Црна хроника
Кривични пријави за тешки кражби
СВР Скопје до нaдлежното обвинителство поднесе кривична пријава против лицата М.М. (20) и Д.Р. (20), двајцата од Скопје, поради извршени тешки кражби, соопшти МВР.
Имено, во периодот од 26. септември до почетокот на ноември годинава двајцата сториле едно кривично дело – “тешка кражба во обид“ како и две кривични дела – “тешки кражби“ и притоа се стекнале со противправна имотна корист од 270.000 денари.
Истражен судија на двајцата пријавени им изрече мерка притвор во траење од по 30 дена.
Според документираните сознанија на истрагата на почетокот на месецов, поточно на 1.11. околу 15.20 часот, двајцата пријавени извршиле “тешка кражба во обид“, во село Глумово, во куќата сопственост на Ш.З. (45) на тој начин што со употреба на погоден предмет (хебла) го искршиле еден од прозорците во куќата, потоа влегле внатре и почнале да пребаруваат но до крај не ги оствариле своите планови бидејќи биле откриени и фатени на лице место. Од обидот причинета е вкупна материјална штета од 30.000 денари.
Исто така М.М. и Д.Р. на 26. септември годинава, околу 19,00 часот, во населбата Лисиче на ул. „Мите Богоевски“ користејќи ја можноста кога во куќата сопственост на В.И. немало никој со хебла делувале на влезната врата, меѓу двете крила, ја отвориле, влегле внатре и направиле поголемо претурање.
Притоа, во една од фиоките на работната маса, поточно во детската соба пронашле и одзеле кожен машки паричник во кој имало 500 швајцарски франци и две кредитни картички од Комерцијална банка на име на оштетениот М.И. (26) – син на сопственикот на куќата. Пријавените по извршеното пребарување пронашле и одзеле уште две златни алки, женски рачен часовник, две монети, 10 женски прстени, два машки прстени и нараквица со што се стекнале со противправна имотна корист од 240.000 денари.
Покрај ова на крајот на минатиот месец, поточно на 29.10. во 16,00 часот на ул.“Скупи“ во куќа сопственост на Т.П. (77) М.М. и Д.Р. извршиле “тешка кражба“ на идентичен начин како и претходната при што од куќата одзеле златен прстен, златник со лик на Кирил и Методиј и 4 – 5 златни навлаки за заби, при што се стекнале со противправна имотна корист која сеуште не е утврдена. При вршење на наведеното дело во куќата биле затекнати од В.К. (29), снаа на оштетениот по што и истите избегале.
Првопријавениот М.М. во крим-евиденциите на СВР-Скопје минува за сторени кривични дела – “тешка кражба“, “кражба“, “разбојништво“ а, пак, второпријавениот Д.Р. е евидентиран покрај како сторител на посочените кривични дела и на кривично дело -“издавање и употреба на невистинито лекарско или ветеринарно уверение“./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Скопјанец измамен во менувачница од двајца странски државјани
Скопјанец пријавил дека во менувачница во Старата скопска чаршија бил измамен од страна на двајца странски државјани за сума од 25.000 евра, информираат попладнево од Министерството за внатрешни работи.
Синоќа во 19.15 часот во СВР – Скопје, Х.М., на возраст од 34 години од главниот град на државава, пријавил дека околу 15 часот во менувачница во Старата скопска чаршија бил измамен од двајца странски државјани.
Според пријавеното, откако се договориле во менувачницата да сменат пари за 25.000 евра, лицата дошле со чанта со договорената сума на пари во денари, при што еден од нив ја заменил чантата со денари со друга иста чанта, која во долниот дел била полна со хартиени ливчиња.
Како што пријавил Х.М., тој им ги дал еврата без да ја провери чантата, а откако заминале, сфатил дека е измамен, појаснуваат од МВР.
Се преземаат мерки за расчистување на случајот.
Црна хроника
Пожар во Дом за стари лица во струмичко Банско, нема повредени
Пожар синоќа избил во Дом за стари лица во село Банско, Струмичко. Нема повредени лица, предизвикана е само материјална штета, соопшти Центарот за управување со кризи (ЦУК).
Според Регионалниот центар за управување со кризи – Струмица, пожарот бил пријавен околу 23.30 часот. Во гаснењето на пожарот интервенирале седум пожарникари со две противпожарни возила. Пожарот целосно е изгаснат во 50 минути по полноќ.
– Прво биле евакуирани лица од катот каде што бил пожарот, потоа од долните катови. По целосното гаснење на пожарот, евакуираните лица полека се вратени на местата, собите од каде што биле евакуирани. Причината за пожарот и материјалната штета дополнително ќе бидат утврдени, појаснуваат од ЦУК.
Во денешното соопштение се наведува и дека изминатото деноноќие имало вкупно 1.759 повици на единствениот повикувачки број за итни случаи – 112 во ЦУК.
Црна хроника
Притвор за осомничен за спречување на полициски службеници да фатат побегнат затвореник
Основното јавно обвинителство Кавадарци поведе постапка против 18-годишник за кого постои основано сомнение дека сторил кривично дело – Спречување службено лице во вршење службено дејствие од член 382 став 3 во врска со став 2 и став 1 од Кривичниот законик.
На 2 мај, во куќа на улицата “Димката А. Габерот” во Кавадарци, двајца инспектори од МВР преземале службено дејствие – фаќање побегнат затвореник од КПУ Гевгелија, кој бил роднина на сега осомничениот.
Затвореникот давал отпор при обидот да биде лишен од слобода за доизвршување на затворската казна, во што сега осомничениот го поддржал, се нафрлил врз еден од полициските службеници, го влечел и го гребел, нанесувајќи му телесни повреди.
Затвореникот успеал да се ослободи и да побегне, но подоцна бил фатен и вратен во затворот. Осомничениот исто така избегал во прв момент, но бил лишен од слобода, а по предлог на јавниот обвинител, Основниот суд во Кавадарци му определи притвор во траење од осум дена.