Основниот кривичен суд осуди татко на затворска казна од седум години зашто ја продал ќерка си во Словенија, каде што таа била присилена да се омажи. Продажбата и присилниот брак се случиле во 2013 година, а тогаш девојчето имало 17 години.

Предметниот кривично-правен настан се случил во 2013 година кога Т. Д. ја присилил на брак својата тогаш 17-годишна ќерка и ја продал за 6.000 евра на семејство во Словенија. Оштетената малолетничка од страна на новото семејството била третирана како предмет на купување за што надлежниот суд во Марибор во декември 2015 година ги осудил сопругот и неговите родители и им изрекол ефективни затворски казни.

За случајот словенечкиот јавен обвинител го извести Основното јавно обвиителство за гонење организиран криминал и корупција. Надлежен јавен обвинител веднаш почна истрага за кривично-правниот настан против таткото на оштетената. Преку меѓународна правна помош за случајот беа обезбедени докази и разменети информации со словенечките колеги. Во текот на истрагата се утврди дека родителите на момчето го договориле бракот и таткото на малолетничката дал согласност невестата да ја даде за пари на човек што првпат го гледа, а кога малолетничката се спротивставила, обвинетиот физички ја нападнал и ја присилил на брак.