Македонија
(Видео) Ѓорѓиевски: Заев ги лажел родителите на убиените кај Смилковското Езеро
„Зоран Заев монструозно го злоупотребувал масакрот кај Смилковското Езеро за политички цели од 2015 година па наваму. Кога се осмелил да лаже, да манипулира и да си игра со судбините на семејствата на убиените, но и на целата македонска јавност, можете да замислите на што сè е спремен Зоран Заев, што досега правел и сè уште прави“, изјави Орце Ѓорѓиевски, член на ИК на ВМРО-ДПМНЕ.
„Тој безочно лажел, ширел тенденциозни невистини, клеветел со намера да го оцрни политичкиот противник, но и со тоа да ги насочи истражниот и судскиот процес во погрешен правец. Тоа е кривично дело и за тоа Зоран Заев мора да одговара. Но, најстрашно од сè е што со своите лаги ги манипулирал родителите на убиените деца злоупотребувајќи ја оваа трагична судбина. Заев фабрикуваше за сега пред судот да се прави дека не се сеќава или да се вади дека нешто слушнал случајно. Родителите на суд кажаа, а медиумите пренесоа, какви монструозни лаги им кажувал Заев на средбите што ги имал со нив.
На родителите Заев им зборувал, замислете, дека Трајко Велјановски бил вмешан во убиството на Смилковското Езеро, па им говорел дека наводно телефонот на советникот за безбедност од кабинетот на тогашниот претседател Иванов бил пронајден на местото на убиството и слични инсинуации. Заев сега се прави недоветен, па или не се сеќава што зборувал или целосно негира. Тоа само покажува до каде одел некрофилскиот ум на Зоран Заев кога злоупотребувал нечија судбина за да измислува и пушта манипулации. Замислете, тој дури и во 2018 година лажел, па на родителите им зборувал дека убијците користеле возило од МВР, со што имплицирал дека полицијата го извршила овој грозоморен чин. Бедно од страна на Заев!
Имено, по одлуката на Врховниот суд за ослободување на осомничените за масакрот, во 2018 година, период кога Заев има апсолутна власт во Македонија, мајките на загинатите деца имале средба со Заев и тој им кажувал дека возилото ‘опел омега’, што го користеле убијците, било на МВР. Замислете, за оваа своја лага сега Заев се вади дека нешто прочитал, па им пренел на родителите. Ни доказ, ни истрага, ни бутур, туку имаме безочна лага од Заев, со намера да ги дискредитира истрагата и судскиот процес, а само и со цел за ситни политички поени“, додаде тој.
Според Ѓорѓиевски, сега на јавноста ѝ е јасно зошто осомничените и веќе еднаш осудени за убиството се наоѓаат на слобода и зошто радосно и насмеани си правеа селфи со Заев по неговото сведочење на суд.
„Зоран Заев првин ќе се соочи со судот на народот на 12 април за овие и за сите други лаги. По 12 април, Заев ќе треба да одговара и кривично поради своевидното попречување на правдата и манипулациите со масакрот кај Смилковското Езеро за ситни политички поени. По 12 април, Заев никогаш повеќе“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Од полноќ почнува изборниот молк
На полноќ почнува изборниот молк пред парламентарните и вториот круг од претседателските избори, кои ќе се одржат в среда.
Изборниот молк ќе трае до среда до 19 часот, односно до затворањето на избирачките места.
Се гласа на 3.480 избирачки места.
Утре (7 мај) гласаат иселениците, болните и изнемоштените, затворениците, лицата во старските домови и две раселени лица.
Според Државната изборна комисија (ДИК), за претседателските избори биле пријавени 1.814.317 гласачи, а за парламентарните избори вкупно 1.815.350 гласачи.
За време на молкот, медиумите продолжуваат да известуваат за изборниот процес, но престануваат сите облици на изборно медиумско претставување на учесниците во изборната кампања, информираат од Агенцијата за аудио и аудиовизуелни медиумски услуги.
„Според Изборниот законик, за прекршување на изборниот молк се смета емитувањето какви било информации, фотографии, аудио и аудиовизуелни материјали поврзани со или во кои учествуваат учесници во изборите, какви било облици на медиумско известување кои се отворено или прикриено во функција на нечија кампања и можат да влијаат врз одлуката на избирачите, податоци со кои се открива идентитетот на политички субјекти и/или поединци вклучени во инциденти или неправилности на денот на гласањето; како и изјави од кандидати во изборниот процес, од претставници на политички партии и од носители на функции во органите на власта“, се појаснува во соопштението од Агенцијата за аудио и аудиовозуелни медиумски услуги.
Македонија
Апасиев: Сиромашниот Албанец, сиромашниот Ром, сиромашниот Бошњак, сиромашниот Турчин ни е поблизок од македонскиот чорбаџија
На денешниот завршен Народен собир на Левица од Парламентарна кампања, 2024, се обрати претседателот на Левица и Носител на ИЕ1, Димитар Апасиев.
,,AСНОМ е она што сега го возобнувуваме. Тие што нè ословуваа дека сме националисти, нека знаат дека повеќе Турци и Бошњаци ќе влезат преку листите на Левица, отколку преку нивните етнотрибалистички листи”, рече Апасиев во своето обраќање кон граѓаните.
Според Апааиев, Левица не е лажна опозиција и Левица има светла иднина.
,,Оставете ги овие балони што се дуваат, овие максовци кои ќе испарат за година – година и пол. Ние на овие избори очекуваме да влеземе со пратеничка група, а нашиот народ знае дека треба да го даде гласот за Левица!”, порача Апасиев.
Својот говор, Апасиев го заокружи со благодарност до членовите и симпатизерите на Левица.
,,Сакам да ви се заблагодарам најискрено и најчовечки, бидејќи вие сте денес тука – водени од идеали и од каузата што нè обединува. Никој од вас не зеде пари, за да дојде тука на овој заеднички Народен собир на Левица. Никој од вас не го вработивме преку Левица. Сега имаме набљудувачи во рекорден број. Како никогаш досега разваливте на терен. Веќе го надминавме епитетот на мала и фејсбук – партија, затоа се плашат од нас. И има зошто да се плашат!”, додаде Апасиев.
Во однос на класната борба, претседателот Апасиев рече:
,,Сиромашниот Албанец, сиромашниот Ром, сиромашниот Бошњак, сиромашниот Турчин ни е поблизок од македонскиот чорбаџија. И затоа, елајте, браќа и сестри! Елајте, народи и народности! Елајте во Левица, за да го вееме бајракот на слободата!”
Македонија
Силјановска-Давкова: Времето на жените доаѓа, срамота е што 30 години сме немале жена претседателка или премиерка
Во рамките на активностите на кандидатката за претседателка на државата, Гордана Сиљановска-Давкова, таа се обрати на трибината на тема „Жени“ која се одржа во Јавна соба.
„Во мојата програма има посебен дел посветен на жените. Подолго светот живеел како патријархат отколку матријархат. Повеќе жени во политика, повеќе гаранции за помалку насилство. Срамота е 30 години да не сме имале жена претседателка, жена премиерка. Да им ставиме крај на Венецијанските трговци“, порача Давкова.
Како што додаде, жените имаат што да покажат, имаат вулканска сила и мажите треба да се инспирираат од нив.
„Времето на жените доаѓа. Сега е време за машка еманципација. Македонија е во женски род, политиката е во женски род. Женскоста е квалитет неискористен. Промените наскоро доаѓаат“, рече Давкова на трибината.