Македонија
Мисајловски: Граѓаните да ни ги испраќаат проблемите за заеднички да доаѓаме до решенија

ВМРО-ДПМНЕ од утре почнува со иницијатива „Вашите проблеми, заеднички до решенија: Затоа што ја сакам Македонија”.
Како што најави, потпретседателот на ВМРО-ДПМНЕ, Владо Мисајловски, станува збор за иницијатива со цел контакт со граѓаните, каде ќе може преку електронска пошта, која ќе биде официјално достапна да им бидат испратени проблеми, нивни мислења и нивни предлози.
„Сите иницијативни што ќе пристигнат внимателно ќе ги разгледаме, анализираме со комисиите и експертите и ќе понудиме решенија пред институциите со можност да бидат имплементирани“, рече Мисајловски.
Од ВМРО-ДПМНЕ велат дека постојат сериозни предизвици во однос на здравствената заштита, економијата и малото стопанство, но и сериозни проблеми во земјоделието и општините.
Повикот е отворена врата и подадена рака за сите кои имаат мислење, предлог или идеја која сакаат да се имплементира, рече Мисајловски.
„Сега е време да им помогнеме на вистинските херои кои секојдневно се на првата линија во борбата со вирусот. Да им одадеме сите почит на здравствените работници, докторите, полицијата, армијата, медиумските работници и новинарите, комуналните работници, администрацијата, продавачите и продавачките во маркетите и низ пазарите, земјоделците, транспортерите, фармацевтите и сите останати што макотрпно помагаат и работат. Ајде сите заедно да помогнеме со мерки и предлози и на угостителите, малите и средни претпријатија, културните работници, турустичките работници, занаетчиите, на невработените лица и на сите останати кои имаат потешкотии во својата работа и егзистенција. Сега е време да помогнеме на секој и секаде, сега е време за целосна солидарност. Тука сме да помогнеме. Не е време за пресметки, време е за работа и одлучност. Мора и владата да покаже зрелост. Од она што ќе го покаже наредните неколку недели, ќе зависи иднина што ќе ја обезбедиме. Ние сме со народот. Уште еднаш ќе повторам тука сме да помогнеме, затоа што ја сакаме Македонија и затоа што треба сите заедно да победиме“, додаде Мисајловски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Вештачења, распити и анализи за обезбедување докази: обвинителите ја продолжуваат истрагата за трагедијата во Кочани

Јавните обвинители од тимот што ја води предистражната постапка за пожарот во дискотеката во Кочани континуирано преземаат повеќе истражни дејства за обезбедување докази, информираат денеска од Обвинителството.
„Такви дејства, кои вклучуваат распити, анализи и вештачења од голем обем и во однос на повеќе институции, се во тек и денеска. Меѓутоа, за да се зачува тајност на постапката и да се спречи компромитирање на доказите, Обвинителството не е во можност во моментот да открива повеќе детали за активностите“, велат од Обвинителството.
Македонија
Трендафилов подготвен тој и сите функционери една година да земаат плата 500 евра, но уште утре минималната да се зголеми на истиот износ

