Дваесет и две лица, од кои дваесет туристи, се убиени во нападот во музејот „Бардо“ во средата во Тунис, е најновиот биланс објави вечерта во средата туниското министерство за внатрешни работи додавајќи дека шефот на дипломатијата вината ја гледа во соседна Либија која станала расадник на тероризмот, додека од светот доаѓаат осуди на овој терористички напад.

„Убиени се 22 лица, меѓу кои 20 се туристи од Јужна Африка, Шпанија Франција, Полска и Италија“, изјави портпаролот на туниското министерство за внатрешни работи Мохамед Али Аруи за агенциите. Додаде дека во нападот се ранети 42 лица.

Во меѓувреме италијанското министерство за внатрешни работи објави дека во нападот загинале тројца и ранети биле најмалку шест италијански државјани кои се хоспитализирани во болница во Тунис, пренесе агенцијата Ansa.

Нестабилноста во соседната Либија е „расадник на тероризмот“, изјави во средата во Париз, шефот на туниската дипломатија Таџеб Бакуш и ја повика меѓународната заедница во акција за во споменатата земја конечно да се состави единствена влада, пренесе AFP.

„Расадник на тероризмот се нестабилноста и непостоењето на држава во Либија. Сé додека состојбата останува таква, сите сме загрозени. Ја поддржуваме секоја акција којашто тежи кон изнаоѓање решение за Либија, за оваа земја да има само една влада способна да го контролира тероризмот“, изјави Бакуш.

Вооружени напаѓачи во средата го нападнаа музејот „Бардо“ во центарот на главниот град Тунис во кој во тој момент се наоѓале најмалку 200 лица. Терористите земаа во заложништво туристи, а во текот на операцијата на туниската операција тие пукаа во заложниците. Двајцата напаѓачи, кои подоцна ги уби полицијата, стрелале врз туристите кога овие излегувале од автобус пред музејот, а на снимките од нападот емитувани на телевизиите се гледа како повеќе десетици луѓе се обидуваат да се засолнат од пукањето, а ги покриваат припадниците на безбедносните сили.

Во моментот на нападот во соседната зграда на парламентот пратениците токму во тој момент расправаа за антитерористичкиот закон. По нападот парламентот беше евакуиран.

Нападот врз ваква популарна цел претставува тежок удар за малата северноафриканска земја којашто се потпира на европските туристи и досега успеваше да го избегне поголемото насилство, откако со ткн Арапска пролет во 2011 година беше соборен деценискиот претседател Зине ел-Абидин Бен Али и тензиите меѓу секуларните и исламистичките политички сили кога имаше и политички убиства. Ода е најлошиот напад по самоубиствениот за кој одговорноста ја презема Ал Каеда во 2002 година во синагогата на туристичкиот остров Џерба, кога беа убиени 21 човек.

Смртоносниот напад во Тунис предизвика згрозување и осуди од целиот свет, а во главниот град Тунис стотици луѓе почнаа во средата навечер да се собираат изразувајќи протест против тероризмот. Стотици Тунижани започна да се собираат на авенијата Хабин Буркиба, главната сообраќајница во центарот на престолнината носејќи национални знамиња и извикувајќи слогани против тероризмот. „Тунис е слободен, терористите надвор“, „Да се исчистат терористите е нашата должност“ или „Со крват и душата ќе го бранам знамето“, извикуваа и ја пееја националната химна. Генералниот секретар на Обединетите нации, Бан Ки-мун „најсилно го осудува овој напад“, и упатува „најискрено сочувство на семејствата на жртвите на овој чин…“, изјави заменикот на генералниот секретар на ОН, Фархан Хак, Бан, „исто така, ја изразува солидарност со тунискиот народ и владата“, додаде.

Високата претставничка на Европската унија за надворешна и безбедносна политика, Федерика Могерини, за терористичкиот напад ја обвини џихадистичката организација Исламска држава којашто е активна во соседна Либија. „Со денешниот напад на Тунис, терористичката група Даеш (арапски погрден назив за Исламската држава –з.м.) уште еднаш избра за цел земји и народи и од Средоземјето. Тоа ја засилува нашата решителност за уште потесна соработка со нашите партнери во спротиставувањето на терористичката закана. ЕУ е одлучна да ги искористи средства којашто ги има на располагање за на Тунис да му даде целосна поткрепа о борбата против тероризмот и реформата на безбедносниот сектор“, се истакнува во писмената изјава на Могерини.

Изрази на сочувство упати италијанскиот претседател Серџо Матарела, кој од свое лично име и италијанскиот народ одлучно го осуди „нискиот“ и „одвратен“ терористички напад „врз невооружени луѓе“.

Францускиот претседател Франсоа Оланд од името на својата земја изрази „солидарност и целосна поддршка“ за Тунис. „Веднаш го повикав тунискиот претседател за да му ги пренесам изразите на нашата солидарност во овие тешки моменти. Секогаш кога ќе се случи некој терористички чин, тоа не допира сите нас“, изјави Оланд во текот на својот говор во парискиот музеј „Лувр“.

Во Франција е покрената истрага за нападот во Тунис во кој меѓу ранетите има и француски државјани. Тоа е вообичаена практика во Франција кога меѓу жртви на напад или некоја несреќа во странство има и Французи.

„САД најсилно го осудуваат денешниот убиствен терористички напад во националниот музеј ‘Бардо’ во Тунис. САД во овие тешки моменти стојат крај тунискиот народ и даваат полна поддршка на напорите кои туниската влада ги вложува во изградбата на сигурен, напреден и демократски Тунис“, се истакнува во писмената изјава на американскиот државен секретар Џон Кери во која на семејствата на жртвите им се изразува „искрено сочувство“.

На осудите се придружи и рускиот претседател Владимир Путин кој испрати телеграма со сочувство до тунискиот колега Бежи Каид ал-Себси во кој изразувајќи „длабоко“ сочувство порача дека „вакво варварско злосторство не може да има никакво оправдување“. Во телеграмата, како што соопшти Кремљ, се порачува и дека Русија „одлучно го осудува тероризмот во сите негови пројави“ и се изразува „целосна поддршка на напорите на Тунис да се справи со оваа закана“./крај/мф/сн

Извор: Макфакс