Македонија
Димитров – Рот: Време е заеднички да покажеме европска солидарност
Министерот за надворешни работи, Никола Димитров, одржа дигитална средба со својот германски колега, државниот министер за Европа на Сојузна Република Германија, Михаел Рот. Со оглед на ситауцијата на пандемијата со Ковид-19, средбата беше одржана преку видеоконференциска врска заменувајќи ја на тој начин работната посета на германскиот министер на земјата, која првично беше планирана да се оствари на 17 март.
Двајцата министри разговараа за состојбата во Европа поврзана со пандемијата на вирусот Ковид-19 и преземните мерки за заштита на јавното здравје. Разменија мислења за опсегот на кризата, влијанието врз економијата и начините за ублажување на последиците согласувајќи се дека заемната солидарност и напорите за заеднички пристап при справување со последиците во наредниот период ќе бидат од особена важност. Вториот дел од разговорот го посветија на ЕУ-аспирациите на Северна Македонија и очекувањата во пресрет на Советот за општи работи закажан за 24 март.
„Светот е исправен пред огомен предизвик. Со германскиот министер Рот демонстриравме пошироко европско заедништво и солидарност. Како и претходно со примерот со миграциската криза, така и сега евидентно е дека Ковид-19 не познава граници, нема национална припадност и нè напаѓа еднакво сите во Европа. Затоа, заеднички би сакале да повикаме кон вклучување на сите земји од Западен Балкан, без разлика на нивниот ЕУ-интеграциски стаус во сите платформи на ЕУ за координација на одговорот кон справување со вирусот. Во таа насока ја повикувам ЕУ, покрај поддршката за своите земји членки, да даде поддршка во ублажување на социо-економските последици и за земјите од нашиот регион. Сите наши држави презедоа вонредни мерки за заштита на здравјето на нашите граѓани во смисла на ограничување на патувањето, но мораме истовремено да осигураме дека неопходните животни продукти и лекови ќе продолжат да се движат помеѓу границите на ЕУ и во регионот. Истото важи и за заедничко обезбедување непречено враќање дома на граѓаните што се во тешка ситуација, со откажани авионски летови и блокирани во пограничните зони во светот. Кусо кажано, време е заеднички да покажеме европска солидарност“, рече Димитров.
Беа разменети мислења и за европската перспектива на Северна Македонија и очекувањата на Советот за општи работи на ЕУ, кој треба да се одржи на 24 март, како и впечатоци од дискусиите на земјите членки на ниво на ЕУ КОРЕПЕР-амбасадорите во Брисел, кои вчера и денес се во тек.
„Ќе биде многу важно по влогот што го направи, Северна Македонија да може да ја премине линијата и да може да се прогласи заеднички европски успех. Посебна привилегија во овие моменти е да се добие силна поддршка од Германија, која е докажан и голем пријател и искрен поддржувач на нашата европска перспектива“, истакна Димитров.
Министерот Рот се согласи дека е неопходна солидарност од страна на ЕУ. Изрази надеж дека ЕУ ќе успее набргу да ѝ помогне на Северна Македонија во справувањето со последиците од пандемијата врз економијата за да може колку што е можно полесно да ги преброди. Се осврна и на очекувањата од Советот за општи работи за кој изрази надеж дека ќе се одржи на 24 март и дека ќе успее да донесе позитивни вести за Северна Македонија со оглед дека, кога реформите соодветно ќе се спроведат, тоа соодветно треба да биде наградено.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
СДСМ е на раб на исчезнување по изборното цунами, велат од ВМРО-ДПМНЕ и го повикуваат Филипче да си поднесе оставка
ВМРО-ДПМНЕ преку соопштение оцени дека Социјалдемократскиот сојуз доживеал изборно цунами на локалните избори и дека партијата, под водство на Венко Филипче и под, како што велат, менторство на Зоран Заев, е на праг да биде избришана од политичката сцена во државата.
Според соопштението, СДСМ – партијата кога важела за најголем политички опонент на ВМРО-ДПМНЕ, сега е трета партија на државно ниво, а во рамки на градот Скопје – петта.
„Овој историски дебакл има име и презиме – Венко Филипче, кој поразот го претставува како успех, а под диктат на неговиот ментор Зоран Заев, партијата ја дотурка до раб на исчезнување“, стои во соопштението.
Од ВМРО-ДПМНЕ наведуваат дека Филипче не се дистанцирал од Заев и неговите политики и дека партијата и натаму функционира под негово диригенство.
Во соопштението се наведува дека СДС на локалните избори освоил 126 илјади гласа и околу 230 советнички места, победувајќи во шест општини, при што ги изгубил повеќето градови каде што традиционално доминирал.
ВМРО-ДПМНЕ оценува дека народот ја казнил безидејноста и аздисаноста и оти во партијата нема реформи, туку се прават обиди за спас на Филипче и прикривање на вистинскиот виновник.
Во заклучок, партијата наведува дека е потребна итна оставка на Венко Филипче и целосна промена во врвот на СДС, бидејќи, како што се додава, на Македонија ѝ е потребна вистинска, консолидирана и силна опозиција со кредибилитет.
Македонија
„Влен“: Ја симнавме маската на оние што со години го сметаа албанскиот глас за своја лична сопственост
„Албанците не паднаа во замката на „референдумот“ што ДУИ/НАИ, со Ахмети, Таравари и Села, се обидоа да го продават како некакo политички спас. Таа манипулативна кампања, изградена врз лаги и лажен патриотизам, се урна пред волјата на Албанците кои јасно го кажаа својот збор. Со освоени десет општини, ВЛЕН им го одзеде алибито и им ја симна маската на оние што со години го сметаа албанскиот глас за своја лична сопственост“, велат од „Влен“.
„Сега бараат виновници на сите страни, само не кај себе. А како врв на апсурдот се обидуваат Блерим Беџети да го прикажат како симбол на „промената“. Тоа е вистинското лице на ДУИ, партија која дури и во пораз не е способна да се соочи со реалноста.
Говорат за „анализа“ и „реформа“, но ДУИ не може да се реформира, затоа што никогаш не ја разбра суштината на тој збор. За нив, власта никогаш не била средство за служба на народот, туку кислород за преживување. А сега, кога власта им се излизга од рацете, тонат во паника и самозалажување.
Додека тие тонеат во сопствената криза, ВЛЕН оди напред со довербата на граѓаните, со чисти раце и со политика што му служи на народот, а не на лични интереси“, се додава во соопштението на „Влен“.
Македонија
Пронајдено безживотно тело на млада жена во Тетово, Обвинителството изврши увид
Дежурен јавен обвинител од Основното јавно обвинителство Тетово вчера изврши увид на лице место на локацијата каде беше пронајдено безживотно тело на млада жена, како и во изнајмениот стан во кој таа престојувала.
„Се преземаат сите дејствија за испитување на причините за смртта со детални проверки и вештачења на местото, иако првичните сознанија и траги на лице место не упатуваат дека смртта е резултат на кривично дело.
Сепак, наредена е обдукција, ќе се вршат распити на повеќе лица, а обвинителството и сите истражни органи интензивно постапуваат за испитување на причините“, соопшти Обвинителството.

