Македонија
(Видео) Падна пресуда за „Змиско око“ – четворица вработени на патарините починале за време на историското судење

По 13 години низ судските лавиринти, денеска падна првостепената пресуда за веќе историскиот случај „Змиско око“. Претходно, во два наврата Кривичниот суд донесе пресуди, но Апелациониот суд ги укинуваше по што судењето третпат почна од почеток.
Уапсените се товареа за злосторничко здружување, кое не издавало фискални сметки за платени патарини, а парите ги ставале во џебот по што повторно организирано си ги делеле. Со денешната пресуда четворица се ослободуваат од обвинение, а на другите им се изречени условни казни.
„Обвинението за кривичното дело злосторничко здружување по чл. 394 ст. 2 од КЗ се одбива поради настапување апсолутна застареност. Обвинетите В. М. С. А., В. Ј. и З. Б. се ослободуваат од обвинение за кривичното дело злоупотреба на службената положба и овластувањето по чл. 353 ст. 5 вв ст. 1 од КЗ. Другите обвинети се огласуваат за виновни за кривичното дело по чл. 353 ст. 5 вв ст. 1 од КЗ, па имајќи ја предвид нивната позиција, својство и овластување, им се изрекува:
За одговорното лице – алтернативна мерка условна осуда со казна затвор од 2 години, која нема да се реализира доколку во следните 5 години не стори ново кривично дело. Обвинетите што имале својство на контролори на наплатни станици им се изрекува алтернативна мерка условна осуда со казна затвор од 1 година и 6 месеци доколку во следните 3 години не сторат ново кривично дело, обвинетите со својство на сменоводители и инкасанти им се изрекува алтернативна мерка условна осуда со казна од 1 година доколку во следните 2 години не сторат ново кривично дело“, стои во пресудата.
При објавата на пресудата еден од обвинетите, чиј идентитет е познат за судот, искажал навреди и пцости упатени кон судечкиот совет за што судот изготвил службена белешка и ќе поведе соодветна постапка.
„Не сме задоволни од одлуката и ќе се жалиме до Апелација. Да му е чест на судот кој е врзан во алка со Обвинителството. Ќе се бориме до крај, ако останеме живи, зашто знае и судот дека веќе четворица колеги ни починаа, а најверојатно и ние нема да го дочекаме крајот, но да ни се живи и здрави децата, да доживеат барем тие нешто поради нас“, рече по изрекувањето на пресудата, Митре Петров, еден од обвинетите, кој вели дека е осуден и покрај тоа што вели дека не бил на работното место.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Поставени електрични огради за заштита на земјоделците и пчеларите во Шар Планина

Министерството за животна средина и просторно планирање го презеде првиот практичен чекор во спроведувањето на Националниот акционен план за кафеавата мечка, со поставување на соларни електрични огради за заштита на земјоделците и пчеларите во селата на Шар Планина.
„Овие модерни огради, финансирани од WWF Хрватска (Светски фонд за природата) и во соработка со Националниот парк „Шар Планина“, се поставени кај пет земјоделци и пчелари кои се соочуваат со штети предизвикани од диви животни како мечките и волците. Целта е јасна: да се заштитат добитокот, пчеларството и земјоделските култури, со намалување на конфликтите помеѓу луѓето и дивите животни. Оваа превентивна технологија со години успешно се користи во земјите на Европската Унија и претставува одржливо решение кое ги почитува потребите на заедницата и природата“, велат од Министерството.
Спроведувањето на овој план е дел од ИПА проектот на Европската Унија.
Македонија
Талески за Алиу: Власта нуди министер за здравство информатичар кој не знае ни колку болници има

Кандидатот за министер за здравство, Азир Алиу, е апсурден и срамен потег на оваа власт. Срамно е што за министер за здравство, власта ќе постави информатичар кој веројатно нема поим колку болници има во државата, колку здравствени домови има, а камоли да знае што навистина му е потребно на здравството, рече пратеникот на СДСМ, Миле Талески, на денешната собраниска седница.
Тој се осврна на изјавите на премиерот Мицкоски, како и на потегот на власта, која, за да го оправда именувањето на Алиу за министер, вели дека најважен приоритет на оваа влада ќе биде дигитализацијата во здравството.
„Човекот нема никаква врска со здравството. Дигитализацијата е важна, но многу поважна е грижата за здравјето на граѓаните. Господине Мицкоски, јас би ви предложил да заминете во Кочани – кај родителите и сите повредени деца и млади во трагичниот случај – и да им кажете: ’не се грижете, не е важно што нема соодветна нега за нивните повреди, не е важно што немаат соодветни услови за лекување, не е важно што нема стручен медицински персонал, што немаат соодветни ракавици, што за основни материјали мора да се снабдуваат со донации – важно е што наш приоритет ќе биде дигитализацијата на здравството“, рече Талески.
Тој потенцираше дека овој предлог на владејачката коалиција е срамен, а премиерот на сите дискусии од денешната седница се спротивставува со ароганција, навреди, омаловажувања, закани и негирања.
„За жал, таа ароганција не ја покажувате само кон пратениците од опозицијата. Она што најмногу ги боли граѓаните е што немате никаков однос на соработка ниту со семејствата на починатите и повредените во трагедијата во Кочани. Тажно е сознанието дека имаме премиер кој нема емпатија – ниту кон сопствениот народ, ниту кон најранливите, ниту кон жртвите. Единствено се грижи за сопствениот рејтинг и рејтингот на неговата партија. Тоа го видовме и во денови на најголема тага за Македонија, кога ДПМНЕ најми ПР агенција што ќе се грижи за нивниот имиџ. Замислете, во моменти на национална трагедија, да плаќате агенција за односи со јавност“, рече Талески.
Македонија
Општина Ѓорче Петров објави повик за субвенции за велосипед

Општина Ѓорче Петров денеска го објави јавниот повик за доделување субвенции за купување нов велосипед.
Вредноста на субвенцијата изнесува 50% од вкупната цена на велосипедот, но не повеќе од 3.000 денари по лице, вклучително и данок на личен доход – информираат од Општината.
„Право на користење на средствата имаат жителите на Општина Ѓорче Петров кои ќе купат нов велосипед на територијата на Република Македонија во периодот од 01.01.2025 година до 30.06.2025 година или до исцрпување на предвидените средства“, појаснуваат од Општината.
Јавниот повик ќе трае до 30 јуни 2025 година, односно до исцрпување на буџетот предвиден за оваа намена во висина од 500.000 денари.
Пристигнатите барања ќе се разгледуваат по принципот „прв дојден – прв услужен“, според датумот и времето на поднесување. Аплицирањето се врши во архивата на Општината, секој работен ден од 08:30 до 15:00 часот, во затворен плик со потребната документација.
„Со оваа мерка продолжуваме да ги поддржуваме здравите и еколошки навики на нашите сограѓани. Грижата за животната средина и поттикнувањето на физичка активност се важен дел од локалните политики“, изјави градоначалникот Александар Стојкоски.
Формуларите и целосниот јавен повик се достапни на веб-страницата на Општина Ѓорче Петров.