Македонија
(Видео) Заев и Царовска со децата од малите групни домови: Сонувајте големи работи, ние ќе ве поддржиме за да си ги остварите соништата
Децата од малите групни домови од поранешните институции „11 Октомври“, „25 Мај“ и „Ранка Милановиќ“ денеска предновогодишно се дружеа со претседателот на Владата, Зоран Заев, и со министерката за труд и социјална политика, Мила Царовска. На неформалното дружење децата пееја, играа и раскажуваа како им е исполнет денот во новите домови, кои тие ги нарекуваат дома, но раскажуваа и кои им се соништата што сакаат да си ги остварат.
Тие добија и новогодишни подароци од Владата, а како благодарност за гостопримството на претседателот на Владата и на министерката Царовска им подарија фотографии, кои сами ги фотографираа на фотосафари како дел од едукативна работилница за фотографија.
„Бескрајно сме среќни и благодарни што имаме можност да ја посетиме Владата. Ова се случува првпат поради што сме многу возбудени“, рекоа воспитувачите од малите групни домови.
Заев на дружењето рече дека со отворањето на малите групни домови целосно е променет концептот за грижа кон децата во Северна Македонија.
„Сакам да ви кажам дека сме тука, стоиме зад вас, вие сонувајте и остварувајте си ги сите соништа што сте си ги зацртале, наша света задача е да ве поддржиме и да ви помогнеме во остварувањето на вашите соништа“, им посака премиерот на децата.
„Најважно од сè е вистински да го слушнеме гласот на секое дете. Да им помогнеме, да ги поддржиме, бидејќи само со слушање на гласот на децата ние ги поставуваме темелите врз кои треба да ги креираме идните политики. Заеднички да изградиме општество во кое нашите млади ќе сакаат да живеат, каде што ќе може безбедно и среќно да растат, да се развиваат и да успеваат“, рече премиерот Заев.
Министерката Царовска рече дека децата се непроценлив потенцијал за развојот на една држава и затоа оваа Влада овозможува секое дете да расте и да го развива својот потенцијал, кој е значаен за општеството.
„Ова е преемотивно за мене. Вие сте нашата гордост!“, истакна министерката Царовска
преку песни и креативни точки децата го пресликаа своето секојдневие и раскажаа за своите таленти.
„За секое дете – љубов затоа што ништо друго на светот не е поважно од децата и ниту едно дете не смее да страда и да живее во страв. Деца што добиваат поттик во својот развој, деца што веруваат во себе, кои се истрајни, емпатични и кои учат и откриваат нови нешта, знаат како да се справат со разочарувањата. Тогаш ние создаваме просперитет, како и понапредни, посилни, поуспешни и побезбедни општества“, рече Царовска.
По дружењето во медија-центарот, децата имаа можност да ја разгледаат Владата. Премиерот ги однесе во својот кабинет, ја видоа и салата за седници на Владата, по што премиерот ги угости во својот кабинет, како и во свечената сала.
Во салата за седници децата ги презедоа улогите на министрите и заедно со премиерот Заев и министерката Царовска изгласаа едногласна одлука на детската влада на Република Северна Македонија, а таа гласеше: „сите деца во нашата земја треба да се среќни!“
Со процесот на деинституционализација Министерството за труд и социјална политика една година порано од планираното успеа да ги извади сите деца од институциите. Досега во целата држава се отворени 22 групни дома, во кои во атмосфера, која личи на семејната, живеат 180 деца. Министерството за труд и социјална политика продолжува посветено да се грижи за секое дете и да ја јакне јавната свест за потребата, значењето и користа од процесот на деинституционализацијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Нормализиран сообраќајот на патот Градско – Прилеп
Денеска во 20:25 час, сообраќајот на регионалниот пат Градско – Прилеп кај клучката Манастирец кој беше пренасочен по регионален пат Р1107 кон Кавадарци поради случена сообраќајна незгода помеѓу патнички автомобил и трактор е пуштен за сообраќај во целост.
Македонија
Сообраќајка меѓу патничко возило и трактор на регионалниот пат Градско – Прилеп, сообраќајот пренасочен
Денеска околу 19:00 часот поради случена сообраќајна незгода помеѓу патнички автомобил и трактор, регионалниот пат Градско – Прилеп кај клучка Манастирец е пренасочен по регионален пат Р1107 кон Кавадарци, соопшти АМСМ.
Македонија
МВР: Шалтер за „Безбеден град“, граѓаните од утре ќе можат да ги променат контакт-податоците
Од Министерството за внатрешни работи известуваат дека граѓаните од утре (17.12.2025), на посебен шалтер во Одделот за граѓански работи, во зградата на МТВ (приземје) во Скопје, кој ќе работи секој работен ден во периодот од 08:00 до 17:00 часот ќе можат да поднесат барање за промена на контакт-податоците кои ги доставиле при регистрација на возилата, доколку има настаната промена или во случај да имаат добиено известување со неточни податоци.
„Истото, ќе може да се изврши и низ станиците за технички преглед на возила во државата каде што е распореден деташиран референт на МВР.
Исто така, граѓаните по електронска пошта на [email protected] ќе можат да достават писмена забелешка доколку имаат нејаснотии, прашања или проблеми поврзани со функционирањето и примената на системот „Безбеден град“, при што сите доставени забелешки ќе бидат евидентирани и разгледани согласно утврдените процедури, со цел унапредување на работењето и поефикасна комуникација со граѓаните“, соопшти МВР.

