Македонија
Патниците што во Македонија доаѓаат од Милано и Венеција во авион ќе пополнуваат прашалник за коронавирусот
Од денес патниците што во земјата доаѓаат со авиокомпанијата „Визер“ од Милано и Венеција уште во авион ќе пополнуваат прашалник со податоци за нивно полесно лоцирање доколку кај некој патник по слетувањето се појават симптоми на коронавирус.
Министерот за здравство, Венко Филипче, денес извести дека веќе имаат договор со авиокомпанијата.
„Патниците со ‘Визер’ од Милано и Венеција ќе пополнуваат здравствена локатор-карта, што ќе овозможи добра контрола и следење на патниците. Тие ќе остават податоци за тоа на која адреса престојуваат и доколку по неколку дена се јави некој патник со симптоми, многу лесно ќе биде да ги најдеме сопатниците од авионот, особено сопатниците што седат неколку реда пред и зад тој патник во авионот, во согласност со алгоритмите“, рече министерот Филипче.
Прашалникот што ќе го пополнуваат патниците во авионот е воведен како чекор за зголемување на контролата за заштита од вирусот.
Забраната за одржување јавни собири останува до петок кога, во зависност од состојбата, ќе се донесе нова препорака.
Филиче извести дека во изминатото деноноќие немало нови пациенти коишто се тестирани за коронавирусот освен тројцата за кои веќе беше објавено дека им беше направен тестот и резултатите покажале дека немаат коронавирус. Двајца од нив беа од Италија, а третиот од Шпанија, престојувал во тамошните болнички установи заради друга здравствена причина. Кај сите тројца имало индикација за тестирање и тестовите биле негативни.
Единствената пациентка со коронавирус којашто е хоспитализирана на Инфективната клинка министерот Филипче вели дека е добра и нејзината здравствена состојба секој ден се подобрува.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.