Македонија
(Видео) Заев: Мицкоски и ВМРО-ДПМНЕ не сакаат закон за Јавно обвинителство
„Повеќе од јасно е дека Христијан Мицкоски и опозицијата не сакаат законско решение за Јавното обвинителство и затоа ги повикувам да ме демантираат“, изјави претседателот на СДСМ, Зоран Заев во одговори на новинарски прашања.
Заев истакна дека ВМРО-ДПМНЕ можеле да поднесат конкретни предлози за законот и пред две години и пред шест месеци но не го сториле тоа, но денеска сме во последната фаза, на неколку денови пред распуштање на парламентот и денеска Владата требаше да го усвои предлог-законот кој потоа би влегол во собраниска процедура.
„Во време кога на сите ние јасно дека законот можеме да го донесеме сега или да чекаме да го донесеме по изборите без разлика кој ќе биде власт, а кој опозиција, би било сулудо да не го донесеме сега. Со тоа ќе дадеме дополнителен аргумент на ЕУ. Дури сега да се формира работна група која би работела на законско решение, тогаш кога би бил предложено законското решение? Во октомври годинава или напролет наредна година? Треба сериозно да ја сфатиме работата, затоа што се работи за нашата држава, се работи за стратешка цел – почеток на преговорите со ЕУ. И навистина, сакам Мицкоски и ВМРО-ДПМНЕ да ме демантираат, дека не се против законот, дека не сакаат намерно да го опструираат законското решение, а тоа ќе го направат ако дадат конкретни предлози“, посочи Заев.
Тој рече дека Заев пролонгирањето на распуштањето на Собранието, не значи и одлагање на изборите.
„Не гледам никаква причина за одлагање на изборите, тие се фиксирани на 12 април, но истовремено можеме да го искористиме тој меѓу период од 45 до 60 дена за распуштање на парламентот. Изборите пак можат да бидат распишани на 60 дена, но распуштањето на Собранието може да се помести за ден, два, три за да се донесе ова законско решение, секако запазувајќи ги законските рокови на ДИК, но тие се врзани со распишувањето на изборите, а не со распуштањето на Собранието. Сепак постојат законски решенија кои се многу значајни како законот за јавно обвинителство. Законот за одбрана и протоколот за НАТО кои треба да се донесат пред распуштање на Собранието, но ако треба неколку денови плус тоа да биде овозможено. Нема да дозволам пратеничката група која има мнозинство во Собранието да гласа за негово распуштање, без притоа да гласа за законот за јавно обвинителство. Законот може биде гласан со консензус, може да биде гласан со двотретинско мнозинство, а може да биде гласан и со помалку од потребното мнозинство и да не помине, но наша должност е да го ставиме на гласање, да испратиме сериозна порака до ЕУ дека правиме се за да ги продолжиме реформите“, заклучи Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: Бошњачката заедница е нераскинлив дел од нашето мултиетничко општество
Претседателот на Социјалдемократскиот сојуз на Македонија, Венко Филипче, вечерва присуствуваше на одбележување на Меѓународниот Ден на Бошњаците, во организација на Странката на демократска акција на Македонија (СДА).
Во обраќањето пред присутните, Филипче прача дека бошњачката заедница е нераскинлив дел од општеството и има значаен придонес во развојот и напредокот на Северна Македонија.
„Граѓаните Бошњаци по измените на Уставот од 2001 година, станаа дел од преамбулата и на нашиот Устав. Со нивната традиција, како составен и нераскинлив дел од нашето мултиетничко општество, имаат значаен придонес во развојот и напредокот на државата. Бошњачката заедница во Северна Македонија активно се вклучи во успешниот концепт „Едно општество за сите“, со кој Северна Македонија сега е пример во Ервопа и регионот за дијалог, меѓусебно разбирање и почитување“, рече Филипче.
