Одговорот на Кина на новите американски царини може да го отежне снабдувањето со важни лекови, покажа анализата на Ројтерс на податоците од кинеските регулатори.

Пред околу две недели, американскиот претседател Доналд Трамп најави дополнителна „реципрочна“ царина од 34 отсто за увозот од Кина, со што вкупните давачки ќе достигнат 54 отсто.

Кина возврати со царини од 34 отсто на американскиот увоз, а Вашингтон одговори со уште повисоки давачки.

Ескалацијата на американско-кинескиот трговски конфликт резултираше со зголемување на кинеските царини за американски стоки на 125 отсто, а американските царини за кинеските производи на 145 отсто.

Големите фармацевтски компании, вклучувајќи ги AstraZeneca, Sanofi, GSK и Eli Lilly, имаат најмалку една производна локација во САД за лекови што ги продаваат во Кина, покажаа податоците од кинеската Управа за медицински производи.

Во погон во американската сојузна држава Индијана, AstraZeneca го произведува лекот за рак „дурвалумаб“, а Eli Lilly таму го произведува лекот за дијабетес и слабеење „тирзепатид“, покажуваат податоците.

Американската држава Северна Каролина е наведена како локација каде AstraZeneca и Sanofi го произведуваат антителото nirsevimab за превенција на респираторниот синцицијален вирус (RSV). Погонот што го произведува лекот за ХИВ на GSK со активни состојки ламивудин/долутегравир исто така се наоѓа таму. Податоците што ги анализира Ројтерс не прецизираа колкав дел од лековите произведени во фабриките во САД се испорачуваат во Кина.

Како одговор на истрагата на Ројтерс за кинеските тарифи и нивните ефекти, портпаролот на Eli Lilly рече дека тие „сè уште ги разгледуваат деталите“, одбивајќи да коментира дополнително.

Ниту AstraZeneca ниту GSK не сакаа да ги коментираат кинеските тарифи, а Sanofi не одговори на барањето на Reuters за коментар. Експертите предупредуваат дека кинеските царини за американските производи може да доведат до зголемување на цените или ограничување на набавката на некои лекови.

„Пациентите и потрошувачите во Кина, исто така, би можеле да ги почувствуваат ефектите од тарифите, во зависност од производот, бидејќи производството на лекови не може да се премести на краток рок“, рече Ерик Јандраситс, шеф за трговски работи во швајцарското деловно здружение за фармацевтска и биотехнологија Scienceindustries.

Во напад на руски беспилотни летала врз пристанишниот град Одеса на Црното Море во текот на ноќта повредени се три лица, предизвикани се пожари и оштетени се домови и цивилна инфраструктура, соопштија утринава властите во јужниот украински регион.

„Непријателот повторно ја нападна Одеса со масовен напад со беспилотни летала“, рече Олех Кипер, гувернер на регионот чиј административен центар е градот Одеса, на апликацијата за пораки Телеграм, но се уште не е познат целосниот обем на нападот.

Украинските воздухопловни сили обично известуваат за детали за руските напади кои што траат во текот на ноќта, подоцна утрото.

Во објава на Телеграм, службите за итни случаи на Украина објавија дека три лица се повредени и дека како резултат на нападот избувнале неколку пожари во градот.

Градоначалникот на Одеса Генадиј Труханов објави фотографија на која се урнати станбени згради и други објекти, додека на друга, работниците за итна помош бараат низ урнатините, а куче ѕирка од зад куп дрва.

Ројтерс не можеше независно да ги потврди извештаите. Двете страни негираат дека целеле цивили во војната што Русија ја започна со сеопфатната инвазија на Украина пред повеќе од три години.

Кон крајот на март, САД соопштија дека постигнале посебни договори со Украина и Русија за запирање на нивните напади над Црното Море и едни со други енергетски цели.

Двете страни постојано меѓусебно се обвинуваат за кршење на мораториумот.

Американскиот пастор кој минатата недела беше киднапиран за време на миса во црква во Јужна Африка е спасен по жесток вооружен судир во кој загинаа три лица, изјавија властите.

Џош Саливан, 45-годишен свештеник, беше пронајден неповреден вчера навечер во сиромашното предградие Геберхе (поранешен Порт Елизабет) во Источен Кејп, каде што беше киднапиран минатиот четврток.

Полицијата сè уште не објави детали за спасувачката операција или сторителите, но се сомнева дека киднаперите ги знаеле движењата на семејството на пасторот.

Според официјалните податоци на јужноафриканската полиција, бројот на киднапирања во земјата се зголемил за 264% во последната деценија, а безбедносната ситуација дополнително се влошила во последниве години.