Турскиот министер за надворешни работи Хакан Фидан денеска изјави дека Турција сака да стане членка на БРИКС.

„Секако, би сакале да станеме членка на БРИКС. Ќе видиме како ќе биде оваа година“, изјави Фидан во Пекинг, за време на тридневната посета на Кина, пишува „Саут Чајна Морнинг пост“.

Фидан додаде дека со нетрпение очекува да присуствува на состанокот на министрите за надворешни работи на земјите-членки на БРИКС, што ќе се одржи следната недела во Русија, како дел од подготовките за октомврискиот самит во Казан.

Се очекува една од темите на агендата да биде можноста Турција да се приклучи на БРИКС, пишува „Саут Чајна Морнинг пост“.

Фидан смета дека БРИКС е „добра алтернатива“ на Европската унија за Турција, кога станува збор за подобрување на економските перспективи на Турција.

Министерот додаде дека еден од важните столбови на турската надворешна политика е формирањето на силни економски врски во институционална форма.

Тој посочи дека поради „идентитетската политика“, некои големи земји од Европската унија никогаш не дозволиле Турција да стане полноправна членка на европскиот блок, иако таа долго време се обидуваше да се приклучи.

„Значи, мора да барате други алтернативи“, потенцира Фидан.

Турскиот министер истакна дека БРИКС „има уште долг пат да помине“, но дека е важна платформа за соработка која нуди добри можности.

Портпаролот на рускиот претседател Дмитриј Песков изјави дека Кремљ го поздравува интересот на Турција за БРИКС и дека на оваа тема ќе се разговара на претстојниот самит на организацијата во Казан, пренесува „Комерсант“.

Во неделата од надојдената река кај Удине во Италија беа извлечени телата на две девојчиња од Балканот, кои во петокот ги однесе поројот.

Потрагата трае веќе четврти ден, а италијанските медиуми ги пренесоа шокантните зборови на мајката на една од жртвите.

Мајката на Патриша Кормос (20), чие тело беше пронајдено на околу километар од местото каде последен пат беше видена како се гушка со својата пријателка Бјанка и Кристијан, е неутешна по смртта на нејзината ќерка.

Таа им се обрати и на луѓето кои ја гледаа драматичната сцена од мостот и пријателките кои се гушкаат, чии снимки го расплакаа регионот.

„Наместо да снимаат, можеле да ја спасат“, рекла неутешната мајка.

Таа истакнала дека нејзината ќерка неколку пати повикала помош.

„Го оставила своето име, адресата, им рекла: Јавете и се на мама“, рекла неутешната мајка.

„Најмногу ме боли тоа што сите ги сликаа и снимаа и никој не ги спаси. Никој. Можеби можеа да ги спасат. Не е најважно да се направи видео”, рекла мајката на Патриша.

За прв пат по петочната драма, мајката на Патриша излезе со соопштение.

„Таа беше ангел, учеше и работеше. По испитот на факултет во петокот наутро ми кажа дека е многу добро, дека знае се”, рекла мајката.

Медиумите потсетуваат дека тројцата млади луѓе исчезнаа во петокот околу 14 часот. Наводно се сликале покрај реката, кога нивото на водата наеднаш почнало да расте. Кога водата стигнала до нивните глуждови и колена, тие се прегрнале и чекале помош, надевајќи се дека ќе можат да се справат со силата на реката.

Спасувачите не успеале да ги извлечат, а младите исчезнале во поројот. Видеото од нивната последна прегратка го обиколи регионот.

Во меѓувреме била пронајдена чантата на Патриша, а внатре и бил телефонот.

Во близина е пронајден автомобил со романски регистарски таблички, а медиумите објавија дека исчезнале млади луѓе од Романија.

Педофилите прогласени за виновни за сексуално злосторство врз дете во американската сојузна држава Луизијана наскоро, покрај затворската казна, би можеле да бидат подложени и на хируршка кастрација, пишува „Sky News“.

Политичарите од Луизијана вчера го одобрија нацрт-законот кој ќе им овозможи на судиите да издаваат налози за осудените за одредени тешки сексуални злосторства против деца помлади од 13 години.

Доколку предлогот стане закон, тој ќе важи само за мажи и жени чие кривично дело се случило на или по 1 август годинава.

Од 2008 година, судиите во Луизијана имаат овластување да им наредат на осудените за такви злосторства да се подложат на хемиска кастрација. Овој метод вклучува употреба на лекови кои го блокираат производството на полови хормони за да го намалат либидото.

Хируршката кастрација е многу поинвазивна процедура. Неколку други држави, вклучувајќи ги Калифорнија, Флорида и Тексас, исто така веќе имаат закони кои дозволуваат казнување на хемиската кастрација.

Во некои од овие земји, прекршителите можат да се одлучат за операција доколку сакаат.

Предлог-законот вчера доби огромна поддршка во двата дома во кои доминираат републиканците. Гласовите против законот дојдоа најмногу од демократите, но автор на оваа мерка е политичар од Демократската партија.

Предлог-законот сега оди на масата на конзервативниот гувернер Џеф Ландри, кој ќе одлучи дали ќе го потпише како закон или ќе стави вето. Во Луизијана во моментов се затворени 2.224 лица за сексуални злосторства врз деца помлади од 13 години.

Демократката Регина Бароу, рече дека усвојувањето на законот е чекор напред во казнувањето на ужасните злосторства. Таа се надева дека законот ќе послужи како средство за спречување на ваквите злосторства врз децата.

„Зборуваме за бебиња кои се злоставувани од некого. Тоа е неоправдано“, рече Бароу за време на состанокот на одборот во април, според „Скај њуз“.

Додека кастрацијата често се поврзува со мажи, Бароу рече дека законот може да важи и за жените. Таа нагласи и дека казните ќе се засноваат на поединечни случаи.