Воедно, претседателот на СДСМ, Филипче ја потенцираше важноста на Странката на демократска акција на Македонија (СДА), која како коалициски партнер на СДСМ, изминативе години даде поддршка на развојните политиките во периодот на Владата на СДСМ.
„Во основното образование за учениците Бошњаци се врати редовната настава на босански јазик, Северна Македонија и Босна и Херцеговина потпишаа серија на билатерални договори во интерес на граѓаните,Скопје и Сараево станаа збратимени градови. Со својата прогресивна идеологија во изминатите години, СДА активно учествуваше во сите процеси кои ја придвижија државата напред, како што е членството во НАТО и започнувањето на преговорите со Европската Унија“, рече Филипче, додавајќи дека токму тоа и е разликата СДСМ и актуелната власт .
Филипче во своето обраќање нагласи дека СДСМ и СДА и во иднина ќе делуваат заеднички и ќе се залагаат за соживот,меѓусебна почит и интеграција на државата.
„ За жал деновиве сме сведоци на едни политики кои ја враќаат државата назад во изолација, нешто за што граѓаните не гласаа. И тоа не смееме да го дозволиме, не смееме да се откажеме од европскиот пат, од европска иднина за нашите граѓани. СДСМ и СДА и понатаму ќе продолжат да делуваат заеднички, ќе се залагаме за демократските вредности и инклузија на сите заедници, за интеграција, а не за изолација на државата“, порача претседателот на СДСМ, Венко Филипче.
Македонија
Промена на времето: УХМР за утре најавува дожд, силен ветер и драстичен пад на температурите
Управата за хидрометеоролошки работи најавува значителна промена на времето утре – дожд, засилен ветер и пад на температурата.
Утре под влијание на влажна и постудена воздушна маса од север ќе настапи позначителна промена на времето. Од утринските часови најпрвин во северните делови, ќе има повремени врнежи од дожд и локална појава на грмежи. Ќе дува силен ветер (наместа над 70км/ч.) кој ќе продолжи и во понеделник.
ИЗВОР: УХМР
Дневната температура значително ќе се намали (утре за 6 до 8, а во понеделник уште за дополнителни 4 до 6 степени). Потоа во следните два дена времето ќе биде сончево со ниски утрински температури, а дневните ќе бидат во пораст.
Во Скопје, утре ќе има повремени врнежи од дожд, локално со појава на ретки грмежи и силен ветер.
Од четврток се очекуваат нови врнежи од дожд.
Македонија
Претседателката Сиљановска Давкова се сретна со генералниот секретар на Советот на Европа, Алан Берсе
Претседателката Гордана Сиљановска Давкова во рамки учеството на 79. Генерално Собрание на Обединетите Нации во Њујорк, оствари средба со генералниот секретар на Советот на Европа, Алан Берсе.
На средбата беа разменети мислења за целите и приоритетите насочени кон демократизацијата на македонското општество, човековите права и владеењето на правото. Реафирмирајќи ја посветеноста за натамошна конструктивна соработка со Советот на Европа, претседателката Сиљановска Давкова изрази задоволство од континураната поддршка за нашето целосно усогласување со европските стандарди и вредности.
Претседателката Сиљановска Давкова ја нагласи важноста од кредибилно постапување на Европската Унија во однос на интеграцијата на земјите од Западен Балкан кога напредокот на поединечните кандидати е евидентно заслужен. Таа се осврна и на неопходното обезбедување усогласеност со обврските што земјите-членки ги презеле, вклучително и правилното спроведување на пресудите на Судот во Стразбур.
Соговорниците разговараа и за актуелните безбедносни состојби во Европа, со акцент на војната во Украина, како и за потребата од посветеност и заеднички пристап кон сегашните и идните предизвици какви што се влијанието на новите технологии и климатските промени врз човечките ресурси.
На средбата претседателката Сиљановска Давкова упати честитки до новоизбраниот генерален секретар на Советот на Европа, Алан Берсе, изразувајќи искрени желби за успешно исполнување на важната мисија и продолжување на плодната соработка со македонските институции.