Регион
Орбан, ако треба, ќе крева ограда и кон Хрватска
Унгарскиот премиер Виктор Орбан предупреди во четвртокот вечерта во Брисел дека неговата земја би можела да подигне ограда и на границата со Хрватска, каква што веќе изгради кон Србија, доколку од таму тргне поголем прилив мигранти.
На крајот од својата посета на Брисел, каде што се сретна со европските челници, унгарскиот премиер, кој беше пречекан со критики поради подигнувањето на заштитната ограда по должина на 175 километри долгата граница со Србија, на прес-конференцијата изјави дека, доколку биде потребно, ќе изгради таква ограда и на границата со Хрватска, пренесува агенцијата Hina. Виктор Орбан истакнал дека Унгарија мора да ги брани своите граници.
„Доколку мораме да подигнеме ограда меѓу Унгарија и Хрватска, тоа ќе го сториме“, изјавил Орбан, додавајќи дека тоа би било полесна работа, бидејќи постои природна пречка – река, отколку оној при подигнувањето на оградата кон Србија, каде таква природна бариера нема.
Орбан, исто така, нагласил дека Унгарија не сака да прими голем број муслимани.
„Сметам дека имаме право да одлучиме дека не сакаме голем број муслимани во својата земја. Не ни се допаѓаат последиците“, истакнал Орбан алудирајќи на 150-годишната историја на османлиско владеење со Унгарија во XVI и XVII век.
Европската унија се соочува со најголемата мигрантска криза од крајот на Втората светска војна. Оттаму, Европската комисија подготвува нов предлог за распределување на 120.000 мигранти од Грција, Италија и Унгарија во сите земји членки на ЕУ. Се подготвува предлог, кој претседателот на Европската комисија, Жан-Клод Јункер, би требало официјално да го објави на 9-ти септември, во неговиот говор за ситуацијата во ЕУ во Европскиот парламент.
Со предлогот од мај за распределбата на 40.000 бегалци, кои дојдоа во Грција и во Италија, сега вкупниот број бегалци кои би требало да се распределат по ЕУ се искачи на 160.000. Притоа би се користел истиот критериум за распределување кој беше употребен и за првичната квота од 40.000 мигранти.
Но меѓу земјите членки не постои согласност и досега успеаја да се договорат за распределба на 32.000 луѓе. На задолжителните квоти за примање бегалци, особено се противат земјите од средна и источна Европа, кои и не се толку финансиски силни, а, постои стравување и од приливот на значителна бројка доселеници муслимани, со кои овие земји историски немале контакти, и имајќи ги предвид случувањата во западниот дел од континентот во контекстот на глобалната ситуација со тероризмот од радикални исламистички позиции.
Обврзувачките квоти ги поддржуваат двете највлијателни членки на ЕУ, Германија и Франција, за што во четвртокот се договорија канцеларката Ангела Меркел и претседателот Франсоа Оланд./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Tлото на Балканот се тресе: По Хрватска, земјотреси и во Албанија и Грција
Два земјотреси, во растојание од една минута – во 19.19 и 19.20 часот – вечерва се регистрирани на територијата на Албанија.
Земјотресите се со интензитет од 2,1 степен според Рихеровата скала.
Епицентарот на првиот земјотрес бил на седум километри од Елбасан, додека вториот на 62 километри од Тирана.
Според информациите на ЕМСЦ, неколку минути претходно, земјотрес од 2,5 степени имало и во јужниот дел од Грција, а уште два од 2 и 2,3 степени се регистрирани предмалку на Крит.
Претходно денес, Хрватска ја погоди силен земјотрес од 4,7 степени, а беше почувствуван и во Босна и Херцеговина. По овој потрес, следеа неколку помали.
Регион
Не ги навредив Бугарите, туку ја критикував нашата влада, објасни хрватскиот претседател по изјавата на која реагираше Софија
Хрватскиот претседател Зоран Милановиќ изјави дека со изјавата дека Хрватска е „на дното на ЕУ по повлекувањето на европските пари, а само Бугарија е полоша“, не ги навредил Бугарите, туку ја исмејува хрватската влада која прави „будали и социјални случаи“ од нејзините граѓани.
Милановиќ претходно рече дека „Хрватска е дното на Европската унија и дека само Бугарија е полоша“, па секој ден се молат на Бога, Бугарија да остане последна и ништо да не и се случи, бидејќи во спротивно би била Хрватска“. По изјавата, според хрватските медиуми, Бугарите ја повикале хрватската амбасадорка во Софија, Јасна Огњеновац и изразиле незадоволство, пренесува порталот „Индекс“.
Бугарското Министерство за надворешни работи на хрватскиот амбасадор му пренело „длабоко разочарување од изјавата на претседателот Милановиќ“, каде што истакнале „дека изјавата е неприфатлива за Бугарија и не е во согласност со одличните билатерални односи меѓу Хрватска и Бугарија“.
Тие истакнаа и дека се надеваат дека „хрватската влада ќе се огради од таа изјава“.
„Не ги навредив Бугарите, туку исмевав некои елементи на хрватската влада кои не’ прават будали и социјален случај“, рече шефот на хрватската држава и додаде дека претходно ја критикувал земјата на тема повлекување европски пари.
„Дали можеме да кажеме дека Хрватска се моли Сингапур последен да подигне пари? Дали тоа звучи подобро? Но, Сингапур не е европска земја. Значи некој мора да биде последен. Тоа е Бугарија, а Хрватска е претпоследна“, рече Милановиќ и потсети дека тоа се статистички податоци и дека тоа досега го кажал десет пати.
„Тоа е потсмев, за жал, на сметка на некои во Хрватска кои не прават социјален случај, кои не можат да земат доволно европски средства, па затоа сме претпоследни. Нормално, гледаш кој е последен. Бугарија е последна, секогаш е последна (…) Хрватска е претпоследна“, рече Милановиќ.
„И тоа е факт за кој зборував десет пати. Алелуја (…) Тоа се факти за кои мора да се разговара во политиката бидејќи се многу релевантни податоци. Зошто Хрватска е претпоследна? Зошто не е петата одоздола, или петта одозгора. Зошто не е? Веројатно некој е одговорен за тоа“, додаде тој.
На крајот, како што додаде, никој не се моли Бугарија да пропадне, туку дека неговата изјава е верзија на американската шега за сојузната држава Арканзас, која „се моли на Бога Мисисипи, кој е најсиромашниот, да биде здрав и добро“, бидејќи во спротивно тоа би бил Арканзас.
„За да го знаете тоа, треба да прочитате нешто во животот, а не да се занимавате со селски скандали“, рече Милановиќ.
Регион
Земјотрес со јачина од 4,7 степени во Хрватска, почувствуван и во БиХ
Земјотрес со јачина од 4,7 степени според Рихтеровата скала утрово во 05:38 часот е регистриран во Хрватска, објави Европскиот медитерански сеизмолошки центар (ЕМСЦ).
Според информациите од Европскиот медитерански сеизмолошки центар, земјотресот бил на 92 километри јужно од главниот град Загреб и на 14 километри од границата со Босна и Херцеговина, кај Тржачка Раштела.
Земјотресот бил на длабочина од 10 километри.
Земјотресот најмногу бил почувствуван во централна Хрватска и во дел од Босна и Херцеговина со интензитет од V-VI степени според Европската макросеизмичка скала.
Засега нема извештаи за повредени лица или за предизвикана материјална штета.