Претседателот на Сојузот на синдикатите на Македонија (ССМ), Слободан Трендафилов, е подготвен една година тој и сите избрани и именувани лица за земаат плата од 500 евра доколку веднаш во Собранието се изгласа измена со која и минималната ќе се зголеми на 500 евра. Предлогот Трендафилов го даде како одговор на нападите дека синдикалните лидери од ССМ земаат високи плати на грбот на работниците во пресрет на утрешниот протест за зголемување на минималната плата.
„Јас како претседател на ССМ им подавам рака на сите избрани и именувани лица во Македонија, 1.080 мислам дека беа на број, од утре мојата и нивната плата да ни биде 500 евра, но заедно да изгласаат закон за измени и дополнувања на Законот за минималната плата и работниците да добијат 500 евра минимална плата. Јас и тие една година ќе примаме минимална плата од 500 евра и немам никаков проблем со тоа. Ги повикувам следниот пат текстот што ќе го внесат во идиотот и кога ќе читаат од него да прочитаат дека тие се согласни цела Влада, цел парламент, сите избрани и именувани лица, директори, шефови, раководители и што ли уште не, кои се ‘ухлебани’ на државна сметка цел живот, да примаме 500 евра минимална плата колку што ќе примаат речиси 200.000 работници во Македонија“, рече Трендафилов.
Особено се обрати до пратеникот Бране Петрушевски од ВМРО-ДПМНЕ, кој на прес-конференции зборува за платата на синдикалните претставници и побара исправка.
„Го повикувам од неговата плата да ми даде дел за да ми ги надополни овие 15.000 денари што ги немам и секој месец да имам 75.000 денари за да не лаже“, рече Трендафилов, кој објасни дека неговата плата е 60.000 денари, обезбедени од членарината на работниците во синдикатите, и нагласи дека на ист начин ќе се борел за минимална плата од 500 евра и кога неговата би изнесувала 300.000 денари.
ССМ извести дека протестот закажан за утре, кој ќе претставува јавна седница на највисоките синдикални тела, ќе почне во 12.05 часот. На улица ќе излезат 300 члена на највисокото раководство на ССМ, а добредојдени се и работниците.
„Јавната седница ќе биде отворена пред ССМ и ќе продолжи пред парламентот, каде што ќе им порачаме на пратениците дека не може да има за пратениците, а да нема за работниците. Ќе продолжиме пред Стопанската комора, каде што ќе порачаме дека подадената рака од работникот денес може многу лесно да стане стисната тупаница утре. Ќе завршиме пред Владата, каде што ќе им порачаме на владините функционери дека не може да се одлучува за работниците беа работниците“, најави претседателот на ССМ, Трендафилов.
Преку утрешната јавна седница ССМ сака да го изрази незадоволството од политиките што ги води Владата за кои сметаат дека се во погрешна насока и на штета на работниците. Барањата се 500 евра минимална плата и зголемување 100 евра на сите други плати.
Македонија
(Видео) Талески: Мицкоски не може да не знае, втор обезбедувач од неговиот круг фатен во контакт со подземјето

Оваа Влада и ДПМНЕ се очигледно сериозно вмешани во криминал, а лица од најголема доверба на премиерот во континуитет се во комуникација со подземните наркокланови. Имаме сериозни причини да прашаме: Дали сме сведоци на целосна криминализација на ВМРО-ДПМНЕ и Владата предводена од Христијан Мицкоски, прашува Миле Талески, пратеник од СДСМ.
Фактите, како што вели, се загрижувачки и алармантни.
„Ангел Самараков, човек од најтесното обезбедување на премиерот Мицкоски, е фатен како одава доверливи информации на лица од скопската населба Грчец – средина добро позната по активностите на организираниот криминал. Самараков не е случаен обезбедувач што се нашол до премиерот. Тој е лојален партиски кадар на ВМРО-ДПМНЕ. Неговата сопруга е вработена во Општина Велес и беше кандидат за советник на локалните избори – исто така од редовите на ВМРО-ДПМНЕ. Ова значи дека се работи за човек од најблискиот круг на доверба на Мицкоски. А ова не е изолиран случај“.
Според него, пред само неколку месеци шефот на обезбедувањето на премиерот нападнал полицаец, кој бил на должност за време на акција за борба против дрога. Се обидел да ја спречи полицијата во претрес во скопски локал, случај за кој јавноста дозна, како што вели, само откога медиумите го објавија, па не можеше да се крие.
„Два инцидента, двајца блиски луѓе до Мицкоски и два обида од МВР да се прикрие скандалот. Двапати вистината излезе на виделина само благодарение на медиумски притисок“.
Од неговата партија прашуваат зошто луѓето од доверба на премиерот имаат соработка со подземјето.
„Дали ова е случајна состојба или организирана шема? Дали веќе не зборуваме за Влада, туку за структура длабоко поврзана со криминални мрежи? И клучното прашање: Како обезбедувачот имал такви документи, кој му ги дал доверливите информации? Кој друг е вклучен во скандалот од МВР? Само една година откако ВМРО-ДПМНЕ ја презеде власта, државата се соочува со бранот најсериозни криминални инциденти и улични пресметки во последната деценија“, констатира тој.
Според Талески, дали државата ја води Владата или криминалното подземје преку луѓето на Мицкоски?
Ова, оценува, не е политички напад, туку аларм.
„Ако премиерот на една држава се опкружува со луѓе што ја саботираат полицијата и им пренесуваат тајни на криминалци – тогаш прашањето е: кој навистина ја води државата?“
СДСМ бара итна и целосна истрага. Бараат политичка и институционална одговорност и граѓаните да знаат што се случува зад затворените врати на оваа власт.
„Ова не е борба за власт. Ова е борба за каква држава ќе бидеме – правна и безбедна или заробена од мафијата“, напоменува Талески.