Папата Франциск изрази во понеделникот длабоко жалење поради мачеништвото на 21 египетски копт во Либија, само затоа што се христијани, а злосторството коешто го изврши сунитската џихадистичка организација Исламска држава го осудија и шиитски Иран, но и сунитските земји Јордан и монархиите од Персискиот залив, како и палестинското исламистичко движење Хамас. 

„Убиени се само затоа што се христијани. Крвта на нашите христијански браќа е сведоштво на верата и не е важно дали се католици, православни, лутерани, копти, тоа не ги интересира оние што ги прогонуваат кои во нив гледаат само христијани“, рече папата Франциск.

Поглаварот на Римокатоличката црква со околу 1,2 милијарди верници во светот, изјави дека погубените во Либија копти се маченици за сите христијани и оти е „законски“ да се запре неправедниот агресор.

Џихадистичката група Исламска држава објави во неделата видео снимка од обезглавувањето на група луѓе за коишто тврди дека се египетски христијани – копти, коишто неодамна беа грабнати во Либија. Арапските медиуми објавија дека станува збор за 21 египетски рибар кои работеле во соседната земја, кои биле грабнати пред десетина дена во близина на градот Сирт, а биле погубени на 12-ти февруари, додека снимката е поставена на интернет на 15-ти февруари.

Египетскиот претседател Абдел Фатах ал-Сиси во обраќањето до нацијата вети дека ќе одговори на злосторството на Исламската држава над христијаните и во понеделникот во мугрите ги нападна базите на џихадистите на либиска територија, а повика и на решителна акција на меѓународната заедница и интервенција во соседна Либија.

Покрај бројните западни земји, осуда за егзекутирањето на египетските христијани дојде и од Иран, чиешто министерство за надворешни работи го осуди „нечовечкиот чин“ и оцени дека е изведен „за да се влошат односите меѓу верниците од монотеистичките религии во интерес на ционистичкиот (израелски – зр.) режим“.

Палестинското исламистичко движење Хамас, коешто Западот го смета за терористичка организација, го осуди „свирепиот акт“ и соопшти дека тој го извалкал угледот на исламот и принципот на толеранција, разорувајќи ги односите меѓу арапските муслимани и христијани коишто живеат заедно „на нашите земји со векови откако исламот им ја гарантира сигурноста“. Погубувањето на египетските копти во понеделникот го осудија и државите во Персискиот залив. „Тоа е свиреп акт“, објави шефот на дипломатијата на Обединетите Арапски Емирати, држава којашто е главен кредитор на владата на египетскиот претседател ал-Сиси.

Злосторството го осудија и другите монархии од регионот, како Саудиска Арабија, Катар, Бахреин, Кувајт. Кралството Јордан, пак, го осуди „кукавичкиот криминален чин“ и ги повика сите земји да се „здружат и да ја искоренат екстремистичката и терористичка идеологија“.

По падот и ликвидацијата на четиридеценискиот авторитарен либиски водач, Момаер ел-Гадафи, кој предупредуваше дека против него се борат исламски екстремистички групи под контрола на глобалната терористичка мрежа Ал Каеда, со народната револуција од ткн Арапска пролет која беше помогната и со воена интервенција на Западот, Либија потона во хаосот. Порано бунтовничките племенски исламистички милиции зајакнаа и денес ја одредуваат правдата на териториите кои ги контролираат во оваа земја значаен извозник на нафта.

Ситуацијата се влоши последните месеци кога беа прогласени два паралелни парламента и две влади, а насилството кое всушност не престана изминатите четири години ескалираше на истокот и западот на земјата./крај/мф/сн

Извор: Макфакс