балканот, кога одам таму на семинари и на курсеви, сè некако ми личи дека не сме поминале од старото на нешто ново. Особено имаме проблем со старите генерации затоа што тие се останати меѓу комунизмот и капитализмот. Овие промени полека се случуваат во балканските земји. Со помладите специјалисти што сакаат нешто да научат имаме контакт. Јас сакам да дојдат овде бидејќи се од мојата земја, а и професорот има посебен однос оти една половина од неговата фамилија е од Призрен. Тој многу цени да работи со луѓе што доаѓаат од Балканот. Во нашата екипа голем број од колегите се од Балканот. Луѓето што доаѓаат од Балканот се многу вредни, многу работат и многу се бистри, вели професорот. Планот за соработка со колегите е уште од 2010 година, секогаш сакавме нешто да направиме, но бавно оди. Не знаеме како да ја забрзаме оваа ситуација“, вели Шабан.
Тој смета дека државната неврохирургија во Македонија може да биде и подобра имајќи предвид колку неговите колеги овде се трудат, но сепак вели дека некои работи не зависат само од нив, туку и од технологијата.
Нивниот тим во „Алтунизаде“, болницата во Истанбул, користи најнова технологија за снимање на пациентите. Имаат магнетна резонанција која не само што го снима туморот во мозокот туку прецизно го следи и неговото движење, што ја олеснува операцијата. Тимот прави и ендоскопски операции како помалку инванзивна метода.
Половина од пациентите се од странство, а меѓу нив често имаат пациенти и од Македонија. За децата од Турција нема олеснувања во плаќањето, операциите ги плаќаат приватно оти немаат договор тоа да биде на државен трошок.
„Во 21 век, ако сакате добра дијагностика и добро лекување, потребна е голема и добро развиена технологија. Развиената технологија, за жал, не е бесплатна. Цените се движат од 5 до 40 илјади долари во зависност од дијагнозата. За тумор, во зависност од местото каде што се наоѓа, цената на операцијата е од 25 до 40 илјади долари“, вели Озек.
Тој до неодамна бил и претседател на Здружението на педијатриските неврохирурзи на Европа и вели дека се многу ретки болниците во светот што работат со тимови за педијатриска неврохирургија. Во Европа такви тимови има во Лондон и Париз.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Околу 36 килограми марихуана запленила Царинската управа пред два дена
Директорот на Царинската управа, Бобан Николовски, на денешниот настан за реконструкција на граничниот премин Деве Баир, објави дека пред два дена Царинската управа запленила 36.4 килограми опојна дрога марихуана на граничниот премин Блаце, додека вчера на Jажинце бил спречен шверц на голема количина лекови.
„Од 1 јули до 30 септември годинава или за последното тримесечје, за 70 отсто е зголемен бројот на случаи на заплени, споредено со истиот период 2023 година, лани во тој период биле 54, со 73.631 запленето парче, додека годинава бележат 92 заплени, со 396.592 парчиња. Тоа значи дека за она што се бориме, а тоа е професионално врешење на работата на царинските службеници, тоа и се забележува, резултатите се видливи и мерливи, и од аспект на финансии, полнење на буџетот, но и од аспект на нашето оперативно работење. Со реконструкцијата на управната зграда ќе добиеме нови помодерни услови, современи услови за работа на царинските но и на полициските службеници, но се создаваат и услови за подобро оперативно работење, што за нас како службеници е многу битно, со фокус на квалитет, што значи откривање и спречување на недозволената трговија со забранети стоки“, рече Николовски, објавувајќи ја големата заплена од пред два дена на Блаце.
Македонија
Министерот Тошковски најави ново средно полициско училиште
„Факт е дека затекнавме хаос, револтирани граѓани и изгубено достоинство. Со макотрпна и посветена и организирана работа го решивме проблемот со издавање лични документи. Нема веќе гужви со часови. Во насока на доближување на условите на МВР до граѓаните и остварување на нивните права, отворивме канцеларии на управни служби во Општина Јагуновце и Матејче и во идниот период ќе се отворат повеќе такви канцеларии секаде каде што немало за граѓаните полесно о побрзо да ги остваруваат своите права и полесен и побрз пристап до нашите услуги“, истакна денеска министерот за внатрешни работи Панче Тошковски на прес-конференција по повод 100 дена од новата Влада.
Во насока на унапредување на условите на условите за работа и градење на задоволна и ефикасна полиција министерот, Тошковски го потенцираше почетокот на целосното реконструирање на Центарот за обука на МВР, планот за изградба на нови полициски станици и преземање на напуштени и неискористени објекти и нивно профункционирање, како и отворањето на новиот Регионален К9 центар за обука и сертификација поддржан од мисијата на ОБСЕ.
