Култура
Агенција за филм: Коронавирусот нанесе удар и врз македонската филмска индустрија
Пандемијата на коронавирусот и донесувањето на драстичните мерки за нејзино спречување силно удрија врз културниото живењее на глобално ниво, а ударот секако е нанесен и врз македонската филмска индустрија, која набрзо ќе се соочи со далекусежни последици за филмските уметници, креативци, филмски работници и целокупниот филмски сектор во земјава.
Ова го истакнуваат од Агенцијата за филм преку соопштение. Оттука велат дека во овие моменти треба да се размислува и за ублажување на огромните последици кои ќе ги трпи филмската дејност, па затоа денеска бил одржан состанок помеѓу министерот за култура, Хусни Исмаили, директорот на Агенцијата за филм, Горјан Тозија, и претседателот на Друштвото на филмски работници, Игор Иванов.
На состанокот, како што информираат од Агенцијата, станало збор за предлог-мерки кои би требало да се преземат за да се намали ефектот што е предизвикан поради преземените мерки на изолација.
Овие мерки директно влијаат на целата аудиовизуелна индустрија и резултираат со затворање на киносали и откажани или суспендирани снимања во земјата и низ цела Европа, особено поради фактот што оваа индустрија е составена главно од мали компании и технички хонорарни филмски работници кои ја прават особено кревка во кризата со коронавирусот.
„Во моментов голем број земји од Европа и светот се во фаза на преземање мерки со цел да се овозможи опстанокот на аудиовизуелната индустрија во овие тешки моменти. Како општествено одговорни државни институции денеска порачуваме дека правиме напори и исчекори во некои други начини на креативно делување, поддршка и поврзување на авторите, филмските работници и публиката. Во овие моменти треба да се бодриме меѓусебе и со голема радост да ги чекаме моментите кога вратите на културните институции, филмските сетови, киносалите, филмските фестивали повторно ќе бидат отворени и достапни за непосредна комуникација. Во меѓувреме, филмската уметност останува да нè крепи и здружува и во овие бурни времиња“, велат од Агенцијата за филм преку соопштение.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Во Кинотека ќе биде прикажан грчкиот филм „Што ако“
Грчкиот филм „Што ако“ (What If) во режија на Христофорос Папакаљатис, ќе биде прикажан вечер во 20 часот во Кинотека.
Прикажувањето на филмот е дел од тековната серија проекции на грчки филмови на Амбасадата на Грција, со наслов „Ајде да се запознаеме“, иницијатива која има цел да ја приближи публиката до современата грчка кинематографија.
Филмот „Што ако“ е трогателна романтична драма од креаторот на светски признатата серија на „Нетфликс“ – Маестро во сина. Дејството на филмот се одвива во Атина во периодот на економската криза и ја следува приказната на Димитрис, 33-годишен ерген, кој живее навидум обичен живот. Една вечер, кога неговото куче, женка германски овчар со име Лоунсом, го поттикнува да излезе, Димитрис се соочува со клучна одлука: да излезе или да остане дома. Ако излезе, ќе ја запознае Христина, љубовта на својот живот; ако остане дома, ќе ја пропушти шансата да ја сретне. Филмот ги истражува вечните прашања за судбината, вистинската љубов и изборот прикажувајќи го истовремено и влијанието на сериозната економска криза врз луѓето и личните односи. Истата приказна е раскажана од две перспективи.
Влезот за проекцијата во Кинотека е бесплатен по принципот прв дојден – прв услужен. Филмот е наменет за лица над 16 години, информираат од амбасадата.
Култура
Почина Кетрин О’Хара
Почина Кетрин О’Хара, легендарна актерка и ѕвезда на серијата Schitt’s Creek и култните филмови Бубимир и Сам дома. Имала 71 година, а веста ја потврдила нејзината менаџерка, пренесе „Пипл“. Засега не се соопштени дополнителни детали.
О’Хара е родена во Торонто во 1954 година и кариерата ја започнала во легендарниот комичарски театар Second City, а потоа стекнала голема популарност со телевизиската емисија SCTV, за која освоила и награда „Еми“.
Филмската публика ја памети по улогите во Бубимир, Сам дома и Сам дома 2, како и по бројни филмови на режисерот Кристофер Гест. Глобална популарност доживеа со улогата на Моура Роуз во Schitt’s Creek, за која во 2020 година освои „Еми“, „Златен глобус“ и награда SAG.
Последните години гостуваше во серии и филмови, меѓу кои The Last of Us и Argylle.
Зад себе ги остави сопругот Бо Велч и нивните два сина.
Фото: скриншот од филмот „Сам дома“
Култура
Почина поетот и преведувач Тихомир Јанчовски
На 58-годишна возраст денеска во Скопје почина поетот и преведувач Тихомир Јанчовски.
Веста за неговото прерано заминување ја соопшти Друштво на писателите на Македонија, изразувајќи длабоко жалење за загубата на еден од најзначајните современи македонски автори и педагози.
Од Друштвото информираат дека за точниот датум и час за испраќање последен поздрав ќе следи дополнително известување.
Јанчовски беше поет, писател, преведувач, професор, музичар, издавач, автор на над триесет книги, пред сè поезија, преводи и (поетски) романи, како и една книга историја („Историја на православното монаштво на територијата на денешна Република Македонија“, Сигмапрес, Скопје, 2010).
Избори од неговата поезија се преведувани и објавувани во различни литературни списанија, застапен е во голем број антологии, а четири од неговите книги се преведени на други јазици. Преведуван е на англиски, француски, словачки, хрватски, албански, босански, грчки, германски, српски, полски, грузиски, персиски и италијански јазик. Тихомир Јанчовски, со својата автентичност и креативност останува еден од најомилените наставници на повеќе генерации средношколци во гимназијата „Орце Николов“, во меѓународното училиште „Нова“ и во Американската гимназија во Скопје.

