Македонија
(Видео) Достовски: Црниот пазар на канабис ќе цвета ако се продолжи со негова забрана
Предлог-законот за контрола на опојни дроги и психотропни супстанции, кој треба да се најде на пленарна седница на Владата на 14 јануари, ги раскара сопартијците на собраниската расправа на Комисијата за здравство. Мислењата се екстремно спротивставени од оние на пратеникот Влатко Ѓорчев дека овој закон ќе стимулира употреба на дрога кај младите, па до оние на Маја Морачанин дека во многу европски земји законските регулативи дозволуваат контролирана употреба на билката канабис, барем оние видови што имаат медицински својства. Колку овој предлог-закон е направен во интерес на граѓаните или, пак, тој единствено ги штити бизнис-интересите на компаниите лиценцирани за извоз на сув цвет од канабис, разговараме со Филип Достовски од здружението „Зелена алтернатива“, кој со години се бори за декриминализација на канабисот и слободна употреба на маслото од канабис за медицински и рекреативни цели. Според него, овој закон има многу слабости, но сепак не се согласува со ставовите од комисиската расправа дека Македонија ќе стане Колумбија ако се дозволи извоз на канабис.
„Сакам да му порачам на пратеникот Влатко Ѓорчев да не глуми ангел со ореол и да се информира каде сè е дозволено луѓето дома да одгледуваат неколку стебла канабис за лична употреба. Дали Италија, Австрија и Чешка се Колумбија штом неодамна дозволија и ја либерализираа употребата на канабис преку политика на неказнивост граѓаните дома да одлегдуваат канабис?“, вели Достовски.
Прохибицијата во 20-тите години на минатиот век во Америка беше во подем токму поради забраните на алкохолот, вели Достовски, кој тврди дека црниот пазар уште повеќе ќе се зголеми доколку не се дозволи контролирана употреба на канабис.
„Мала е таа разлика за употреба во медицински и во рекреативни цели, за некого можеби маслото од канабис е лек за несоница и тоа не е рекреативна употреба, а да не зборуваме за оние тешки дијагнози каде што е потврдено дека маслото лекува. Законот во оваа форма малку или воопшто не ги штити интересите на граѓаните и зошто овие компании ќе имаат право да извезуваат, а за потребите на нашиот пазар и побарувањата има ембарго“, прашува Достовски.
Во интервјуто Достовски отворено зборува за пропустите во законот, за европските регулативи и апелира да се донесе закон што ќе биде од општ јавен интерес.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на министерот Муцунски со шефот на Мисијата на ОБСЕ во Скопје, Вал
Министерот за надворешни работи и надворешна трговија, Тимчо Муцунски, денеска оствари средба со шефот на Мисијата на ОБСЕ во Скопје, амбасадорот Килиан Вал. На средбата беше потврдена долгогодишната соработка со ОБСЕ во различни области, при што беше изразена поддршка за напорите на Организацијата насочени кон зајакнување на соработката и одржување на мирот во регионот на ОБСЕ, извести МНР.
Двајцата соговорници изразија задоволство од досегашната соработка помеѓу ОБСЕ и македонските институции, и ја потврдија подготвеноста за нејзино продолжување. Тие разменија мислења и за тековните активности на Мисијата и заеднички ја реафирмираа посветеноста на продолжување на проектите кои ги поддржуваат реформските процеси на новата Влада.
Македонија
ЛДП со реакција за изјавата градоначалникот на Кисела Вода: Сепак има надеж
ЛДП реагираше на изјавите на Орце Ѓорѓиевски во врска со можноста за отповикување на градоначалници, нагласувајќи дека оваа иницијатива не е нова, туку е дел од нивните заложби кои претходно не биле поддржани ниту јавно ниту во Собранието.
„ЛДП ја истакна потребата за воспоставување на механизам за отповикување на градоначалници преку референдум, со цел поголема отчетност и одговорност на локалните лидери. Оваа иницијатива, која партијата ја поддржува подолг период, се заснова на примери од европските земји како Обединетото Кралство, Полска и Молдавија, каде ваквите механизми веќе се применуваат.
Според нив состојбата во која градоначалниците можат да ги поминат своите мандати без да одговараат за несработеното, ги оштетува општините и граѓаните. Иницијативата за отповикување на градоначалници се споменува како начин за подобрување на транспарентноста и одговорноста на локалната власт кон оние кои ја избрале“, велат од ЛДП.
Од партијата потсетија дека уште изминатата година кога ја пласираа идејата за доверба или отповикување на градоначалник истата беше отфрлена.
„Воедно минатата недела поднесовме амандман на измените во законот за локална самоуправа, кој за жал не беше поддржан во Собранието. Но, добро е што само по неколку дена доаѓаат позитивни реакции и изјави по однос на нашата заложба. Подаваме рака да го изработиме предлогот и да го усвоиме сите заедно во интерес на граѓаните“, истакнуваат од ЛДП.
ЛДП почнува серијал на јавни трибини со сите засегнати страни, а пред се со граѓаните затоа што предлогот ги има нив во фокусот: да добијат отчетни институции кои ќе им служат лично нив, а не на сопствените и партиски интереси. Институции исклучиво по европски стандарди и хармонизација со европското законодавство. ЛДП го повикува претседателот на ЗЕЛС и Министерот за локална самоуправа да се приклучат на оваа иницијатива.
Македонија
Претседателката Сиљановска Давкова се обрати на дискусијата „Младите и внатрепартиската демократија“
Претседателката Гордана Сиљановска Давкова се обрати на дискусијата „Младите и внатрепартиската демократија“, што се одржа во Кабинетот на Претседателот по повод 15 септември – Меѓународниот ден на демократијата.
Во дискусијата учествуваа подмладоци од политичките партии во земјава кои ги претставија своите погледи и искуства за улогата и положбата на младите во политичките партии кадешто членуваат и разменија идеи и препораки за подобрување на внатрепартиската демократија и за поттикнување на младинскиот ангажман во политиката.
Претседателката Сиљановска Давкова во обраќањето пред политичките подмладоци посочи дека демократизацијата на политичките партии е клучна за демократизацијата на политиката. Таа се осврна на процесите на внатрепартиското одлучување, на процесите на кандидирање и избор на партиските функционери, посочувајќи дека е неопходна децентрализираност на партиите, почитување на различни тенденции и мислења внатре во партиите и поавтентичен настап на локалните партиски организации.
Во таа насока, таа говореше за потребата од одговорност внатре во партијата, неопходноста од реформи, партиципативна политичка култура и промени во пристапот и комуникацијата на партиите со јавноста.
Претседателката во своето обраќање се осврна и на структурата на партиите и нивното претставување од аспект на родовата застапеност, истовремено посочувајќи дека дејствувањето на политичките партии во голема мера зависи од етичкиот капацитет на водството и на лидерот.
Претседателката ја поддржа потребата од поголема вклученост на младите во носењето на партиските одлуки, истакнувајќи дека тие треба да бидат најсубверзивниот елемент којшто ќе влијае на демократизацијата на овие процеси и на партиското одлучување.
Истакнувајќи ја важноста на внатрепартиската демократија, младите ги разгледаа можностите и начините за нивно поголемо влијание врз политичките процеси, преку активно учество и инклузија во партиските структури.
Политичките подмладоци како генератори на идното партиско лидерство ја истакнаа важноста од едукација и сензибилизирање за демократијата и нејзините сфаќања помеѓу младите.