Џихадистисчката сунитска организација Исламска држава ги повика исламистичките бунтовнички групи коишто дејствуваат на египетскиот полуостров Синај да ги продолжат и засилат нападите врз египетските безбедносни сили, да им ги отсекуваат главите на нивните припадници и да сторат сé што е потребно за да го предизвикаат кај нив чувството на несигурност, што упатува на силна поврзаност меѓу терористичките групации.

„Преплавете ги патиштата со експлозив поставен крај нив. Напаѓајте ги нивните бази. Упаѓајте во нивните домови. Отсекувајте им ги главите. Не дозволувајте да се чувствуваат безбедни“, им порача портпаролот на Исламската држава, Абу Махмуд ал-Аднани преку интернет на египетските исламистички бунтовници.

Повеќе претставници на египетските власти, меѓу нив и министерот за надворешни работи, го признаа постоењето на врски меѓу Исламската држава и другите помали милитантни сунитски групи, од кои една е од Египет, но тврдат дека во земјата нема борци на споменатата џихадистичка група. Египет се справува со исламистичкиот бунт кој особено се разгоре во јули 2013 година кога армијата го отстрани од функцијата претседателот Мохамед Морси, еден од првите луѓе на исламистичкото движење Муслиманско братство.

Портпаролот на Исламската држава во пораката ги фали милитантите коишто ги изведуваат „благословените операции против чуварот на Евреите, против војниците на (египетскиот претседател, генералот) Абдел Фатах ал-Сиси, новиот египетски фараон“.

Исламистичката група Ансар Бејта ал-Макдис чиишто бази се на Синај, минатата година уби стотици припадници на египетските безбедносни сили и последните денови обезглави неколку лица тврдејќи дека се шпиони на израелските тајни служби. Крвопролевањата покажуваат дека оваа групација е силно радикализирана. Исламската држава, која ја сочинуваат борци од арапските и муслиманските земји, ги обучуваат милитантите на Синај за поефикасно да ги изведуваат нападите.

Египет го поддржа повикот на САД за формирање на голема меѓународна коалиција којашто ќе ја запре Исламската држава, а борбата против џихадисите ќе биде една од главните теми на годишното Генерално собрание на ОН кое почнува во текот на оваа седмица.

Во неделата во Египет беа убиени два цивила и тројца полицајци во експлозија на бомба поставена во близина на министерството за надворешни работи во главниот град Каиро, а меѓу загинатите е и еден од клучните сведоци на судењето на отстранетиот претседател Мохамед Морси. Тој е обвинет за заговор со исламистичкото палестинско движење Хамас, за поттикнување на убиства на припадници на безбедносните сили во текот на протестите на неговите приврзаници и противници, како и за продавање доверливи документи чувствителни за безбедноста на Египет на Катар и на телевизијата al Jazeera.

Како одговор на бунтот на исламистите, Египет го прогласи за терористичка организација и го забрани дејствувањето на Муслиманското братство и вети дека ќе го елиминира. Во судирите египетските безбедносни сили убија стотици приврзаници на движењето, и уапсија илјадници припадници меѓу кои и сите челници кои ги изведоа пред суд, со што ја ослабија оваа некогаш најмоќна организација, како во Египет, така и во соседните арапски земји. Сепак, претседателот ал-Сиси во саботата најави дека на припадниците на Муслиманското братство би можело да им биде дозволено да учествуваат повторно во политиката, доколку се откажат од насилството./крај/мф/сн

Извор: Reuters