Министерството за надворешни работи и надворешна трговија се огласи по објавите во српските медиуми за тројно убиство во Боливија, во кое наводно еден од убиените е македонски државјанин.

Од министерството информираат дека македонската амбасада во Бразил е во постојан контакт со Амбасадата на Боливија во Бразилија.

„За потврда на идентитетот на жртвите се очекува завршување на обдукцијата, која сè уште е во тек. По добивањето на официјална информација од боливиските власти за идентитетот на жртвите и околностите на настанот, Министерството ќе ја информира јавноста“, соопштија од МНР.

Медиумите синоќа објавија дека телата биле пронајдени во црни пластични ќеси. Според неофицијалните информации, тие биле мачени, а потоа и ликвидирани во Боливија, пренесува белградска „Политика“. Убиениот македонски државјанин, како што пишуваат медиумите, е Дејанчо Л. oд Струмица, а уште еден, српски државјанин од Ниш, бил предводник на меѓународна организирана криминална група која се занимавала со дистрибуција на големи количини на кокаин од Јужна Америка на теротории на одредени земји во Западна Европа. Неофицијално дел од медиумите во Србија денеска споменуваат и дека третиот од тројцата убиени бил Бугарин.

Денеска е пуштена во употреба клучката Подмоље, која го спојува Охрид со Струга, како и Македонија со Албанија, информира потпретседателот на Владата и министер за транспорт Александар Николоски.

„Денеска решаваме уште еден горлив проблем во изградбата на автопатот Охрид-Кичево, а тоа е пуштањето во употреба на клучката Подмоље. Ова беше наследен проблем од минатото, бидејќи претходната власт делумно го работеше проектот погрешно, ја сруши клучката без решени имотно-правни односи и експропријации. Со формирањето на новата влада предводена од ВМРО-ДПМНЕ, ги решивме сите административни пречки и од денеска клучката е функционална, што значи побрз и побезбеден сообраќај за Струга и соседна Албанија кон Скопје“, изјави Николоски.

Тој посочи дека работите на автопатот се во забрзана динамика и дека се координираат на дневна основа со директорот на Јавното претпријатие „Државни патишта“ и премиерот Христијан Мицкоски.

Премиерот Мицкоски додаде дека се работи на стабилизирање на делниците со свлечишта, како што се околината на селото Ботун и просторот од тунелот кај Врбљани до Кичево, за целата траса да биде безбедна за возење.

„Се работи паралелно на сите критични точки, а очекуваме есенва да се завршат градежните и теренските работи на овие делници. Во исто време, со несмалена динамика се одвива изградбата на други автопатски делници – Тетово-Гостивар, Гостивар-Букојчани и Прилеп-Битола. Во фаза на евалуација се и тендерите за Букојчани-Кичево и Г.П.Блаце-Скопје“, рече Мицкоски.

Премиерот потенцираше дека оваа офанзива ќе резултира со завршување и заокружување на автопатската инфраструктура во Македонија, по повеќе од една деценија. Тој се заблагодари на компаниите, работниците, градоначалниците и пратениците од охридско-струшкиот регион, како и на граѓаните за трпението.

„Подобро е патот да се заврши и да биде функционален, отколку да остане незавршен и да биде споменик на едно време“, заклучи Мицкоски.

Договорен е распоредот за разговорите меѓу американскиот претседател Доналд Трамп и рускиот претседател Владимир Путин, изјави советникот на Кремљ, Јуриј Ушаков.

Тој рече дека тоа ќе биде приватна средба, со преведувачи, за време на која ќе се дискутираат чувствителни прашања.

Централна тема на состанокот ќе биде решавањето на кризата во Украина, но двајцата лидери ќе разговараат и за трговската и за економската соработка, рече Ушаков.

Средбата ќе почне во 11.30 часот по локално време, а времетраењето на разговорите ќе зависи од тоа како ќе се одвива дискусијата, рече Ушаков.

На крајот од самитот двајцата ќе одржат заедничка прес-конференција. Трамп и Путин ќе имаат и поширок состанок со делегациите и работен појадок, објави „Скај њуз“.