Македонија
(Видео) Арсовски: Само обвинителството е глуво за можниот криминал на власта и рекетот на бизнисменот Тошевски

Јавното обвинителство е во спрега со власта на Зоран Заев и тоа е јасно како ден за секој еден граѓанин. Поминаа неколку дена од јавно признание на бизнисменот Киро Тошевски, кој на национален медиум на гостување самиот потврди дека бил предмет на рекетирање од страна на братот на премиерот Зоран Заев, Вице Заев, кој ѝ е добро познат на јавноста како главниот бизнисмен на фамилијата која голем дел од државните тендери ги има под своја капа, изјави портпаролот на ВМРО-ДПМНЕ, Димче Арсовски.
„Во најмала рака Јавното обвинителство требаше да отвори случај и да го истражи по допрен глас, да ги истражи сите индиции за рекетирање на бизнисмени и тоа во случај кога рекетарот кој се споменува јавно на телевизија од страна на жртвата е братот на премиерот на државата, и веднаш да ги расчисти сите сомнежи за рекет на фамилијата Заеви.
Јавното признание коешто беше посочено од страна на бизнисменот Тошевски во петокот говори дека тој лично бил цел на закани, уцени и навреди од страна на братот на премиерот Вице Заев со цел да му се обезвредни атрактивен имот и истиот да биде купен по багателна цена. Посочено беше дека бил повикуван на разговори во еден струмички угостителски објект, а дополнително бил контактиран и од самиот Зоран Заев.
Бизнисменот говори дека со административни постапки во општина Гази Баба, каде што градоначалник е од редовите на СДСМ му бил континуирано обезвреднуван имотот со крајна цел тој да заврши во рацете на фамилијата Заеви, всушност и не можеме да очекуваме нешто друго од нив. Повторно, огромен скандал за рекетирање, се обидуваат да го заташкаат на секој можен начин.
Според тврдењата за кои требаше да чуе и обвинителството, вмешани биле сите и Заеви и Муареми и Кирацовски и Катица Јанева и Боки 13, ама изгледа целата јавност слушна, само обвинителството е глуво за можниот скандал и криминал на власта.
Затоа прашуваме кога ќе се отвори истрага за овој случај и кога ќе се расчистат сите сомнежи во врска со овој случај? Еве зошто Заев не сака независно обвинителство и независен правосуден систем. Но, сакал или не Зоран Заев, по 12 април, сите сомнежи и индиции за криминал ќе бидат расчистени и правдата ќе дојде на свое место“, порача Арсовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
УЈП со повик за исполнување на ДДВ обврските: евидентирана е загрижувачка состојба

Управата за јавни приходи информира дека заклучно со 25 јули 2025 година евидентирана е загрижувачка состојба во однос на исполнувањето на обврските поврзани со данокот на додадена вредност (ДДВ).
„Според последните податоци: не се поднесени ДДВ-пријави од 142 месечни и 2.134 тримесечни обврзници. Пријавен, но неплатен ДДВ-долг е евидентиран кај 1.326 месечни и 7.748 тримесечни обврзници.
Директорката на Управата за јавни приходи, Елена Петрова, со порака: „Непочитувањето на законскиот рок е сериозен прекршок. Сите обврзници кои не поднеле ДДВ-пријава или не го платиле ДДВ-долгот се повикуваат итно да постапат согласно законските прописи. Даночната дисциплина не е избор, туку законска обврска и одговорност на секој граѓанин и компанија, темел за функционална држава.“
Управата за јавни приходи, како што додаваат во информацијата, веќе доставила персонализирани известувања до сите ДДВ-обврзници кои имаат пријавен, а ненаплатен долг за соодветниот даночен период.
„Преку координирано постапување и интензивна комуникација со даночните обврзници и со сметководителите, се спроведува целосен сет активности и мерки — со цел да се избегнат блокади на сметки и дополнителни трошоци за присилна наплата. За секој ден на задоцнување, се пресметува камата во износ од 0,03% од преостанатиот долг. По доставата на опомените, управата ќе пристапи кон присилна наплата кај сите обврзници кои нема да го подмират долгот доброволно. Со цел навремено информирање и исполнување на обврските, како и обезбедување солидна даночна историја, УЈП останува во постојана комуникација со сите релевантни страни“.
Македонија
Владата донесе одлука за промена на таблиците на службените возила и отворање на конзулат во Корча

Владата на денешната 97 седница донесе одлука сите државни институции да ги променат регистарските таблици на службените возила со новите таблици со боја најдоцна до 15 септември 2025 година. Оваа одлука е во насока на уште едно реализирано ветување пред граѓаните со цел поголема отчетност, транспарентност и ставање крај на злоупотребите кои со биле пракса во минатото, соопшти владината служба.
Дополнително, Владата на предлог на Министерството за надворешни работи и надворешна трговија донесе одлука за отворање на генерален конзулат во Корча со јурисдикција во целиот регион. „Граѓаните мора да имаат брз и ефикасен сервис и услуги, поддршка за културни, образовни и економски врски.
Владата продолжува со конкретни мерки и политики кои имаат за цел да ја потврдат вистинската грижа за подобрување на стандардот и враќање на довербата на граѓаните во институциите“.
Македонија
Со запален факел се обидел да подметне пожар во Струмица: под истрага едно лице за загрозување на општата сигурност

Јавен обвинител од Основното јавно обвинителство Струмица донесе Наредба за спроведување истражна постапка против едно лице за обид да изврши – Тешки дела против општата сигурност од член 292 став 1 во врска со член 288 став 1 од Кривичниот законик.
Осомничениот вчера попладне, преку една социјална мрежа, се заканил на лице од Струмица дека ќе му ја запали викендицата, а потоа се обидел заканите да ги реализира.
На локацијата брана Водоча се обидел да подметне пожар и да предизвика поголема имотна штета. Со запален факел од хартија и текстил ги запалил гредите на натстрешницата, кои започнале да чадат и да горат. Со тоа предизвикал ризик од пожар не само на објектот, туку и на повеќе други викенд-куќи и на нискостеблеста и високостеблеста вегетација во непосредна близина.
Поради опасност од бегство и можност да го повтори односно да го доврши делото, јавниот обвинител до судијата на претходна постапка достави предлог за определување мерка притвор.