Македонија
Шкријаљ: Техничката министерка Мизрахи шири невистини, центрите за социјални работи функционираат без пречки

Техничката министерка за труд и социјална политика, Рашела Мизрахи, со денешната прес-конференција уште еднаш потврди дека работи против интересите на граѓаните продолжувајќи да шири невистини и пропаганда за наводно неработење на центрите за социјални работи, реагираат од кабинетот на дополнителната заменик-министерка за труд и социјална политика, Санела Шкријељ.
„Граѓаните треба да ја знаат вистината, а тоа е дека центрите за социјални работи функционираат без никакви пречки и сите реформи што се направени изминатиов период им носат само бенефит на корисниците на правата и услугите“, се наведува во реакцијата.
Оттаму ѝ порачаа на техничката министерка Мизрахи дека уште пред да седне во министерската фотелја требало да знае дека новиот начин на функционирање на ЦСР го намали обемот на работа затоа што, како што велат, врзувањето на правата и услугите доведе до намалување на бројот на домаќинства за кои еден стручен работник ќе биде одговорен.
„На овој начин се зголеми квалитетот на работа на стручните работници, кои лани летото добија историско зголемување на платите од 26 отсто за една година. Центрите континуирано добиваат стручна помош од Министерството за труд и социјална политика и од меѓународните организации, преку менторирање и супервизија, а предвидени се и дополнителна стручна помош и обуки соодветно на потребите.
Системот на работа и организација на центрите за социјална работа (ЦСР) е во процес на реорганизација и приспособување на новите законски решенија. На процесот му претходеше темелна анализа, на која Министерството за труд и социјална политика работеше со домашни и странски експерти, со поддршка на Светската банка, УНИЦЕФ и УНДП. Беше констатирано дека начинот на организација на центрите е неопходно да се промени и да се воведе интегрирано водење случај како метод на работа.
Законот за социјална заштита е донесен и стапи во сила во мај лани. Обуките за примена на новиот начин на работа на центрите за социјална работа почнаа уште во 2018. Беа обучени сите стручни работници и 30 отсто од стручните работници во центрите за вработување. Кога законот стапи во сила, извршена е втора серија на обуки на сите стручни работници.
Законот дефинира дека стручните работници во работа со корисниците на социјална заштита го применуваат принципот на водење случај, што подразбира еден стручен работник да работи со едно домаќинство, истовремено се проценуваат потребите и се даваат права и услуги. Со тоа на граѓаните им се олеснува пристапот до правата и услугите. Ако се стремиме кон ЕУ, треба да ги следиме европските и светските трендови на имплементирање на методот на интегрирано водење случај како најдобра пракса за корисниците на правата и услугите од областа на социјалната заштита“, стои во реакцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сергеј Попов ги матираше СДММ, извади документ од кој се гледа како лажат, велат од ВМРО-ДПМНЕ

„Се е пријавено дечки, затоа вчера ви рековме два пати да размислите пред да излезете на прес. Ама толку слушате, затоа сте младина сведена на статистичка грешка“, напиша Сергеј Попов, претседател на УМС и пратеник на ВМРО-ДПМНЕ, на социјалните мрежи.
„Штета, паметам времиња кога СДММ беше подмладок за почит“, додаде тој.
Македонија
Пратеничката Мимоза Муса на 73. КОСАК конференција во Варшава

