Неколку илјади луѓе протестираа во саботата во повеќе градови низ Романија против владата којашто ја обвинуваат дека се обидела да го „попречи“ гласањето на Романците во странство во првиот круг од претседателските избори кои се одржаа минатата седмица во кој победи актуелниот премиер Виктор Понта.

Според многуте искази, илјадници Романци не можеле да гласаат на 2-ри ноември поради недоволниот број избирачки места отворени во западните земји, како Франција, Германија и Велика Британија.„Сакаме слободни избори“ и „Понта, не заборавај, младите не се со тебе“, извикувале демонстрантите во Клуј, каде што според процените на полицијата имало речиси седум илјади демонстранти.Околу 1.500 луѓе во центарот на Темишвар бараа оставка на премиерот Виктор Понта. Во овој град инаку во декември 1989 година избувна антикомунистичкиот бунт кој заврши со падот на диктаторот Николае Чеушеску и негова ликвидација заедно со омразената во народот негова сопруга Елена.„Денеска во Темишвар, утре во целата земја“, извикувале демонстрантите, што локалните медиуми ги потсети на протестите против комунистите пред 25 години.По неколку стотици демонстранти се собрале и во главниот град Букурешт, како и во Ореадеи и Констанца.„Излеговме на улиците за да се увериме дека сето она што се случуваше во неделата нема да се повторни на 16-ти ноември (кога се одржува вториот изборен круг). Ова е израз на солидарност со Романците во дијаспората“, изјавил за AFP младиот демонстрант во Букурешт, Александру Алексе.Претседателот на заминување Трајан Басеску, од десниот центар, го повика во саботата министерот за надворешни работи Титус Корлатеану да поднесе оставка поради „дезинформирањето“. Корлатеану, имено, најавувајќи подобра организација на гласањето во вториот круг во странство, во прв ред со зголемување на гласачките кабини, изјави дека министерството не може да отвори повеќе избирачки места, бидејќи тоа не го дозволувал законот, што го демантираше Централната изборна комисија.Понта победи во првиот круг од претседателските избори со 40,44 отсто од гласовите, а кандидатот на десницата, Клаус Иоханис доби 30,37 проценти. Меѓутоа, Иоханис доби 46 отсто гласови од романските избирачи во дијаспората, за која главно се смета дека е ориентирана кон десницата, додека Понта освои 18 отсто.Претседателските избори се сметаат за важни во оваа поранешна комунистичка земја, сега членка на НАТО и втората најсиромашна земја во Европската унија, каде што постои страв дека доколку победи Виктор Понта, сегашната политичка владејачка гарнитура ќе ја преземе и контролата на правосудството./крај/мф/сн

Извор: AFP