Македонија
Средба Димитров – Аселборн: Ни претстои клучен период за одлука и јасна перспектива
Министерот за надворешни работи, Никола Димитров, во Скопје оствари средба со министерот за надворешни и европски работи на Големото Војводство Луксембург, Жан Аселборн, кој престојува во работна посета на земјава.
Главниот фокус во разговорите беше ставен на европските перспективи на Северна Македонија и очекувањата од престојниот Совет на ЕУ. МНР Димитров го запозна соговорникот со суштествените и одржливите реформи во клучните области идентификувани од страна на Советот на ЕУ во своите заклучоци од јуни 2018 година, а препознаени и потврдени во привремениот извештај од Европската комисија на 2 март 2020 година.
Димитров притоа истакна: „Ни претстои клучен период за одлука и јасна перспектива. Една латинска поговорка вели Fortes fortuna adiuvat – среќата им служи на храбрите. Поминавме период во кој презедовме храбри чекори и донесовме храбри одлуки. Имаме нова предлог-методологија за пристапни преговори, ажуриран извештај од Европската комисија што недвосмислено и јасно го препознава напредокот и ја потврдува препораката за почеток на преговорите. На ред е ЕУ да возврати со одлучен чекор во насока на заеднички успех со нашите пријатели од Европа. Благодарни сме за принципиелната, недвосмислена и конзистента поддршка од Луксембург, и особено за мудроста и искрените напори на мојот драг колега Аселборн за постигнување на европскиот консензус“.
Од страна на гостинот беше поздравена силната посветеност на Владата на Северна Македонија за спроведување реформската агенда, неопходна за забрзување на европската интеграција на земјата. Притоа го истакна донесувањето на Законот за Јавно обвинителство, како уште еден јасен сигнал за посветеноста на земјата кон европските вредности. Тој ја реафирмираше силната поддршка на Големото Војводство Луксембург за донесување одлука за отпочнување на преговорите со нашата земја во најскоро време.
Двајцата министри уште еднаш констатираа дека Северна Македонија и Луксембург негуваат блиски и отворени билатерални односи со задоволителна динамика на политички дијалог, но со потреба за интензивирање на економско-трговската соработка преку привлекување на странски инвестиции. Дополнително, беа разменети мислења и околу актуелните случувања со мигрантите на границите на ЕУ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Автобусите по неделен возен ред, жичницата нема да работи
ЈСП Скопје извести дека автобусите ќе сообраќаат по неделен возен ред, а жичницата на Водно нема воопшто да работи.
Со оглед на тоа што денот кога се одржуваат парламентарните и вториот круг од претседателските избори е прогласен за неработен за сите граѓани, и автобусите од градскиот јавез превоз ќе сообраќаат по скратен, односно неделен возен ред.
Воедно, жичницата од Средно Водно во врвот Крстовар нема да работи.
Дежурни билетарници од 7 до 14 часот ќе бидат само две, на Транспортен Центар и Ѓорче Петров.
Македонија
Променливо облачно, попладне пороен дожд, грмежи и засилен ветер
Времето денеска ќе биде променливо облачно, попладне и во вечерните часови на повеќе места ќе биде нестабилно со пороен дожд и грмежи. Локално процесите ќе бидат поинтензивни во форма на невреме со обилен пороен дожд за кратко време, силни електрични празнења, засилен ветер и појава на град. Минималната температура ќе биде во интервал од 6 до 12, а максималната ќе достигне од 20 до 26 степени.
Во Скопје променливо облачно. Попладне и во вечерните часови ќе биде нестабилно со пороен дожд, грмежи и засилен ветер. Во делови од котлината ќе има услови за појава на краткотрајно невреме. Минималната температура ќе се спушти до 11, а максималната ќе достигне до 25 степени.
До петок ќе се задржи променливо облачно време, на повеќе места нестабилно со пороен дожд и грмежи. Локално процесите ќе бидат поинтензивни во форма на невреме со пообилен дожд за кратко време, силни електрични празнења, засилен ветер и појава на град. Дневната температура од четврток ќе биде во опаѓање. Во деновите од викендот условите за нестабилност ќе се намалат.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.