„Во наредниот период најавувам ново средно полициско училиште. После прва и втора година средно образование, идните млади полицајци трета и четврта година ќе можат да ги поминат во рамки на средното полициско училиште коешто ќе биде лоцирано токму во центарот за обука. Овој тренд е имплементиран и во земји од ЕУ бидејќи нашите анализи покажуваат дека професионалниот капацитет на полициски службеници коишто биле едуцирани во рамки на средно полициско училиште е далеку повисок така што ова ќе биде еден од основните фокуси на МВР во следниот период“, потенцираше министерот.
Тој посебно го нагласи проблемот со немањето на соодветни полициски униформи за полициските службеници и истакна дека веќе интензивно се работи за набавка на нови практични и квалитетни полициски униформи.
„Се надевам дека веќе следната година сите полициски службеници ќе можеме да ги облечеме, во соодветни, практични и достоинствени полициски униформи какви што тие заслужуваат, а граѓаните очекуваат од својата полиција“, дециден беше министерот Тошковски.
Тошковски ги истакна и одлуките за исплаќање на финансиски средства за хранарина за подолга работа од три часа во ноќна смена, што во минатото предизвикувало генерирање огромен број тужби против министерството и промена на колективниот договор за финансиска награда за новороденче и кон полициските службеници од машки пол со тоа надминувајќи ја дискриминацијата која била правена порано со награда само на вработените од женски пол.
Во делот на дигитализација на процесите кој е еден од главните фокуси како на министерството така и на Владата, министерот ги истакна проектите како мобилната апликација „Џастис РБН за родово базирано насилство“ за постапување на полициските службеници по случаи за родово базирано насилство, новиот софтвер за менаџмент на воздухопловни полициски операции и меморандумот за користење на системот „Безбеден град“ со над 220 надзорни камери во Кавадарци.
„Зголемено присуство на полицијата, побезбедни граѓани“ е мотото под кое МВР работи за обезбедување на граѓаните како на Скопје, така и на државата со цел доведување на безбедносната состојба на ниво на кое е задоволителна.
„Граѓаните на државата, а посебно на Скопје се сведоци на унапредување на безбедносната состојба во изминатиот период. Имавме голем број на спроведени акции во овие 100 дена, со голема успешност, констатирани прекршоци. Имавме и голем број приведени лица, лица барани со потерници, лица избегани од затвори или сториле одредено кривично дело. Сето тоа беше верификувано со голем број кривични и соодветни пријави и оваа акција даде многу добри резултати и ќе продолжи и во иднина“, нагласи министерот.
Во борбата со пожарите, Тошковски нагласи дека и покрај уништениот систем од претходно, сепак хеликоптерската единица на МВР е главниот столб во делот на справувањето со пожарите кои беснееја ова лето.
„Хеликоптерите на МВР имаат над 350 летечки часа во текот на летото со исфрлени над 3.400 тони вода без пожарите. 10 часа беа остварени во реализирани седум потраги и спасувачки акции и имаме два медицински лета 15 летачки часови“, акцентираше Тошковски.
Македонија
Есенската кошничка овозможува намалување на цените, вели премиерот Мицкоски
Премиерот Христијан Мицкоски смета дека есенската кошничка овозможила намалување на цените на одредени производи, особено на оние од житарки за околу 10 проценти. Тој додава дека надополнето со ученичката којшничка, која овозможила намалување на одредени производи и до 20 па и 30 проценти, овозможува заштеда за граѓаните. Според него, дополнително за подобрување на стандарот придонесува и ниската инфлација, која, како што рече, за август изнесува 2,2 проценти.
„Морам да кажам дека сме исклучително задоволни од тоа што се случува во одредени маркети, не во сите, бидејќи во некои за жал имаме и шпекулативно однесување. Но, онаму каде што се намалени цените тие се намалени со оваа таканаречена есенска кошничка некаде и повеќе од 10 проценти. Особено тоа се однесува на производите кои се од житарици“, рече Мицкоски одговарајќи на прашања по поставувањето камен темелник на нов објект на терминалот за стоково царинење со што се означува почетокот од надградбата и реконструкцијата на граничниот премин Деве Баир.
Тој додаде дека со таканаречената ученичка кошничка дел од производите се намалиле и за 20, а некаде и 30 проценти. Тоа, вели, е голема заштеда за граѓаните која, исто така, влијае на стандардот. Дополнително рече, добро за стандардот на граѓаните е тоа што во август стапката на инфлација изнесувала 2,2 проценти.
„Не така одамна, пред една година стапката на инфлација беше 20 отсто и тоа беше директен удар на стандардот на граѓаните. Сега имаме ниски цени, инфлација која е најдобра во регионот и најдобра во евроа и ќе носиме мерки и политики дополнително да ја намалиме. Се сеќавате претходната Влада кажуваше дека инфлацијата е увезена, иако таа во тој момент беше двапати поголема од ЕУ земјите. Сега е двапати пониска од земјите од Европската унија“, додава премиерот.
Тој додаде дека како Влада продолжуваат да работат посветено, одговорно и чесно. Нас, рече, не плаќаат граѓаните и мора да го слушаме гласот на народот, бидејќи нема друга алтернатива.