Пратеничката Мимоза Муса, членка на Комисијата за европски прашања, учествува на 73. Конференција на комисиите за европски прашања на Парламентите на земјите членки на Европската Унија (КОСАК), која се одржува од 8 до 10 јуни 2025 година во Варшава, Република Полска.
Конференцијата се одржува во Сејмот на Република Полска, а учество земаат претставници на Парламентите од земјите членки и кандидатите за членство во Европската Унија, како и претставници на Европската комисија и Европскиот парламент.
Темите опфатени на Конференцијата се: приоритетите на Полското претседателство со Советот на ЕУ, работните програми на Европската комисија и Европскиот парламент во новиот институционален циклус, идната повеќегодишна финансиска рамка на ЕУ, политиката за проширување и јакнењето на сајбер отпорноста и борбата против дезинформации.
Настанот беше свечено отворен од страна на маршалот на Сејмот на Република Полска, Шимон Холовниа, а Конференцијата се одвива под копретседателство на Агњешка Помаска, претседателка на Комисијата за европски прашања на Сејмот на Република Полска и Томаш Гродsки, претседател на Комисијата за европски прашања на Сенатот на Република Полска.
Во своите воведни обраќања ја нагласија важноста на парламентарната соработка и единството на европските институции во справување со заедничките предизвици. Тие упатија повик за продлабочена вклученост на националните парламенти во процесот на донесување политики на ниво на ЕУ и подвлекоа дека проширувањето останува клучен инструмент за стабилност и просперитет на целиот континент.
Пратеничката Мимоза Муса имаше свое обраќања на втората сесија од Конференцијата.
На втората сесија, каде се дебатираше за работните програми на европските институции и Стратешката агенда на ЕУ, Муса истакна дека приоритетите на Комисијата и Парламентот се од исклучително значење за земјите кандидати. Таа подвлече дека Северна Македонија активно работи на зелена транзиција, дигитализација, економски развој и борба против корупцијата, и ја потенцираше важноста на продолжување на политиката на проширување врз основа на заслуги.
Во рамки на своето учество, пратеничката оствари средба со голем број колеги и со амбасадорот на Република Северна Македонија во Република Полска, Јасмин Ќахил.
КОСАК претставува форум за соработка меѓу комисиите за европски прашања од националните парламенти и Европскиот парламент, кој овозможува редовна размена на информации, ставови и добри практики во однос на европското законодавство и политики. Форумот постои од 1989 година и има важна улога во вклучувањето на националните парламенти во процесите на донесување одлуки на ниво на ЕУ.
Македонија
Арсенал илегално оружје и муниција пронајдени кај скопјанец, поведена истрага

Јавен обвинител од Основното јавно обвинителство Скопје донесе Наредба за спроведување истражна постапка против едно лице за кривични дела – Неовластено изработување, држење, посредување и тргување со оружје и експлозивни материи од член 396 од Кривичниот законик.
При претрес во домот во кој престојувал осомничениот 29-годишник на улицата “Благоја Паровиќ” во Скопје, било пронајдено поголемо количество огнено оружје, муниција и експлозивни материи кои на граѓаните им се забранети и тоа: автоматска пушка со калибар 7,62×39 мм, четири рамки со 120 куршуми и уште дополнителни 779 куршуми боева муниција од истиот калибар наменета за испалување од автоматски, полуавтоматски пушки, митралези, пушкомитралези и репетирачки пушки. Биле пронајдени и 3 рамки со вкупно 51 куршум со калибар 9 мм Para и уште 136 куршуми од тој калибар наменети за испалување од автоматски огнени оружја и полуавтоматски пиштоли. Потоа биле откриени и 31 куршум боева муниција со калибар 7,65 мм, која исто така се користи за автоматски и полуавтоматски оружја, како и рачна граната од моделот РГД 5, која е од офанзивен тип со ефективно убиствено дејство од 15-20 метри и ранувачко дејство до 30 метри.
Покрај ова оружје, муниција и експлозивни направи кои се целосно забранети за граѓаните, тој во домот без дозвола држел и огнено оружје кое било преправено – пиштол ZORAKI М 906-B со кој било овозможено истрелување на проектили од куршуми од боева муниција со кал.7,65 мм, пневматски пиштол марка SIG SAUER M17 наменет за истрелување на топчести проектили со калибар 4,5 мм, полуавтоматски пиштол RANGER RA9, како и 51 куршум со калибар 9 мм P.A.K. наменета за предизвикување звучен-сигнален ефект при испалување од оружје за светлосно-звучна сигнализација. Целото пронајдено илегално оружје и муниција се одземени од осомничениот.
Поради опасност од бегство и можност да го повтори делото, јавниот обвинител до Судот достави предлог за определување мерка притвор за осомничениот.