Македонија
(Видео) Спасовски: Aпелирам до сите, особено до младите, да останат дома

Премиерот Оливер Спасовски, во вечерашното он-лајн интервју изрази благодарност до граѓаните кои ги почитуваат мерките за заштита од ширење на корона вирусот и упати повик до сите што се однесуваат лагодно, и не го почитуваат своето семејство, да се приклучат на мерките.
„Секој од нас треба да ги почитува мерките и да не го шириме вирусот понатака, со миење раце и почтиување на сите заштитни мерки. Јавната свест е на ниско ниво и затоа мерките се зајакнати, целосно се затворени кафаните, рестораните, моловите, кладилниците за да влијаеме на граѓаните да го заменат своето однесување“, истакна Спасовски и како пример ги наведе собирање на младите на Водно.
Спасовски упати апел до граѓаните, да пријават ако забележат собрана поголема група, бидејќи на тој начин се загрозува здравјето на сите граѓани.
„Од нас зависи, апелирам до сите, особено до младите, да останат дома“, порача Спасовски.
Тој кажа дека Владата прави се што може за да се спречи ширење на вирусот.
„Во полн капацитет работат сите институции. Комисијата за заразни болести работи секој ден под раководство на министерот Венко Филипче. Сите во Владата сме посветени да ги решаваме проблемите. Носиме и важни и храбри одлуки, и иако тие изгледаат рестриктивни, сепак мораме да се справиме со ширењето на вирусот. Сите институции функционираат, сите стручни лица се ангажирани и делуваат согласно препораките“, кажа Спасовски.
Тој потенцираше дека свој дел во целата операција за заштита од коронавирусот имаат самите граѓанит, односно како тие ќе покажат одговорност и грижа за своето, но и за здравјето на другите.
„Секој поединечно мора максимално да ги почитува препораките и да се придржува кон забраните. Сите капацитети на државата се на терен и важно е тие да функционираат на територија на цела држава. Постојано работат лекарски тимови, денеска имавме нови тестирања, за среќа сите негативни. Иако немаме нов случај, сепак мораме да сме будни и да го даваме својот влог. Сите медицински работници се вложуваат, но признание мора да им се даде и на лекарите, на медицинскиот персонал, полицијата, армијата, центрите за справување со кризи и сите други кои несебично ја сфаќаат серизноста на ситуацијата и се жртвуваат да помогнат. Значи, од една страна правиме се животот на сите да ни тече нормално, а од друга да го спречиме ширењето на заразата“, рече Спасовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.