Македонија
(Видео) Филипче: Со апликацијата „Стоп корона“ ќе се откријат несвесно направените контакти
Со апликацијата „Стоп корона“ ќе се откријат непознатите, односно несвесно направените контакти, смета министерот за здравство, Венко Филипче. Со тоа ќе се скрати времето на траење на епидемијата, потенцира тој. Според него, состојбата нема да заврши со достигнување на пикот кон крајот на месецот, туку ќе трае до идната година.
„Ние сме во фаза на дочекување на пикот, но оваа состојба нема да заврши сега. Во повеќе земји се размислува како да се постават, а размислуваме и ние, бидејќи до крајот на годината ќе нè чека доста работа, можеби и в година, до стекнување некој колективен имунитет или пронаоѓање на вакцината. Во целиот период пред нас ги користиме сите можности и алатки. Ова е една од најголемите придобивки за идентификување на сите примарни контакти. Во периодот пред нас планираме и скрининг во областа на Дебар, со оглед дека во овој дел се запре епидемијата“, рече Филипче.
Апликацијата е сработена за неполни 10 дена од компанијата „Нексус“ и е достапна за иос-телефоните и андроид-телефоните.
„Ние сме во фаза во која го очекуваме пикот на коронавирусот. Оваа апликација ќе ја олесни работата на епидемиолозите бидејќи ќе го замени прашалникот што го работат. Со оваа алатка ќе се стигне многу лесно до примарните контакти. Очекуваме да имаме дополнително поголем број лица, како примарни контакти, со оваа апликација“, додаде Филипче.
Министерот за информатичко општество и администрација, Дамјан Манчевски, кажа дека при изработка на оваа апликација најважно било да се гарантира безбедност и заштита на податоците, да биде едноставна за користење и апликацијата да им помогне на епидемиолозите во процесот на анкетирање на лица кои се позитивни на КОВИД-19.
„Одговорно тврдиме дека апликацијата гарантира целосна заштита на приватноста. Таа во никој случај не ги следи контактите, не користи локација, ниту име и презиме на оние кои ја користат апликацијата. Функционира со анонимизирани кодови (шифри) кои се генерираат за секоја апликација со нејзиното активирање. Единствен податок што го бара апликацијата е мобилниот број на корисникот. Корисникот е потребно доброволно да го внесе својот мобилен број за да ја активира апликацијата (го потврдува својот број со внес на СМС код пратен на тој број). Овој податок се евидентира на безбеден сервер на Минстерството за здравство. Ниту еден друг корисник нема пристап до мобилните броеви, ниту пак некаде се чува податок за сопственикот на бројот.
Дополнително, функционира на доброволна база, односно единствено во случај кога корисник на апликацијата ќе добие резултати дека е позитивен на КОВИД-19, може доброволно да ги прати податоците од својата апликација до Министерството за здравство“, информираше министерот Манчевски.
За граѓаните дополнително да бидат сигурни дека можат да веруваат на апликацијата, во наредните неколку денови тим на експерти од оваа област ќе имаат пристап до сорс кодот на апликацијата, по што ќе дадат и свој став за начинот на којшто функционира СтопКорона.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.