Црна хроника
Запленети 188.000 евра и 6 кг марихуана на ГП Блаце
Царинските службеници во петок, 21-ви ноември, во два одвоени случаи на граничниот премин Блаце спречија обид за шверц на 188 илјади евра и шест килограми марихуана, информира Царинската управа.
Во првиот случај, вчера при контрола на автомобил со скопски регистерски ознаки, пријавено за излез од Република Македонија, кај македонска државјанка со иницијали М.Е. пронајдени биле непријавени 190 илјади евра. Непријавените девизи биле пронајдени во лична торба што се наоѓала на совозачкото седиште, спакувани во најлонска кеса,. Согласно Законот за девизно работење, две илјади евра и биле вратени, а останатите 188 илјади привремено се задржани. Царинската управа, против лицето М.Е. започна соодветна прекршочна постапка.
Во вториот случај, истиот ден околу 12 часот на пладне, на граничниот премин Блаце за влез во Република Македонија пристигнало патничко возило „Опел Астра“ со германски регистарски таблици, управувано од лицето В.Б (42 ), во кое како сопатник патувало и А.Ф. (28) двајцата државјани на Република Германија. Возилото било селектирано за контрола, а при преглед употребени биле и царински кучиња кои индицирале присуство на дрога со гребење на внатрешноста на задните седишта под тапацирот. При прегледот на возилото, со отстранување на тапацирот од задното седиште, во фабричките шуплини пронајдени биле седум паковки со марихуана.
Од спроведената предистражна постапка, утврдено било дека осомничените, со лице Албанец кој престојувал во Минхен се договориле да организираат и реализираат транспорт на марихуаната од Косово за Германија. Вредноста на запленетата дрога на западно европскиот нарко пазар се проценува на околу 20.000 евра.
Осомничените В.Б. и А.Ф. се лишени од слобода и истите во текот на денешниот ден ќе бидат предадени во Основниот суд Скопје, а Царинската управа до надлежното Основно јавно обвинителство ќе поднесе кривична пријава за „неовластено производство и пуштање во промет на наркотични дроги, психотропни супстанции и прекурсори“.крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Скопјанец измамен во менувачница од двајца странски државјани
Скопјанец пријавил дека во менувачница во Старата скопска чаршија бил измамен од страна на двајца странски државјани за сума од 25.000 евра, информираат попладнево од Министерството за внатрешни работи.
Синоќа во 19.15 часот во СВР – Скопје, Х.М., на возраст од 34 години од главниот град на државава, пријавил дека околу 15 часот во менувачница во Старата скопска чаршија бил измамен од двајца странски државјани.
Според пријавеното, откако се договориле во менувачницата да сменат пари за 25.000 евра, лицата дошле со чанта со договорената сума на пари во денари, при што еден од нив ја заменил чантата со денари со друга иста чанта, која во долниот дел била полна со хартиени ливчиња.
Како што пријавил Х.М., тој им ги дал еврата без да ја провери чантата, а откако заминале, сфатил дека е измамен, појаснуваат од МВР.
Се преземаат мерки за расчистување на случајот.
Црна хроника
Пожар во Дом за стари лица во струмичко Банско, нема повредени
Пожар синоќа избил во Дом за стари лица во село Банско, Струмичко. Нема повредени лица, предизвикана е само материјална штета, соопшти Центарот за управување со кризи (ЦУК).
Според Регионалниот центар за управување со кризи – Струмица, пожарот бил пријавен околу 23.30 часот. Во гаснењето на пожарот интервенирале седум пожарникари со две противпожарни возила. Пожарот целосно е изгаснат во 50 минути по полноќ.
– Прво биле евакуирани лица од катот каде што бил пожарот, потоа од долните катови. По целосното гаснење на пожарот, евакуираните лица полека се вратени на местата, собите од каде што биле евакуирани. Причината за пожарот и материјалната штета дополнително ќе бидат утврдени, појаснуваат од ЦУК.
Во денешното соопштение се наведува и дека изминатото деноноќие имало вкупно 1.759 повици на единствениот повикувачки број за итни случаи – 112 во ЦУК.
Црна хроника
Притвор за осомничен за спречување на полициски службеници да фатат побегнат затвореник
Основното јавно обвинителство Кавадарци поведе постапка против 18-годишник за кого постои основано сомнение дека сторил кривично дело – Спречување службено лице во вршење службено дејствие од член 382 став 3 во врска со став 2 и став 1 од Кривичниот законик.
На 2 мај, во куќа на улицата “Димката А. Габерот” во Кавадарци, двајца инспектори од МВР преземале службено дејствие – фаќање побегнат затвореник од КПУ Гевгелија, кој бил роднина на сега осомничениот.
Затвореникот давал отпор при обидот да биде лишен од слобода за доизвршување на затворската казна, во што сега осомничениот го поддржал, се нафрлил врз еден од полициските службеници, го влечел и го гребел, нанесувајќи му телесни повреди.
Затвореникот успеал да се ослободи и да побегне, но подоцна бил фатен и вратен во затворот. Осомничениот исто така избегал во прв момент, но бил лишен од слобода, а по предлог на јавниот обвинител, Основниот суд во Кавадарци му определи притвор во траење од осум дена.